Rəşad Həsənov: "Naxçıvandan Türkiyəyə ixracın həcmi genişləndirilə bilər"
"İlk növbədə Naxçıvandan Türkiyəyə təbii məhsulların ixracına üstünlük verilməlidir"
Naxçıvan məhsulları Türkiyəyə ixrac oluna bilər. Bir neçə gün öncə İqtisadiyyat Nazirliyində Türkiyə nümayəndə heyəti ilə görüş keçirilib. Görüşdə Azərbaycandan, xüsusilə Naxçıvan MR-dən Türkiyəyə ixracın genişləndirilməsinə, Azərbaycan və Türkiyə arasında Preferensial Ticarət Sazişinə və qarşılıqlı ticarət məsələlərinə dair müzakirələr aparılıb.
Naxçıvanın iqtisadiyyatının davamlı inkişafına böyük önəm verildiyini, MR-in inkişaf etdiyini, müasir infrastrukturun, istehsal müəssisələrinin yaradıldığını diqqətə çatdıran iqtisadiyyat naziri Şahin Mustafayev bu baxımdan bölgənin potensialının reallaşdırılmasının, ixracının genişləndirilməsinin əhəmiyyətini vurğulayıb: "Naxçıvanda istehsal olunan məhsulların Türkiyə ixracının artırılması üçün imkanlar böyükdür. Azərbaycan və Türkiyə prezidentləri bu potensialın reallaşdırılmasına xüsusi önəm verir. Bu istiqamətdə indiyədək rəsmi şəxslərin və sahibkarların iştirakı ilə görüşlər keçirilib, qarşılıqlı səfərlər təşkil olunub, müzakirələr aparılıb".
Türkiyə nümayəndə heyəti Naxçıvan məhsullarının Türkiyəyə ixracının genişləndirilməsinə dəstək veriləcəyini, bu istiqamətdə əlaqədar qurum və sahibkarlarla sistemli iş aparıldığını və türk iş adamlarının Naxçıvana investisiya qoyulmasında maraqlı olduğunu bildirib.
Naxçıvan məhsullarının qonşu Türkiyəyə ixrac olunması ilə bağlı fikir bildirən iqtisadçı-ekspert Rəşad Həsənov "Bakı-Xəbər"ə açıqlamasında qeyd etdi, bu anlaşma olduqca müsbətdir: "Nəzərə almaq lazımdır ki, Naxçıvanda istehsal olunan məhsulların Azərbaycan bazarına daşınması baxımından müəyyən problemlər var. Əsasən yol xərci maya dəyərinin artmasına səbəb olur. Bu səbəbdən də kiçik sahibkarlar Azərbaycan bazarına çıxış əldə edə bilmir. Həmçinin, Naxçıvan məhsulları qiymət baxımından bazarda rəqabət apara bilmir. Naxçıvanın iqtisadi blokadasının neytrallaşdırılması və yerli istehsalın genişləndirilməsi istiqamətində müvafiq addımlar atılıb. Amma Naxçıvanda yerli istehsalın rəqabət qabiliyyətli olmamasını da nəzərə almaq lazımdır. Bu baxımdan da zaman lazımdır ki, istehsal mühiti təkmilləşdirilsin və eyni zamanda, standartlara uyğun məhsul istehsalı təmin olunsun".
İqtisadçının fikrincə, ilk növbədə təbii məhsulların ixracına üstünlük verilməlidir: "Naxçıvanda yerli məhsullardan duz və mineral suların rəqabət imkanı daha üstün qiymətləndirilir. Çünki bunlar təbii rəqabətli məhsullardır. Bu məhsulların ixracı istiqamətində müəyyən işlər görülməlidir. Daha sonra isə tikinti sektoruna dair məhsullara nəzər yetirmək lazımdır. Qeyd edim ki, Naxçıvanda tikinti sektoru məhsullarının istehsalı üzrə müəssisələr fəaliyyət göstərir. Bu müəssisələrin fəaliyyətinin müasir stantdartlara uyğunlaşdırılması yolu ilə rəqabətli məhsul buraxılışı təmin oluna bilər. Növbəti dövr ərzində Naxçıvandan Türkiyəyə ixracın həcmi genişləndirilə bilər".
Günel CƏLİLOVA
