Fikrət Yusifov: "Ölkəmiz xarici investisiyalar üçün kifayət qədər münbit bir məkana çevrilib"
Azərbaycan iqtisadiyyatı iki il ərzində 3 faiz artacaq. Dünya Bankı Azərbaycan iqtisadiyyatının iki il ərzində 3 faiz artacağını proqnozlaşdırır.
Bu sözləri noyabrın 22-də videokonfrans zamanı Dünya Bankının Avropa və Mərkəzi Asiya ölkələri üzrə baş iqtisadçısı Hans Timmer deyib. O bildirib: "2016-cı ildə biz Azərbaycanda iqtisadi artımın 3 faiz səviyyəsində azalmasını gözləyirik. Bu səbəbdən 2016-cı il proqnozu ilə növbəti iki il üçün proqnozları nəzərə alsaq, qeyd olunan dövrdə ölkədə iqtisadi artım sıfıra bərabər olacaq".
Dünya Bankının nümayəndəsinin sözlərinə görə, bu proqnozlar dünyadakı iqtisadi böhran və neft qiymətlərinin azalması proseslərini özündə əks etdirir. H.Timmer bu proseslər nəticəsində Azərbaycanın milli gəlirin 25 faizini itirdiyini deyib.
Dünya Bankının baş iqtisadçısının proqnozuna əsasən, yaxın iki il ərzində Azərbaycan iqtisadiyyatı 3 faiz artacaq. 3 faizlik artımı hansı sahələr üzrə gözləmək olar?
İqtisadçı-ekspert Samir Əliyev "Bakı-Xəbər"ə açıqlamasında bildirdi ki, hökumətin əsas prioritet hədəfi qeyri-neft sektorudur: "Artım isə qeyri-neft sektorunun aqrar sahəsində müşahidə oluna bilər. Bəllidir ki, tikinti və sənaye sahəsində artım yüksək səviyyədə deyil. Ancaq kənd təsərrüfatı sahəsində vəziyyət ürəkaçandır. Tütünçülük, çayçılıq və kənd təsərrüfatının digər sahələrinə dövlət tərəfindən xüsusi marağın olması bu yönümdə inkişafa səbəb olur".
Həmsöhbətimiz hesab edir ki, Azərbaycan iqtisadiyyatı üçün 3 faiz artım böyük rəqəmdir.
İqtisadçının sözlərinə görə, ümumdaxili məhsul həm qeyri-neft sektorunun və neftin hesabına formalaşır: "Onu da deyim ki, bu gün sahibkarlar iş qurmaq üçün kredit götürməkdə çətinlik çəkir".
İqtisadçı-ekspert Fikrət Yusifov qəzetimizə açıqlamasında bildirdi ki, Dünya Bankı bu günlərdə biznesə başlamaq və onu inkişaf etdirməyin çox asan olduğu 17 ölkədən ibarət siyahı dərc edib: "Azərbaycan bu siyahıda biznes üçün ən yaxşı ölkələr siyahısına daxil edilib. Bu o deməkdir ki, ölkəmiz xarici investisiyalar üçün kifayət qədər münbit bir məkana çevrilib. Bu gün bütün dünyanı bürümüş və Azərbaycandan da yan keçməmiş iqtisadi böhran şəraitində apardığımız iqtisadi islahatlara belə yüksək qiymət verilməsi o deməkdir ki, yaxın gələcəkdə biz yenidən iqtisadi artım templərinə nail ola biləcəyik. Bəzi iqtisadçılar cari ildə Azərbaycan iqtisadiyyatına investisiya qoyuluşunun azaldığını bildirir. Ancaq rəsmi rəqəmlərdə belə azalmalar qeydə alınmayıb. Bu cür məlumatları yayanlar onu əsaslandırmalıdır. Dövlət Statistika Komitəsinin verdiyi məlumatlarda ötən ilin on ayı ilə bu ilin on ayı arasındakı rəqəmlərdə elə də ciddi fərq yoxdur. Son bir ildə Azərbaycan hökuməti investisiyaların cəlbi ilə bağlı lazım olan bütün addımları atıb. Yoxlamalar dayandırılıb, lisenziyaların verilməsi sadələşdirilib, investorların, sahibkarların şikayətlərinə dərhal baxılması üçün apelyasiya şuraları yaradılıb, investisiyaların və ixracın təşviqi ilə bağlı qaydalar müəyyən olunub. Beynəlxalq maliyyə qurumlarının açıqladığı hesabatlarda xarici və yerli investorlar üçün münbit şərait yaradılması baxımından Azərbaycan 30 ölkə arasına daxil ola bilib. Dünyada baş verən iqtisadi böhran ölkəmizin də iqtisadiyyatına təsirsiz ötüşməyib. Lakin buna baxmayaraq, ölkəmiz rəqabət qabiliyyətinə görə keçən illə müqayisədə bir pillə də irəliləyərək 37-ci yerə layiq görülüb. Bu qiyməti özümüz özümüzə yox, beynəlxalq maliyyə qurumları bizə verir. Bu o deməkdir ki, Azərbaycanda islahatlar davam edir. Bu səbəbdən beynəlxalq maliyyə qurumları Azərbaycan iqtisadiyyatının yaxın illərdə inkişaf templərinə malik olacağını bildirir".
Günel CƏLİLOVA
