İldırım Qurbanov: "Bir-iki belə şirkət var və bu da yetərli deyil"
Auditorlar Palatası müəssisə və təşkilatlara xəbərdarlıq edib. Palatanın bununla bağlı yaydığı müraciətdə bildirilir ki, Azərbaycan Respublikasının mövcud qanunvericiliyinin tələbələrinə uyğun olaraq, məcburi auditin subyekti olan hüquqi şəxslər hər il maliyyə hesabatlarının düzgünlüyünü müstəqil auditor rəyi ilə təsdiq etməlidir.
"Auditdən keçməyən hüquqi şəxslərin rəhbərlərinə tövsiyə olunur ki, 2016-cı il üzrə maliyyə hesabatlarının təxirə salmadan müstəqil auditor rəyi ilə təsdiq olunmasını təmin etsinlər. Xatırladaq ki, İnzibati Xətalar Məcəlləsinin 464-cü maddəsinə əsasən, məcburi auditdən yayınmağa görə inzibati cərimə tətbiq edilməsi nəzərdə tutulub. Azərbaycan Prezidentinin "Rayon (şəhər) məhkəmələrinin baxdığı inzibati xətalar haqqında işlər üzrə protokol tərtib etmək səlahiyyəti olan vəzifəli şəxslərin siyahısı"nın təsdiq edilməsi haqqında" 3 may 2017-ci il tarixli, 1361 nömrəli Fərmanına müvafiq olaraq İnzibati Xətalar Məcəlləsinin 464-cü maddəsinə əsasən, qanunvericiliklə nəzərdə tutulmuş hallarda həyata keçirilməli olan məcburi auditdən yayınmağa görə inzibati xəta haqqında protokol tərtib etmək səlahiyyəti Auditorlar Palatasına həvalə edilib".
Görünən odur ki, məcburi auditin subyekti olan hüquqi şəxslər hər il maliyyə hesabatlarının düzgünlüyünü müstəqil auditor rəyi ilə təsdiq etməkdə maraqlı deyil. Bunun səbəbi nə ilə bağlıdır? Niyə bunda maraqlı deyillər?
Məsələyə münasibət bildirən iqtisadçı-ekspert İldırım Qurbanovun sözlərinə görə, vergidən yayınmaq üçün audit yoxlamalarından yayınırlar: "Audit yoxlamalarının aparılmasında məqsəd müəssisənin gəlirlərini, vergi ödənişlərini, o cümlədən digər sosial ödənişlərini müəyyən etməkdir. Bu zaman obyektivlik ortaya çıxır, kölgə iqtisadiyyatının, vergidən yayınmanın qarşısı alınır. Digər iqtisadi vəziyyət müəyyənləşdirilir. Auditorlar yoxlama apardıqdan sonra müəssisənin maliyyə vəziyyəti barədə qərar çıxarır. Yəni müəssisə hansı zərərlə işləyir və yaxud da hansı gəlirlə işləyir. Ümumən audit yoxlamaları normal bir işdir və bütün Avropa ölkələrində gedir. Ancaq bizdə bəziləri vergidən yayınmaq üçün audit yoxlamalarında maraqlı olmur. Bir var 200 manat maaşa görə vergi ödəyəsən, bir də var 1000 manat maaşa görə. Digər tərəfdən, yaxşı olardı ki, Azərbaycanda da ixtisaslaşmış audit şirkətləri olsun və bu sahədə fəaliyyət göstərsin. Bir-iki belə şirkət var və bu da yetərli deyil. Onların fəaliyyətində problemlər ortaya çıxır".
Vidadi ORDAHALLI
