Samir Əliyev: "Zaman keçdikcə, valyuta bazarının vəziyyətindən asılı olaraq, bu limitlərə yenidən baxılacaq və daha da azaldıla bilər"
Xəbər verildiyi kimi, Azərbaycan Mərkəzi Bankının İdarə Heyəti "Azərbaycan Respublikasının rezident və qeyri-rezidentlərinin xarici valyuta əməliyyatlarının aparılması Qaydaları"nı təsdiq edib.
Belə ki, Qaydalara əsasən, bank hesabı açılmadan Azərbaycanın daxilində və Azərbaycandan kənara xarici valyutada pul köçürmələri yalnız rezident və qeyri-rezident fiziki şəxslər tərəfindən aparıla bilər. Rezident və qeyri-rezident hüquqi şəxslər tərəfindən bank hesabı açılmadan xarici valyutada pul köçürməsi əməliyyatlarının aparılmasına yol verilmir.
Rezident və qeyri-rezident fiziki şəxsin xeyrinə bank hesabı açılmadan pul köçürməsi əməliyyatları üzrə daxil olan vəsait bank tərəfindən məhdudiyyət olmadan qəbul edilir və ödənilir. Köçürülmüş xarici valyuta vəsaitləri vəsaiti alana nağd şəkildə verilir və ya onun tapşırığı ilə bank hesabına köçürülür.
Rezident və qeyri-rezident fiziki şəxs Azərbaycandan kənara bank hesabı açmadan xarici valyuta vəsaitlərini bir əməliyyat günü ərzində min ABŞ dolları, ay ərzində isə 10 min ABŞ dolları ekvivalentinədək məbləğdə köçürə bilər.
Sənəd AMB-nin İdarə Heyətinin sədri Elman Rüstəmov tərəfindən imzalanıb və 2016-cı il dekabrın 8-dən etibarən qüvvəyə minib.
Bütövlükdə, pul köçürmələrinə qoyulan məhdudiyyətin əhəmiyyətini ekspertlər necə dəyərləndirir? Məsələyə münasibət bildirən iqtisadçı-ekspert Samir Əliyevin fikrincə, vəziyyətin pisləşməsi hökuməti yenidən məhdudlaşdırıcı addımlar atmağa vadar edir: "Bu qaydanın qəbulunda məqsəd olaraq ölkənin tədiyyə balansında valyuta kəsirinin azaldılması və valyuta nəzarətinin effektivliyinin artırılması göstərilir. Göründüyü kimi, yeni tələblər manata təzyiqi azaltmaq üçün ölkədən kapital axınını məhdudlaşdırmaq məqsədilə qəbul edilib. Əsas diqqətçəkən məqam bank hesabı açmadan xaricə pul köçürmələrinin həcminin ayda 10 min dollar həcmində limitləşdirilməsidir. Əvvəllər limit ancaq gündəlik pul köçürmələrinə (gündəlik 1000 dollar) tətbiq edilirdisə, indi rezident fiziki şəxsin yaxın qohumlarının (ər, arvad, valideynlər, baba, nənə, nəvə, övlad, övladlığa götürülən, qardaş və bacı və s.) köçürmələri qohumluğu təsdiq edən sənədlər əsasında, ay ərzində 10000 (on min) ABŞ dolları ötməyəcək. Halbuki, oxşar limit (illik 10 min dollar) əvvəllər də olub, 2008-ci ildə götürülüb. Vəziyyətin pisləşməsi hökuməti yenidən məhdudlaşdırıcı addımlar atmağa vadar edir. Düşünürəm ki, zaman keçdikcə, valyuta bazarının vəziyyətindən asılı olaraq, bu limitlərə yenidən baxılacaq və daha da azaldıla bilər".
Vidadi ORDAHALLI
