Ümumdünya Gömrük Təşkilatının (ÜGT) İnformasiya Texnologiyaları üzrə konfrans və sərgisində iştirak etmək məqsədilə Gürcüstanın paytaxtı Tiflis şəhərində səfərdə olan Dövlət Gömrük Komitəsinin sədri, gömrük xidməti general-polkovniki Aydın Əliyev iyunun 8-də "Sputnik" informasiya agentliyinin Gürcüstan xidmətinə (sputnik-georgia.ru) və "Gürcüstan Xəbərləri" (apsny.ge) internet portalına müsahibə verib.
Komitə sədri müsahibəsində son illərdə gömrük sahəsində aparılan islahatlardan və həyata keçirilən innovasiya layihələrindən bəhs edərək, ölkəmizdə gömrük işinin müasir dünyanın çağırışlarına cavab verəcək şəkildə həyata keçirildiyini bildirib. İnformasiya texnologiyalarının gömrük işinin bütün sahələrində tətbiqinə geniş yer verildiyini vurğulayan Aydın Əliyev "Elektron bəyannamə", "Yaşıl dəhliz" və digər layihələrin uğurla həyata keçirilməsinin gömrük işinin təşkilinə faydaları barədə məlumat verib.
Gürcüstanlə Azərbaycan arasındakı dostluq və strateji tərəfdaşlıq əlaqələrinin gömrük işi sahəsində də uğurla davam etdirildiyini bildirən DGK sədri iki ölkə arasında sərhədkeçmə prosesinin sürətli və etibarlı şəkildə həyata keçirilməsi, gömrük hüquqpozmalarına qarşı mübarizə çərçivəsində aəməkdaşlığın inkişaf etdirilməsindən bəhs edib.
Ümumdünya Gömrük Təşkilatının (ÜGT) İnformasiya Texnologiyaları üzrə konfrans və sərgisində iştirak məqsədilə Tiflisdə səfərdə olan DGK sədri Aydın Əliyev səfər çərçivəsində "Smiths Detection" şirkətinin nümayəndə heyətinin rəhbəri Tim Norton ilə də görüş keçirib.
Görüşdə DGK sədri gömrük nəzarətinin təşkili sahəsində son illərdə əldə olunan uğurlardan bəhs edərək, Azərbaycanın bütün sərhəd-gömrük keçid məntəqələrində "Smiths Detection" şirkətinin istehsalı olan avadanlıqların quraşdırıldığını və gömrük nəzarəti zamanı uğurla tətbiq edildiyini bildirib.
Bundan başqa, görüşdə qarşılıqlı əməkdaşlığın gələcək perspektivləri, "Smiths Detection" şirkətinin ölkəmizdə tətbiq edilən avadanlıqlarına texniki xidmətin göstərilməsi və gömrük əməkdaşlarına təlimlərin keçirilməsi ilə bağlı məsələlər müzakirə olunub.
Məlumat "Bakı Xəbər"ə DGK-nın mətbuat xidmətindən daxil olub.
Xəbər xidməti
