Zakir Əhmədov: "Bu istiqamətdə başlıca addım aparılan maarifləndirmə işləri ilə əlaqədardır"
Əmək və Əhalinin Sosial Müdafiəsi Nazirliyindən verilən məlumata görə, fərdi uçot sistemində qeydiyyata alınmış vətəndaşların sayı 1 dekabr 2016-cı il tarixinə 3 352 983 nəfərə çatıb.
Cari ilin noyabr ayında ƏƏSMN yanında Dövlət Sosial Müdafiə Fondunun fərdi uçot sistemində ötən ilin müvafiq dövrü ilə müqayisədə 31,4 faiz çox, yəni 17 071 nəfərə fərdi şəxsi hesab açılıb. Ümumilikdə, bu ilin yanvar-noyabr aylarında əlavə olaraq 172 829 nəfər fərdi uçot sistemi ilə əhatə olunub.
Sığorta olunanların 20,1 faizi 30 yaşa qədər olan, 25,6 faizi isə 30-40 yaş aralığında olan şəxslərdən ibarətdir. Həmçinin sistemdə fərdi şəxsi hesaba malik şəxslərin 20 faizini 40-50 yaş aralığında, 21 faizini 50-60 yaş aralığında, qalanlarını isə 60 yaşdan yuxarı olan vətəndaşlar təşkil edir. Sığorta-pensiya sisteminin avtomatlaşdırılmış infrastrukturunun qurulması nəticəsində sığorta münasibətləri və pensiya təminatı sahəsində bütün xidmətlər elektron müstəvidə təşkil olunub.
Göründüyü kimi, əvvəlki illərlə müqayisədə fərdi uçot sistemində qeydiyyata alınmış vətəndaşların sayı artıb. Ekspertlər bu artımı nə ilə əlaqələndirir? Məsələyə münasibət bildirən ekspert Zakir Əhmədovun sözlərinə görə, fərdi uçotla bağlı qeydə alınanların sayının artması bir sıra səbəblərlə bağlıdır: "Məsələ ondadır ki, son illər bu sahədə xeyli işlər görülüb. Bununla bağlı qanunvericiliyin təkmilləşdirilməsi, işəgötürənlərin üzərinə müəyyən öhdəliklərin qoyulması qeydə alınanların sayında artıma öz təsirini göstərib. Bu istiqamətdə başlıca addım isə aparılan maarifləndirmə işləri ilə əlaqədardır. Artıq əvvəlki kimi deyil. İşədüzələnlər işlədiyi sahələrdə əmək müqaviləsinin bağlanmasını tələb edir. Yəni əvvəlki kimi deyil ki, işçini müqaviləsiz işlədəsən. İnsanlar fərqindədir ki, müqaviləsiz işləmək gələcəkdə həmin şəxsin pensiya təminatına mənfi təsir göstərəcək. Bu üzdən öz hüquqlarını tələb edirlər. Bütün bunlarla yanaşı, sözügedən sahədə görüləsi işlər var və vətəndaşlar bu sahədə fəal olmalıdır". Vidadi ORDAHALLI
