Aydın Mirzəzadə: "Bunun nəticəsini hər bir Azərbaycan vətəndaşı öz həyatında hiss edəcək"
Məlum olduğu kimi, Prezident İlham Əliyev "Milli iqtisadiyyat və iqtisadiyyatın əsas sektorları üzrə strateji yol xəritələrinin təsdiq edilməsi haqqında" Fərman imzalayıb. Sənəddə qeyri-neft sektorunun davamlı və rəqabətqabiliyyətli inkişafının dövlətin iqtisadi siyasətinin prioritet istiqaməti olduğu qeyd edilir.
Fərmanda son dövrlərdə neft gəlirlərinin kəskin azalmasından, mürəkkəb xarici iqtisadi mühitin ölkənin makroiqtisadi və maliyyə sabitliyinə təsir göstərməsindən bəhs olunur. Qeyd edilir ki, ölkə başçısı 2016-cı ilin martında verdiyi sərəncamla "Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri"ni təsdiqləyib. Həmən sərəncama əsasən yaradılan işçi qrup yerli, xarici ekspertlərin, təcrübəli mütəxəssislərin, məsləhətçi şirkətlərin iştirakı ilə milli iqtisadiyyat və iqtisadiyyatın on bir əsas sektoru üzrə strateji yol xəritələrinin layihələrini hazırlayıb.
Strateji yol xəritələri 2016-2020-ci illərdən ötrü iqtisadi inkişaf strategiyasını, tədbirlər planını, 2025-ci ilədək olan dövr üzrə uzunmüddətli baxışı və 2025-ci ildən sonrakı dövrə hədəf baxışı özündə ehtiva edir.
Fərmanla 12 strateji yol xəritəsi təsdiqlənib. İlk sırada Azərbaycanın milli iqtisadiyyat perspektivi üzrə strateji yol xəritəsi gəlir. Digər strateji yol xəritələri neft, qaz sənayesinin, kənd təsərrüfatı məhsullarının istehsalı və emalı ilə bağlıdır. Bundan başqa, kiçik və orta sahibkarlıq səviyyəsində istehlak mallarının istehsalı da qarşıya əsas məqsəd kimi qoyulub. Habelə ağır sənayenin, maşınqayırmanın, turizm sənayesinin, ticarətin inkişafı, logistika və uyğun qiymətə mənzil təminatı da əsas hədəflərdəndir. Peşə təhsili, təlimi, maliyyə xidmətlərinin, kommunal xidmətlərin, telekommunikasiya və informasiya texnologiyalarının inkişafına dair də strateji yol xəritələri təsdiqlənib.
Bütövlükdə, milli iqtisadiyyat və iqtisadiyyatın əsas sektorları üzrə strateji yol xəritələrinin təsdiq edilməsinin nə kimi faydası olacaq? Sözügedən məsələ ilə bağlı fikirlərini "Bakı-Xəbər"lə bölüşən millət vəkili Aydın Mirzəzadənin sözlərinə görə, bu, qeyri-neft sektorunun inkişafı ilə yanaşı, ölkənin ümumi inkişafına təkan verəcək: "Cənab Prezident daim ölkə qarşısında duran məsələlərin strateji həllinə böyük əhəmiyyət verib. Prezident təkcə bu günün deyil, sabah Azərbaycanın qarşısına çıxacaq məsələlərin həllini daim diqqətində saxlayır. Vaxtaşırı bu və ya digər sahənin, ümumilikdə isə ölkənin inkişafı ilə bağlı proqramların qəbulu artıq bir müsbət praktika halını alıb. Prezidentin son fərmanı da ölkə iqtisadiyyatının inkişafına xidmət edir. Hesab edirəm ki, bu kontekstdə kənd təsərrüfatı, nəqliyyat, turizm, İKT və yüngül sənayenin inkişafına diqqət artırılacaq. O cümlələn iqtisadiyyatın qeyri-neft sektoru ilə bağlı olan digər sahələri inkişaf edəcək. Düşünürəm ki, bundan sonra da qəbul edilən qərarların hamısı yerinə yetiriləcək. Bunun nəticəsini hər bir Azərbaycan vətəndaşı öz həyatında hiss edəcək". Vidadi ORDAHALLI
