İyunun 7-də Tiflis şəhərində Ümumdünya Gömrük Təşkilatının (ÜGT) İnformasiya Texnologiyaları üzrə konfransı və sərgisində iştirak edən Dövlət Gömrük Komitəsinin sədri, gömrük xidməti general-polkovniki Aydın Əliyev Beynəlxalq Avtomobil Nəqliyyatı İttifaqının (İRU) Baş katibii Umberto de Pretto ilə görüşüb.
Görüş zamanı Aydın Əliyev Umberto de Prettonu Baş katib seçilməsi münasibətilə təbrik edib və Azərbaycanla İRU arasındakı uzunmüddətli əlaqələrdən bəhs edib.
Beynəlxalq Avtomobil Nəqliyyatı İttifaqının (İRU) Baş katibi Umberto de Pretto təbrikə görə təşəkkürünü bildirib və görüşdən duyduğu məmnunluğu ifadə edib. Baş katib elektron məlumat mübadiləsi məqsədilə tətbiq edilən e-TİR və e-SMR layihələrindən bəhs edib və bu layihələrin artıq İran və Türkiyədə uğurla reallaşdırıldığını vurğulayıb. Umberto de Pretto adıçəkilən layihələr çərçivəsində Azərbaycanla əməkdaşlıq etməkdən məmnunluq duyacaqlarını bildirib.
e-TİR və e-SMR layihələrinə qoşulmaq barədə verilən təklifi müsbət dəyərləndirən DGK sədri Aydın Əliyev Prezident İlham Əliyevin qeyri-neft sektorunun inkişafı ilə bağlı respublikada həyata keçirdiyi islahatlar və layihələr barədə ətraflı məlumat verib, ölkə başçısının reallaşdırdığı proqramlar çərçivəsində Azərbaycanın tranzit potensialının artırılması, ölkəmiz vasitəsilə tranzit daşımaların asan və maneəsiz həyata keçirilməsi istiqamətində mühüm addımlar atıldığını bildirib.
Daha sonra görüşdə qarşılıqlı maraq doğuran məsələlər müzakirə olunub və Dövlət Gömrük Komitəsinin sədri Aydın Əliyev Beynəlxalq Avtomobil Nəqliyyatı İttifaqının (İRU) Baş katibi Umberto de Prettonu ölkəmizə rəsmi səfərə dəvət edib.
Məlumat "Bakı-Xəbər"ə DGK mətbuat xidmətindən daxil olub.
