Natiq Cəfərli: "Fiziki şəxslərlə bağlı yeni qaydaların təsdiq olunması vergi daxilolmalarına müsbət təsir göstərib"
Xəbər verildiyi kimi, Azərbaycanda vergi daxilolmaları 5 faizdən çox artıb. Vergilər Nazirliyi proqnoz tapşırıqlarına 104,7 faiz əməl edib. Bu ilin yanvar-may ayları ərzində vergi ödəyiciləri tərəfindən dövlət büdcəsinə 2 825,8 mln. manat məbləğində vəsait ödənilib.
Vergilər Nazirliyinin Media və Kommunikasiya Mərkəzindən verilən məlumata görə, bu, ötən ilin eyni dövrü ilə müqayisədə 5,3 faiz çoxdur. Nazirliyin müəyyən etdiyi proqnoz tapşırıqlarına 104,7 faiz əməl edilib.
Vergi daxilolmalarının 5 faizdən çox artması barədə fikir bildirən iqtisadçı-ekspert Natiq Cəfərli "Bakı-Xəbər"ə açıqlamasında bunları qeyd etdi: "Vergi daxilolmalarının artması gözlənilən idi. Vergi daxilolmalarının artmasının müxtəlif səbəbləri var. İlk öncə bildirim ki, Azərbaycan neftinin qiymətində ötən ilin eyni dövrü ilə müqayisədə 35 faizə qədər fərq var. Ötən ildən fərqli olaraq neftin qiyməti yüksəlib. Keçən ilin yanvar ayında neftin qiyməti 29 dollar, sonra isə 35 dollara yüksəldi. Hazırda isə neftin ortalama qiyməti 55 dollar civarındadır. Bu isə neft şirkətlərindən gələn gəlirin artmasına səbəb olur. Yaranmış vəziyyət Azərbaycan Beynəlxalq Əməliyyat Şirkətinin və SOCAR-ın vergi ödənişlərinə müsbət təsir edib". Həmsöhbətimizin sözlərinə görə, fiziki şəxslərlə bağlı yeni qaydaların təsdiq olunması bu sahəyə müsbət təsir göstərib. VÖEN açan fiziki şəxslərin sayı artıb. Müxtəlif kontraktların leqallaşması ilə bağlı sərt qaydalar tətbiq olundu. Sərt qaydaların hesabına vergi ödənişlərində artım qeydə alındı".
N.Cəfərli onu da əlavə etdi ki, vergi ödəmələrində artımın qeydə alınması səbəblərindən biri də vergi orqanlarının cari ilin ilk üç ayında kommersiya qurumlarından vergi ödənişlərini istəməsi olub: "Bəzi kommersiya qurumları ilin əvvəlində ödəmələr edib. Bu hal da vergi daxilolmalarının artmasına təsir edib. Hesab edirəm ki, vergi daxilolmalarının artım tempi ilin ikinci yarısından etibarən zəifləyə bilər".
Günel CƏLİLOVA
