Vüqar Bayramov: "Azad iqtisadi zona investisiyanın cəlb edilməsi baxımından vacibdir"
Azərbaycanda azad iqtisadi zonaların yaradılması dünyada ən çox tətbiq olunan metodlardan biridir. Azad iqtisadi zonalar yaratmaqla bu bölgələrə investisiyaların cəlb edilməsi əsas məqsəd daşıyır. Bu baxımdan nəzərə almaq lazımdır ki, ABŞ və Çin azad iqtisadi zonaların yaradılması və bunu inkişaf etdirmək baxımından nümunəvi ölkələrdir. Bunun üçün Azərbaycanda da azad iqtisadi zonaların yaradılması zərurəti yarandı. Bu istiqamətdə müəyyən işlər görülür.
Prezident İlham Əliyev Azərbaycanda azad iqtisadi zonalar yaradılması işinin sürətləndirilməsi haqqında sərəncam imzalayıb. Həmin sərəncama əsasən, Qaradağ rayonunun Ələt qəsəbəsi ərazisində xüsusi iqtisadi zona yaradılır.
Əksər xarici ölkələrdə bir neçə azad iqtisadi zona yaradılıb. Məsələn, qonşu İranda 10 azad iqtisadi zona mövcuddur. Maraqlıdır, Azərbaycanda neçə azad iqtisadi zona yaratmaq olar? Elə bu sualla ekspertə müraciət etdik.
İqtisadçı-ekspert Vüqar Bayramov "Bakı-Xəbər"ə açıqlamasında bunları qeyd etdi: "Ələtdə yaradılan iqtisadi zona xüsusi qanun statusu alacaq. Həmin qanunun hazırlanması və ölkə başçısı tərəfindən təsdiq olunması gözlənir".
İqtisadçının fikrincə, birinci mərhələdə Azərbaycanda 5 azad iqtisadi zonanın yaradılması nəzərdə tutulur: "Cənub bölgəsindən Lənkəranda, şimalda Quba-Xaçmazda belə bir iqtisadi zonanın yaradılması mümkündür. Quba-Xaçmaz rayonu Rusiya sərhədi ilə yaxın olduğu üçün, iqtisadi imkan baxımından əlverişlidir. Eyni zamanda, Gəncəbasarda da azad iqtisadi zonanın yaradılması realdır. İqtisadi baxımdan adıçəkilən ərazi olduqca sərfəlidir. Gürcüstan, Türkiyə və digər ölkələrə istehsal olunacaq malların çıxarılması mümkündür. Həmçinin, Bakıya yaxın ərazilərin birində də azad iqtisadi zona yaradılması müzakirə olunur. Ələt də daxil olmaqla, qeyd etdiyim ərazilərdə azad iqtisadi zonalar yaradıla bilər".
V.Bayramovun sözlərinə görə, azad iqtisadi zona investisiyanın cəlb edilməsi baxımından vacibdir: "Yeni yaradılacaq azad iqtisadi zona daha çox nəqliyyat, logistika zonasının formalaşmasına xidmət edir. İnvestisiyaların cəlb olunması burada əsas hədəf olaraq nəzərdə tutulub. Belə bir iqtisadi zonanın yaradılmasının üstünlüyü ondan ibarətdir ki, Azərbaycan tranzit ölkə olaraq öz imkanlarını genişləndirə biləcək və ölkə ərazisində daha çox yükdaşımalara nail olacaq. Son dövrlər Azərbaycan ərazisindən malların Avropadan və Türkiyədən Asiyaya aparılmasına olan marağın artmasını nəzərə alaraq, yeni iqtisadi zonanın yaradılması Azərbaycan üçün sərfəlidir. Yeni iqtisadi zona, həmçinin, dövlət gəlirlərinin və büdcəyə daxil olan vəsaitin artmasına da səbəb olacaq. Qeyd edim ki, bu addım eləcə də məşğulluğun inkişafına yüksək təsir göstərəcək. Çünki yeni investisiyaların cəlb olunması yeni iş yerlərinin yaranması deməkdir".
Günel CƏLİLOVA
