Zakir Əhmədov: "Hesab edirəm ki, ilin sonuna qədər iqtisadi göstəricilər müsbətə doğru dəyişməkdə davam edəcək"
Azərbaycanda artıq iqtisadiyyatın yeni inkişaf prosesi özünü göstərməyə başlayıb. Özü də bu, postneft iqtisadiyyatı timsalında özünü daha qabarıq şəkildə göstərir. Bunun nəticəsidir ki, təkcə bu ilin yanvar-may aylarında Azərbaycana xaricdən 2 657 ədəd müxtəlif təyinatlı avtomobil idxal olunub. Bu da ötən ilin eyni dövrü ilə müqayisədə 424 ədəd və yaxud 18,99 % çoxdur.
Hesabat dövründə, sürücü daxil olmaqla, 10 nəfər və ya daha çox adam daşımaq üçün nəzərdə tutulmuş motorlu nəqliyyat vasitələrinin idxalı 4 ədəd və yaxud 12,5 % artaraq 36-ya, əsasən adamların daşınması üçün nəzərdə tutulmuş minik avtomobillərinin və digər motorlu nəqliyyat vasitələrinin idxalı 301 ədəd və yaxud 15,5 % artaraq 2 240-a, yük daşımaq üçün motorlu nəqliyyat vasitələrinin idxalı 143 ədəd və 70,1 % artaraq 347-yə çatıb, xüsusi təyinatlı motorlu nəqliyyat vasitələrinin idxalı isə 24 ədəd və ya 41 % azalaraq 34-ə enib.
Məlumat üçün onu da qeyd edək ki, 2017-ci ilin ilk 3 ayında Azərbaycana 2903 avtomobil idxal edilib. İdxal olunan avtomobillərin sayı yanvarda 469, fevralda 1003, martda isə 1431 olub.
2016-cı ilin analoji dövründə isə cəmi 2620 avtomobil idxal olunub. Ötən il ölkəyə idxal olunan avtomobillərin sayı yanvarda 437, fevralda 821, martda 1362 olub.
Rəqəmlərdən belə qənaət hasil olur ki, ötən ilin eyni dövründə avtomobil idxalında yaranan durğunluq artıq yavaş-yavaş aradan qaldırılır.
Görünən odur ki, ölkədə iqtisadi durğunluq artıq başa çatıb. İqtisadi inkişafın yeni təzahürləri müşahidə olunur. Məsələyə münasibət bildirən ekspert Zakir Əhmədovun sözlərinə görə, avtomobil idxalında müşahidə olunan artım iqtisadi inkişafdan xəbər verir: "Bu o anlama gəlir ki, deməli, ölkədə gəlirlər artdığı üçün, avtomobil alanların sayında fərq özünü göstərir. Halbuki, ötən il bu sahədə vəziyyət çox acınacaqlı idi. Avtomobil alanların sayı əhəmiyyətli dərəcədə azalmışdı. Düzdür, əvvəlki illərə baxanda avtomobil alanların sayı o qədər də çox olmasa da, nəzərə almaq lazımdır ki, bu bir başlanğıcdır. Yəni ilin sonuna qədər avtomobil alanların sayı bundan da çox olacaq. Diqqətçəkən məqam ondan ibarətdir ki, ölkənin qeyri-neft sektorunda artım özünü göstərir. Çünki bu il və ötən il neftin qiymətində hər hansı sıçrayış qeydə alınmayıb. Bu o deməkdir ki, neftdən gələn gəlirlərin həcmi artmayıb. Digər tərəfdən, bu həm də onun nəticəsidir ki, aparılan iqtisadi islahatlar artıq öz səmərəsini verməyə başlayıb. İdarəetmənin optimallaşdırılması, sahibkarlıq sahəsində yoxlamaların dayandırılması, bir-birini təkrarlayan qurumların birləşdirilməsi öz səmərəsini verir. Hesab edirəm ki, ilin sonuna qədər iqtisadi göstəricilər müsbətə doğru dəyişməkdə davam edəcək".
Vidadi ORDAHALLI
