Əli Əlirzayev: "İnvestorların maliyyə bazarına rahat şəkildə çıxması üçün rəqabət mühiti olmalıdır"
"Azərbaycanda maliyyə bazarlarına çıxış hələ də çətindir, buna görə də investorlar vəsaitlərini səhmlərə qoyur". Bu sözləri iqtisadiyyat nazirinin müavini Sahil Babayev media nümayəndələrinə açıqlamasında bildirib.
İnvestorların üzləşdiyi bu problem nədən qaynaqlanır? Mövzu ilə əlaqədar ekspertə müraciət etdik.
İqtisadçı-ekspert Əli Əlirzayev "Bakı-Xəbər"ə açıqlamasında qeyd etdi ki, investorların maliyyə bazarlarına çıxışının çətin olmasının səbəbi onların risq etməkdən çəkinməsidir: "İlk öncə investorun maliyyə bazarına çıxması üçün ona vəsait lazımdır. Vəsait olsa belə, onun istifadə mexanizmi müəyyən olunmalıdır. Vəsaitin hansı məqsədlə istifadə olunması ilk öncə bilinməlidir. İnvestorun maliyyə yatırdığı vəsaitin gələcəkdə gəlir gətirməsi əsasdır. Bazarı olan müəssisəyə vəsait qoyularsa, gələcəkdə investor həmin məhsulla bazara rahat şəkildə çıxa bilər. İnvestorlar bazarı tanımalıdır. Gəlir gətirən sahəyə vəsait qoyularsa, nəticə müsbət olar".
Həmsöhbətimizin sözlərinə görə, investisiya bazarı bir neçə sahədə inkişaf etməlidir: "Əsas istiqamət turizm sahəsidir. İnvestorlar turizm sahəsinə xüsusi diqqət ayırmalıdır. Ancaq bu sahənin risqli olması da nəzərə alınmalıdır. Turizmin elə növü var ki, Azərbaycanda hələ inkişaf etməyib və yaxın illər ərzində gəlir gətirməsi mümkün deyil. Bu səbəbdən də investorlar turizmin bəzi sahələrinə yatırım etməkdə çətinlik çəkir".
İqtisadçı bildirdi ki, investorlar tikinti sektoru ilə də maliyyə bazarına çıxa bilər.
Ə.Əlirzayevin fikrincə, investorların maliyyə bazarına rahat şəkildə çıxması üçün rəqabət mühiti olmalıdır. Rəqabət olan yerdə hər zaman inkişaf var.
Günel CƏLİLOVA
