Zakir Əhmədov: "Sahibkarlar və digər vergi ödəyiciləri çalışacaq ki, vergini vaxtında ödəsin"
Xəbər verildiyi kimi, Vergilər Nazirliyi vergi borcuna görə ölkədən getmə hüququ məhdudlaşdırılmış hüquqi şəxslərin icra orqanları rəhbərlərinin adını açıqlayıb. Nazirlikdən verilən məlumata görə, 22 noyabr tarixinə vergi borcu olduğuna görə 998 müəssisə rəhbərinin ölkədən çıxması qadağan edilib.
Qeyd edək ki, 17 noyabr tarixinə vergi borcu olduğuna görə 739 müəssisə rəhbərinin ölkədən çıxması qadağan edilib.
Ölkədən çıxışına qadağa qoyulan şəxslər arasında 8 xarici vətəndaş da var.
Nazirlik vergi ödəyicilərinin borcunu açıqlamayıb.
Vergi borcuna görə ölkədən getmə hüququ məhdudlaşdırılmış fiziki şəxslərin sayı da artıb. Ən son məlumata görə, vergi borcu olduğuna görə ölkədən çıxışı məhdudlaşdırılan şəxslərin sayı 449-a yüksəlib. Halbuki, 17 noyabr tarixinə açıqlanan siyahıda 420 fiziki şəxsin adı qeyd olunub. Bu müddət ərzində 29 nəfərin də vergi borcu ödənmədiyindən, onların adı siyahıya əlavə olunub.
Artıq neçə vaxtdır Vergilər Nazirliyi vergi borcunu ödəməyənlərə qarşı bu cür müvafiq tədbirlər görür. Müşahidələr göstərir ki, ictimaiyyət nazirliyin bu yöndə gördüyü işləri rəğbətlə qarşılayır.
Maraqlıdır, bəs ekspertlər buna necə yanaşır? Məsələyə münasibət bildirən ekspert Zakir Əhmədov buna müsbət prizmadan yanaşır: "Hesab edirəm ki, Vergilər Nazirliyinin atdığı bu addımlar tamamilə məntiqəuyğundur. Ona görə ki, bunu bir sıra faktorlar şərtləndirir. Məsələ ondadır ki, istənilən ölkədə yığılan vergilər hesabına müavinətlər, pensiyalar, büdcədən maliyyələşən təşkilatların əməkhaqları verilir. O cümlədən, bir sıra sosial layihələr həyata keçirilir. O üzdən, vergi ödəyiciləri üzərinə düşən bu məsuliyyəti dərk etməli və vergi öhdəliklərini vaxtında yerinə yetirməlidir. Bir sıra ölkələrdə vergini ödəməyənlərin xaricə çıxışına məhdudiyyətlər tətbiq olunur. Bu yöndə görülən tədbirləri normal hesab edirəm. Fikrimcə, atılan bu addımlar növbəti illərdə belə halların azalmasına öz müsbət təsirini göstərəcək. Sahibkarlar və digər vergi ödəyiciləri çalışacaq ki, vergini vaxtında ödəsin". Vidadi ORDAHALLI
