Əkrəm Həsənov: "İstənilən borcun necə istifadə olunmasından çox şey asılıdır"
Bakıda Azərbaycanda investisiyalara dair beynəlxalq konfransda iştirak edən Azərbaycanın iqtisadiyyat naziri Şahin Mustafayev bildirib ki, Azərbaycan islam ölkələri ilə yüksək səviyyədə əməkdaşlıq edir: "İslam İnkişaf Bankı Azərbaycana 1 mlrd. dollar güzəştli şərtlərlə kredit ayırıb. Bu vəsait 18 layihənin icrasına yönəlib və 14 layihə artıq yekunlaşıb".
Ekspertlərin fikrincə, İslam İnkişaf Bankının əməkdaşlıq üçün Azərbaycana 1 milyard dollar həcmində güzəştli şərtlərlə kredit verməsi ölkə iqtisadiyyatına müsbət təsir edəcək.
Bank sahəsi üzrə mütəxəssis, ekspert Əkrəm Həsənov "Bakı-Xəbər"ə açıqlamasında qeyd etdi ki, düzgün idarə olunan istənilən kreditin nəticəsi müsbət olur. Güzəştli şərtlə ayrılan kredit ölkədə hər hansı sahənin inkişafına səbəb olarsa, bu alqışlanmalıdır: "Güzəştli şərtlə kredit götürüb ölkənin hansısa sahəsinə yönləndirmək lazımdır. Kənd təsərrüfatı, İKT və digər sahələrin inkişafına həmin vəsaiti sərf etmək olar. Həmin sahələrdən əldə olunan gəlir hesabına həm kredit geri qaytarılar və həm də ölkə iqtisadiyyatı inkişaf edər".
Həmsöhbətimiz hesab edir ki, bu gün ən sərfəli sahə kənd təsərrüfatıdır: "Bu sahəyə kredit ayrılarsa, həm daxili tələbat təmin olunar, həm də iqtisadiyyata sərfəli olar. Aqrar sahənin inkişafı üçün götürülən kredit geri qaytarılar və ölkə ərzaqla tam şəkildə təmin olunar".
Ə.Həsənov onu da əlavə etdi ki, kredit vəsaitindən necə gəldi istifadə olunarsa, bunun mənfi nəticələri ortaya çıxar. İlk növbədə götürülən kredit geri qaytarıla bilməz: "O krediti dövlət qaytarmalıdır. Güzəştli şərtlərlə olsa belə, biz onu geri qaytarmalıyıq. İstənilən borcun necə istifadə olunmasından çox şey asılıdır".
Günel CƏLİLOVA
