Oqtay Haqverdiyev: "Hansısa banka məxsus olan valyutadəyişmə məntəqəsinin valyuta mübadiləsi üçün dolları yoxdursa, onun fəaliyyət göstərməsinə nə lüzum var?
Valyutadəyişmə məntəqələrinin fəaliyyətinin bərpa olunması gündəmə gəlib. Milli Məclisin iclasında millət vəkillərindən biri valyutadəyişmə məntəqələrinin fəaliyyətinin bərpa olunmasını təklif edib: "Bu gün ölkədə "qara bazar" tüğyan edir.
Günlərlə əlimizdəki pulu valyutaya dəyişmək istəyirik, amma tapa bilmirik. Ancaq "qara bazar"da nə qədər istəyirsən, valyuta tapa bilərsən. Ona görə də valyutadəyişmə məntələrinin bərpa edilməsini təklif edirəm. Ümumiyyətlə, başa düşə bilmirəm ki, bu valyutadəyişmə məntəqələri niyə qapadıldı? Axı bununla həm peşəkarlar prosesdən kənarda qaldı, həm də işsizlik yarandı. Valyutadəyişmə məntəqələrinin ləğv edilməsi turizm sektoruna da öz mənfi təsirini göstərir. Odur ki, hökumət vəziyyəti dəyərləndirməli və düzgün qərar verməlidir".
Valyutadəyişmə məntəqələrinin fəaliyyətinin bərpa olunması fikrinə münasibət bildirən iqtisadçı-ekspert Oqtay Haqverdiyev qəzetimizə açıqlamasında qeyd etdi ki, hazırda bu mümkünsüz görünür: "Bəllidir ki, hazırda bank sektoru ağır dönəm yaşayır. Valyutadəyişmə məntəqələri hansısa banka aid idi. Əgər o bankın valyuta mübadiləsi üçün valyutası yoxdursa, onun fəaliyyət göstərməsinə nə lüzum var? Dolları olmayan valyutadəyişmə məntəqəsi necə fəaliyyət göstərəcək?".
Həmsöhbətimiz bildirdi ki, valyutadəyişmə məntəqələrinin bağlanması "qara bazar"ın fəaliyyətinə səbəb oldu: "Exchange"lər normal şəkildə fəaliyyət göstərsəydi, həm ölkə vətəndaşları, həm də xaricdən gələn turistlər üçün normal bir mühit yaranardı. Valyutadəyişmə məntəqələrinin bağlanması çoxlu sayda insanın işsiz qalmasına səbəb oldu".
İqtisadçının fikrincə, bank sektorunda sağlamlaşma qeydə alınarsa, o zaman valyutadəyişmə məntəqələrinin fəaliyyəti yenidən bərpa olunar. Əslində, valyutadəyişmə məntəqələrinin fəaliyyətinin bərpası təklifi təqdirəlayiqdir: "Ümid edək ki, bank sektorunda vəziyyət müsbətə doğru dəyişər. O zaman bankların valyuta mübadiləsi üçün dolları olar".
Günel CƏLİLOVA
