Rəsul Cahangirli: "Orta Asiya və digər Şərq ölkələrindən Avropaya daşımalar artacaq ki, bu da Azərbaycanın tranzit ölkə olaraq rolunu gücləndirəcək"
Azərbaycan Avropa şirkətlərini ölkənin qeyri-neft sektorunun inkişafına investisiya qoymağa çağırıb. Məlum olduğu kimi, bunu Avropa İttifaqı-Azərbaycan biznes-forumu zamanı iqtisadiyyat naziri Şahin Mustafayev deyib.
Onun sözlərinə görə, Azərbaycanla Aİ arasında 7 sahə üzrə əməkdaşlıq potensialı böyükdür. Azərbaycan və Aİ sənaye, nəqliyyat, kənd təsərrüfatı, informasiya texnologiyaları, turizm, təhsil və səhiyyə sahələrində əməkdaşlığın inkişafı üçün böyük potensiala malikdir. Nazir qeyd edib ki, energetika sahəsində əməkdaşlıq öz perspektivliyini saxlayır.
Avropa İttifaqının Azərbaycana birbaşa investisiyalarının həcmi 7 milyard avro təşkil edir. Bunu isə Avropa Komissiyasının Aİ-nin genişlənməsi barədə danışıqlar və qonşuluq siyasəti üzrə Baş Direktorluğunun Şərq tərəfdaşlığı departamentinin direktoru Lourens Meredit deyib. Onun sözlərinə görə, Aİ Azərbaycan iqtisadiyyatına investisiya qoyan ən böyük investordur: "Bu məbləğin 2,5 milyard avrodan çoxu Azərbaycan iqtisadiyyatının qeyri-neft sektoruna yönəldilib".
Bütövlükdə, sadalanan sahələr üzrə potensialın olmasını ekspertlər necə dəyərləndirir? Bu sahələr üzrə əlaqələrin dərinləşdirilməsi hansı effekti verə bilər? Məsələyə münasibət bildirən ekspert Rəsul Cahangirlinin sözlərinə görə, sadalanan 7 sahə üzrə hər iki tərəfin potensialı genişdir: "Hesab edirəm ki, bu sahələr üzrə əməkdaşlığın genişləndirilməsi hər iki tərəfə fayda verəcək. Xüsusən də sənaye, kənd təsərrüfatı və nəqliyyat sahələrində əlaqələrin daha da dərinləşdirilməsinə ehtiyac var. Yaxın dövrlərdə Bakı-Tiflis-Qars dəmir yolunun istismara verilməsi tərəflər arasında əlaqələrin genişlənməsinə yeni təkan verəcək. Bu imkan verəcək ki, Azərbaycandan ixrac olunan məhsullar daha tez və etibarlı şəkildə Avropa İttifaqı bazarına çıxarılsın. O cümlədən, Avropadan Azərbaycana müxtəlif məhsulların gətirilməsini asanlaşdıracaq. Daşımaların müddətinin azalması və digər məsələlər gətirilən məhsulun maya dəyərinin aşağı düşməsinə müsbət təsir edəcək. Ən başlıcası, Orta Asiya və digər Şərq ölkələrindən Avropaya daşımalar artacaq ki, bu da Azərbaycanın tranzit ölkə olaraq rolunu gücləndirəcək. Beləliklə, ölkənin gəlirləri artacaq. Bununla yanaşı, Aİ-nin sənaye nəhəngləri Azərbaycanda qeyri-neft sektorunun inkişafında, emal müəssisələrinin yaradılmasında yaxından iştirak edə bilər. Belə ki, buna böyük ehtiyac var. Kənd təsərrüfatı sahəsində əlaqələrin dərinləşdirilməsi vacib məsələlərdən biridir. Aİ böyük bazar olduğu üçün, Azərbaycanda istehsal olunan kənd təsərrüfatı məhsulları orada realizə oluna bilər. Təbii ki, bunun üçün məhsulların rəqabət qabiliyyəti artırılmalı, istehsal zamanı yeni texnologiyaların tətbiqi genişləndirilməlidir. O cümlədən digər sahələrdə də əlaqələrin genişləndirilməsinə ehtiyac var". Vidadi ORDAHALLI
