İlham Şaban: "Hesab edirəm ki, bu yöndə işləri sürətləndirmək lazımdır"
Rusiya, Azərbaycan və İran vahid elektrik energetikası kəmərinin yaradılması üzrə birgə iş aparır. Məlum olduğu kimi, bunu Azərbaycanda səfərdə olan Rusiyanın energetika naziri Aleksandr Novak deyib.
Azərbaycanla Rusiya arasında energetika sahəsində əməkdaşlığın hazırkı səviyyəsindən məmnunluğunu ifadə edən A.Novak bildirib ki, əməkdaşlığın səviyyəsini yüksək qiymətləndirir: "Biz əməkdaşlığımızın səviyyəsini yüksək qiymətləndiririk. Energetika sahəsində, o cümlədən qonşu ölkələrlə qarşılıqlı münasibətlərin inkişafı, eləcə də elektroenergetikada, Azərbaycan və İranla vahid elektrik energetikası kəmərinin yaradılması üzrə bir yerdə işləyirik. Bununla yanaşı, bizim neft şirkətlərimiz Azərbaycanda neft yataqlarının işlənməsində iştirak edir. Biz, həmçinin, OPEC-ə daxil olmayan ölkələr arasında neft bazarının tarazlaşdırılması üzrə razılaşmanı bir yerdə reallaşdırırıq və Azərbaycan burada əsas yerlərdən birini tutur. Bundan başqa, qaz sahəsində əməkdaşlığı davam etdiririk. Hesab edirəm ki, bu, ölkələrimiz arasında ticari-iqtisadi əməkdaşlığın perspektivli istiqamətlərindən biridir. Uzun illər SOCAR-ın prezidenti, sonralar sənaye və energetika, son illər isə energetika naziri vəzifəsində çalışan Natiq Əliyev də bu sahədə mühüm xidmətlər göstərib".
Bütövlükdə, üç ölkə arasında vahid elektrik energetikası kəmərinin yaradılmasının mahiyyəti nədən ibarətdir? Ekspertlər bunun əhəmiyyətini necə dəyərləndirir?
Məsələyə münasibət bildirən Neft Araşdırmaları Mərkəzinin rəhbəri İlham Şabanın sözlərinə görə, bununla bağlı vaxtilə mərhum Natiq Əliyev bir neçə dəfə açıqlama vermişdi: "Azərbaycan, Rusiya və İran rəsmiləri mütəmadi görüşlərində enerji mübadiləsinin kommersiya mübadiləsinə çevrilməsi ilə bağlı fikirlərini söyləyib. Bu da ona hesablanıb ki, Rusiya çox böyük elektrik enerjisi potensialına malik ölkədir. İran isə müəyyən mənada elektrik enerjisi idxalçısıdır. Rusiyada elektrik enerjisinin maya dəyəri ucuz olduğuna görə İran onu idxal etməkdə maraqlıdır. Belə olan halda, Azərbaycan tranzit ölkəyə çevrilər. Rusiyanın elektrik enerjisi Azərbaycan üzərindən İrana axıb gedər. Bununla bağlı Azərbaycanda kifayət qədər infrastruktur var. İmişli-Parsabad, Astara-Astara yüksək gərginlikli elektrik xətlərinin adını çəkmək olar. Ancaq çox təəssüf ki, Azərbaycanla Rusiya arasında belə bir enerji körpüsü hələ reallaşdırılmayıb. Özü də əsasən Rusiya tərəfinin ləng tərpənməsi üzündən. Ona görə də hesab edirəm ki, bu yöndə işləri sürətləndirmək lazımdır".
Vidadi ORDAHALLI
