Ramil Osmanlı: "Hesab edirəm ki, avtomobil idxalında vəziyyəti ilin sonunda təhlil etmək daha məqsədəuyğun olar"
Bu ilin yanvar-may aylarında Azərbaycana xaricdən 2 657 ədəd müxtəlif təyinatlı avtomobil idxal olunub. Dövlət Gömrük Komitəsindən verilən məlumata görə, bu, ötən ilin eyni dövrü ilə müqayisədə 424 ədəd və yaxud 18,99 % çoxdur.
Hesabat dövründə sürücü daxil olmaqla, 10 nəfər və ya daha çox adam daşımaq üçün nəzərdə tutulmuş motorlu nəqliyyat vasitələrinin idxalı 4 ədəd və yaxud 12,5 % artaraq 36-ya, əsasən adamların daşınması üçün nəzərdə tutulmuş minik avtomobillərinin və digər mühərrikli nəqliyyat vasitələrinin idxalı 301 ədəd və yaxud 15,5 % artaraq 2 240-yə, yük daşımaq üçün motorlu nəqliyyat vasitələrinin idxalı 143 ədəd və 70,1 % artaraq 347-yə çatıb, xüsusi təyinatlı motorlu nəqliyyat vasitələrinin idxalı isə 24 ədəd və ya 41 % azalaraq 34-ə enib.
2017-ci ilin ilk 3 ayında Azərbaycana 2903 avtomobil idxal edilib. İdxal olunan avtomobillərin sayı yanvarda 469, fevralda 1003, martda isə 1431 olub.
2016-cı ilin analoji dövründə isə cəmi 2620 avtomobil idxal olunub. Ötən il ölkəyə idxal olunan avtomobillərin sayı yanvarda 437, fevralda 821, martda 1362 olub.
Rəqəmlərdən belə qənaət hasil olur ki, ötən ilin eyni dövründə avtomobil idxalında yaranan durğunluq artıq yavaş-yavaş aradan qaldırılır. Maraqlıdır, bəs ekspertlər mövcud vəziyyəti necə dəyərləndirir? Avtomobil idxalının artması nə ilə bağlıdır?
Məsələyə münasibət bildirən əmlak məsələləri üzrə ekspert Ramil Osmanlının sözlərinə görə, əvvəlki illərə baxanda avtomobil idxalının həcmi elə də böyük deyil: "Məsələ ondadır ki, 2010-2014-cü illərdə avtomobil idxalı ilə müqayisədə hazırkı artım çox azdır. Həmin dövrlərdə il ərzində ölkəyə 100 mindən artıq avtomobil idxal olunurdu. Ancaq ötən il ümumilikdə ölkəyə gətirilən avtomobillərin sayı o qədər azdır ki, onun beş aylıq göstəricisi də kiçik rəqəmlərlə ölçülür. Ona görə də düşünmürəm ki, bu ilin 4 ayında avtomobil idxalının 19 faiz artması böyük göstəricidir. Nəzərə almaq lazımdır ki, İran və Çindən müəyyən qədər ucuz avtomobillərin idxalı artıb. Hesab edirəm ki, avtomobil idxalında vəziyyəti ilin sonunda təhlil etmək daha məqsədəuyğun olar. Müəyyən göstəricilərə baxıb təhlillər aparmaq olar ki, avtomobil idxalı hansı səviyyədə olub".
Vidadi ORDAHALLI
