Zakir Əhmədov: “Nəticədə qeyri-neft sektorunun ölkə iqtisadiyyatında çəkisi xeyli artacaq”
Sahibkarlıq sahələrində yoxlamaların dayandırılması 2021-ci ilədək uzadılacaq. Bunu Milli Məclisin İqtisadi siyasət, sənaye və sahibkarlıq komitəsinin iclasında komitə sədri Ziyad Səmədzadə deyib. Onun sözlərinə görə, sahibkarlıq obyektlərində yoxlamaların iki il müddətinə dayandırılması bu ilin noyabr ayında başa çatır.
Komitə sədri qeyd edib ki, "Sahibkarlıq sahəsində aparılan yoxlamaların dayandırılması haqqında" Qanuna dəyişiklik təklif edilir. Dəyişiklikdə Azərbaycanda sahibkarlıq sahəsində aparılan yoxlamaların müddətinin 2021-ci il yanvarın 1-dək uzadılması nəzərdə tutulur.
Məlumat üçün qeyd edək ki, 2015-ci ildə “Sahibkarlıq sahəsində aparılan yoxlamaların dayandırılması haqqında” Qanun qəbul olunub. Qanun sahibkarlığın inkişafı üçün böyük imkanlar yaradır və 4 maddədən ibarətdir. Sənəddə yoxlamaların dayandırılması noyabrın 1-dən hesablanmaq şərti ilə 2 il müddətinə nəzərdə tutulmuşdu. Bu müddətdə yalnız vergi yoxlamaları, insanların həyat və sağlamlığına, dövlətin təhlükəsizliyinə və iqtisadi maraqlarına təhlükə yaradan hallar üzrə siyahısı müvafiq icra hakimiyyəti orqanı tərəfindən müəyyən edilən yoxlamalar aparıla bilər. Həmin yoxlamalar da müvafiq icra hakimiyyəti orqanı tərəfindən müəyyən edilən məhdudiyyətlər nəzərə alınmaqla aparılır. Qanunun müddəaları korrupsiya cinayətlərinin araşdırılması ilə əlaqədar Baş Prokurorluq tərəfindən aparılan yoxlamalara şamil edilmir.
Müşahidələr də göstərir ki, yoxlamaların dayandırılması ölkədə sahibkarlığın inkişafına müsbət təsir göstərib. Xüsusən də kiçik və orta sahibkarlıq bundan qazanıb. Yoxlamaların daha 3 il dayandırılması ölkədə qeyri-neft sektorunun inkişafına necə təsir göstərəcək?
Məsələyə münasibət bildirən ekspert Zakir Əhmədovun sözlərinə görə, bu, qarşıdakı 3 ildə ölkədə qeyri-neft sektorunun inkişafına çox müsbət təsir göstərəcək: “Nəzərə almaq lazımdır ki, sahibkarlıq fəaliyyətində kənar müdaxilələrin əsas mənbəyi kimi məhz nəzarətedici qurumların qanunsuz yanaşması əsas götürülür. Belə hallar, istər-istəməz, sahibkarlıq fəaliyyətinə mane olur və onun inkişafını əngəlləyirdi. O üzdən, iki il əvvəl yoxlamaların dayandırılması haqqında qərar verildi. Başqa bir tərəfdən, 2014-cü ilin ortalarından başlayaraq dünya bazarında neftin qiymətinin ucuzlaşmağa başlaması Azərbaycanda qeyri-neft sektorunun inkişaf etdirilməsi zərurətini yaratdı. Bütün hallarda, iki il əvvəl belə bir qərarın verilməsi və onun vaxtının növbəti dəfə uzadılmasının müsbət tərəfləri çoxdur. Xüsusilə də biznesə müdaxilələrin müəyyən qədər məhdudlaşdırılması baxımından sözügedən qərar çox ciddi əhəmiyyətə malikdir. Digər tərəfdən, bu, sahibkarlıq subyektləri üçün əlavə xərclərin yaranmasının müəyyən qədər qarşısını aldı. Çünki hər bir yoxlama və nəzarət özlüyündə sahibkar üçün ciddi xərc yaradırdı. Bunun aradan qaldırılması sahibkarlıq fəaliyyətinin gəlirliliyinə və bu istiqamətdə investisiya axınının artmasına öz faydasını göstərdi. Yoxlamaların dayandırılması müddətinin uzadılması ölkədə sahibkarlığın, yerli istehsalın inkişafına müsbət təsir göstərəcək. Çünki qeyri-neft sektorunun inkişafına hazırkı dövrdə çox ciddi ehtiyac var. Son iki il ərzində görülən işlər müəyyən qədər stimul rolunu oynadı və hesab edirəm ki, bu davamlı olacaq. Ona görə də belə bir qərarın verilməsi alqışalayiqdir. Bütün bunlarla yanaşı, sahibkarlıq fəaliyyətinin və fərdi təşəbbüslərin dəstəklənməsi istiqamətində görüləcək xeyli iş var. Çünki bu sahədə bir sıra problemlər hələ tam öz həllini tapmayıb. Hesab edirəm ki, qarşıdakı 3 il ərzində bunlar da yoluna düşəcək. Nəticədə qeyri-neft sektorunun ölkə iqtisadiyyatında çəkisi xeyli artacaq”.
Vidadi ORDAHALLI
