Natiq Cəfərli: "Banklar valyutanın istər onlayn, istərsə də nağd şəkildə alışı və satışına rəsmi məzənnənin 4 faizi civarında dəyişiklik edə bilər"
Məlumatlara görə, onlayn valyuta satışında qanunsuzluq qeydə alınır. Eyni bankda olan dollar hesabındakı məbləği manat hesabına köçürmək üçün onlayn valyuta satışı xidmətindən istifadə edən müştərinin pulu azalır.
Mərkəzi Bankın elan etdiyi dolların hazırkı məzənnəsi 1 manat 70 qəpik olsa da, bank tərəfindən bu 1 manat 64 qəpiklə həyata keçirilir. Yəni müştəri hər 100 dollara görə rəsmi məzənnədən 6 manat daha az pul alır. Əslində isə banklar 100 dolları hətta 1.77 manata da dəyişməyə hazırdır.
Onlayn valyuta alışı və ya satışı zamanı qanunsuzluqların qeydə alınması barədə mütəxəssislərin də fikrini öyrəndik.
Bank sahəsi üzrə ekspert Əkrəm Həsənov "Bakı-Xəbər"ə açıqlamasında qeyd etdi ki, onlayn valyuta satışında bankların məzənnəsi Mərkəzi Bankın məzənnəsindən 4 faiz fərqlənə bilər. 4 faiz fərqlənmə həm aşağı ola bilər, həm də yuxarı: "Yəni banklar hazırkı məzənnə ilə aşağı faizlə 1 manat 64 qəpiklə, yuxarı 4 faizlə isə 1 manat 77 qəpiklə onlayn alış və ya satışı həyata keçirə bilər. Banklar, böyük ehtimalla, 4 faiz fərqlənməni 1.77 ilə deyil, 1.64-lə edəcək. Çünki aşağı faiz onlara sərf edir.
Bu gün bankların ixtiyarı var ki, aşağı məzənnə ilə onlayn alış və ya satışı həyata keçirsin. Elektron valyutadəyişmədə 4 faiz aşağı qiymətlə olunubsa, burda istifadəçinin hüquqları pozulmayıb. İnsanlar bəzən elə anlayır ki, onlayn valyuta satışı qaydası Mərkəzi Bankın məzənnəsi ilə hesablanır. Ancaq bu belə deyil".
İqtisadçı-ekspert Natiq Cəfərli bizimlə söhbətində qeyd etdi ki, banklar valyutanın istər onlayn, istərsə də nağd şəkildə alışı və satışına rəsmi məzənnənin 4 faizi civarında dəyişiklik edə bilər: "Onlayn satış zamanı göstərilən məbləğ məzənnədən artıq və ya aşağıdırsa, o zaman qanun pozuntusu kimi qeydə alına bilər. Qanunda qeyd olunur ki, rəsmi məzənnənin 4 faizi qədər onlayn satış zamanı dəyişilə bilər".
Günel CƏLİLOVA
