Natiq Cəfərli: "İstər manat, istərsə də dollar ekvivalentində qoyulan əmanətlərin həcmi günü-gündən azalır"
Azərbaycanda əmanətlərin dollarlaşması zəifləyir. Belə ki, ölkədə əhalinin bank əmanətlərində dollarlaşma göstəricisi bu il mayın 1-nə 76,6 % təşkil edib. Xatırladaq ki, bu göstərici aprelin 1-də 78,6 %, 1 il bundan əvvəl isə 81,7 % olub.
Azərbaycan Mərkəzi Bankının hesabatına əsasən, aprelin sonunda fiziki şəxslərin banklardakı əmanətlərinin məbləği 6 873,2 mln. manat təşkil edib. Bu da əvvəlki ayla müqayisədə 38,2 mln. manat və yaxud 0,55 % azdır. İlin əvvəli ilə müqayisədə əmanətlərdə 575,5 mln. manat və yaxud 7,7 %, ötən ilin eyni dövrü ilə müqayisədə 811,8 mln. manat və yaxud 10,6 % azalma qeydə alınıb.
Əmanətlərin dollarlaşma prosesinin zəifləməsi barədə fikir bildirən iqtisadçı-ekspert Natiq Cəfərli "Bakı-Xəbər"ə açıqlamasında qeyd etdi ki, bunun müxtəlif səbəbləri var: "İlk növbədə demək lazımdır ki, bağlanan bankların sayının artması əmanətçilərin əmanət qoyma statistikasına təsir etdi. Həmçinin, bankların bağlanma prosesi manat və dollarla qoyulan əmanətlərin geri çəkilməsinə təsir etdi. Son zamanlar banklara qoyulan əmanətlərin sayı yüksək templə azalır. İstər manat, istərsə də dollar ekvivalentində qoyulan əmanətlər əriməyə başlayır. Əmanətlərin azalması tendensiyası davam edir. Bu da ümumi bank sektoruna təsir göstərir. İnsanların bank sisteminə güvənsizliyi dövriyyəyə təsir edir".
Həmsöhbətimizin sözlərinə görə, bank sektoru iqtisadiyyatın qan damar sistemidir. Adıçəkilən sektora güvən olmalıdır ki, iqtisadiyyatın çarxları dönsün: "Son iki il ərzində yaşanan hadisələr bank sektorunda öz izini buraxdı. Devalvasiya, bankların bağlanması, Azərbaycan Beynəlxalq Bankı ilə bağlı baş verən proseslər ümumi bank sisteminə inamı zəiflətdi. Bu səbəbdən də vətəndaşların bir hissəsi həm manat, həm də dollarla olan əmanətlərini banklardan geri çəkməyə başladı".
Günel CƏLİLOVA
