Rəsul Cahangirli: "Həmin borclar çoxdan yarandığı üçün elə bir nominal dəyəri yoxdur"
"Biz hökumət qarşısında özəlləşdirilən obyektlərin borc problemləri, onlarda sosial ödənişlər problemləri ilə bağlı məsələlər qaldırmışıq".
Xəbər verildiyi kimi, bunu Əmlak Məsələləri Dövlət Komitəsinin sədri Kərəm Həsənov "RecExpo II - Azərbaycanın Beynəlxalq Daşınmaz Əmlak və İnvestisiya Sərgisi"nin açılış mərasimində jurnalistlərə açıqlamasında deyib: "Bu problemlə bağlı borcların silinməsi və köhnə borcların təmizlənməsi, restruktrizasiya edilməsi ilə bağlı yeni təkliflər vermişik. Bu da özəlləşmədə yeni dövrün başlanmasına işarədir. Özəlləşdirilən obyektlərin köhnə borcları silinə bilər".
Onu da qeyd edək ki, Azərbaycan Prezidenti 2016-cı ildə dövlət əmlakının özəlləşdirilməsinə dair bir neçə dəfə fərman imzalayıb. Məqsəd ölkə iqtisadiyyatının rəqabətliliyinə, geniş sahibkarlıq təbəqəsinin formalaşmasına, habelə iqtisadiyyatda özəl sektorun xüsusi çəkisinin artmasına yardım etməkdir. Ona görə də Nazirlər Kabineti bu prosesi həyata keçirərkən dövlət əmlakının qiyməti bazar dəyəri əsasında formalaşdırılmalıdır. Ancaq müşahidələr göstərir ki, özəlləşdirməyə təqdim olunan bəzi müəssisələr fəaliyyətsizdir və yaxud da illərlə dayanandan sonra işini qismən bərpa edib. Bununla yanaşı, sözügedən müəssisələrin borc problemi də bu istiqamətdə işlərin getməsinə mane olur. Bu baxımdan ekspertlər özəlləşdirməyə çıxarılan müəssisələrin borclarının silinməsi təşəbbüsünə necə yanaşır?
Məsələyə münasibət bildirən ekspert Rəsul Cahangirlinin sözlərinə görə, borcların silinməsi özəlləşdirmənin səmərəliliyinə müsbət təsir edə bilər: "Nəzərə almaq lazımdır ki, həmin borclar ölüdür. Yəni çoxdan yarandığı üçün elə bir nominal dəyəri yoxdur. Zatən, hərraca çıxarılan müəssisələrin alıcı problemi var. Özəlləşdirməyə çıxarılan müəssisələrin bəziləri alıcı tapa bilmir. Bunun də bir sıra obyektiv və subyektiv səbəbləri var. Bir səbəbi bəzi müəssisələrin tələblərə cavab verməməsi ilə əlaqəlidirsə, digər səbəbi mövcud vəziyyətlə bağlıdır. Yəni iqtisadi sahədə müəyyən passivlik hökm sürür və bu da investisiya aktivliyinə mənfi təsir göstərir. Belə olan halda, borcların silinməsi vacibdir. Çünki özəlləşdirməyə çıxarılan müəssisənin böyük həcmdə borcu varsa, sahibkar səhmlərin alınmasında maraqlı olmayacaq. Borclar silinməlidir ki, hərraclarda sərmayədarlar fəal iştirak etsin. Ona görə də maksimum çalışmaq lazımdır ki, bu problemin həlli tezləşsin. Kərəm Həsənovun açıqlamasından belə qənaət hasil oldu ki, yaranan borclar silinəcək".
Vidadi ORDAHALLI
