"AtaBank" - Oruc İbrahimov: "Müştəri kreditin bitməsi haqqında arayış istəsə, o zaman ona həmin arayış verilir"
"Unibank": "Kreditin bağlanması ilə bağlı arayış almaq müştərinin öz istəyindən asılıdır"
Rəşad Həsənov: "Krediti tam ödəyən şəxsin ödənişin bitməsi haqqında arayış alması məqsədəuyğundur"
Əkrəm Həsənov: "Bank müştərinin sorğusuna cavab verməsə, bu, istehlakçı hüququnun pozulması deməkdir"
Maliyyə sıxıntısı yaşayan şəxs problemini həll etmək üçün banka kredit götürmək üçün müraciət edir. Bankın şərtlərinə uyğun olaraq həmin şəxsə müəyyən məbləğdə kredit verilir. Vətəndaş krediti götürəndə aybaay ödəniş etməlidir. Banka borcunu ödəyib qurtardığını zənn edən şəxs daha sonra banka heç bir ödəniş etmir. Lakin bir müddət keçdikdən sonra həmin şəxsə məlumat gəlir ki, bəs sizin banka hələ də ödənməmiş kredit borcunuz var. Bu kimi hal dəfələrlə qeydə alınıb. Ekspertlər bildirir ki, krediti ödəyib bitirən şəxsə kreditin bitməsi haqqında arayış verilməlidir. Maraqlıdır, banklar belə bir arayış verirmi? Yoxsa vətəndaşlar kreditin bitməsi haqqında arayışın alınmasına ciddi fikir vermir?
"AtaBank" ASC-nin Kommunikasiyalar və PR şöbəsinin rəisi Oruc İbrahimov "Bakı-Xəbər"ə açıqlamasında bildirdi ki, müştəri kreditin bitməsi haqqında arayış istəsə, o zaman ona həmin arayış verilir: "Kreditin bitməsi haqqında arayışın verilməsi könüllüdür. Kim istəsə ona verilir. Bəllidir ki, kredit götürən şəxsə ödəniş cədvəli verilir. Həmin şəxs kredit cədvəlinə uyğun olaraq ödəniş edir. Tam ödəniş olduğu halda, müştəri kreditin tam ödənilməsi haqqında müraciət edərsə, ona kreditin bitməsi haqqında arayış verilir".
"Unibank"dan qəzetimizə verilən məlumata görə, kreditin bağlanması ilə bağlı arayış almaq müştərinin öz istəyindən asılıdır: "Müştəri istəyərsə, bankdan kreditin bağlanmasına dair arayış ala bilər. Arayışın verilməsi üçün xidmət haqqı 10 AZN-dir".
İqtisadçı-ekspert Rəşad Həsənov "Bakı-Xəbər"ə açıqlamasında qeyd etdi ki, kreditin bağlanması haqqında arayış müştəriyə verilməlidir. Ancaq bu məcburi deyil, könüllüdür: "Vətəndaş bank vasitəsilə sonuncu ayın ödənişini etsə, bankdan kreditin bitməsi haqqında arayış ala bilər. Krediti tam ödəyən şəxsin ödənişin bitməsi haqqında arayış alması məqsədəuyğundur".
Bank sahəsi üzrə mütəxəssis Əkrəm Həsənov bizimlə söhbətində bildirdi ki, qanunvericilikdə kreditin bitməsi haqqında arayışın verilməsi nəzərdə tutulmayıb: "Amma vətəndaş banka kreditin ödənilməsi haqqında sorğu verərsə, bank onu cavablandırmalıdır. Bank müştərinin sorğusuna cavab verməsə, bu, istehlakçının hüququnun pozulması deməkdir. Bəzi banklar vətəndaşın sorğusunu cavablandırmaq üçün pul alır. Ancaq bu qanunsuzdur. Qanunvericiliyə əsasən, bank yalnız bank əməliyyatlarından komissiya haqqı ala bilər. Ancaq istənilən sorğu ilə bağlı cavab üçün vətəndaşdan pul tələb olunmamalıdır".
Günel CƏLİLOVA
