Xəyal Məmmədxanlı: "Könüllü sığorta növlərinə lazımi fikir verilsə, sığorta bazarında ciddi irəliləyiş əldə olunar"
Azərbaycanın sığorta bazarı 11 faiz artıb. Sığorta ödənişlərinin məbləğində artım isə 36 faiz olub. Bu ilin yanvar-oktyabr aylarında Azərbaycanda fəaliyyət göstərən 25 sığorta şirkətinin xətti ilə 420 mln. manat həcmində sığorta haqqı toplanıb. Maliyyə Bazarlarına Nəzarət Palatasından "Report"a verilən məlumata görə, bu, ötən ilin eyni dövrü ilə müqayisədə 11 faiz və yaxud 41 mln. manat çoxdur.
Hesabat dövründə sığortaçıların həyata keçirdiyi ödənişlərin məbləği isə 191 mln. manat təşkil edib ki, bu da ötən ilin eyni dövrünə nisbətən 36 % çoxdur.
10 ay ərzində həm könüllü, həm də icbari sığorta növləri üzrə müsbət dinamika müşahidə olunub. Belə ki, könüllü sığorta növləri üzrə daxilolmalar 15 %, ödənişlər isə 38 % artıb. İcbari sığorta növləri üzrə haqlar 4 %, ödənişlər isə 30 % artıb.
Sığorta bazarında yaşanan aktivlik barədə fikir bildirən mütəxəssis Xəyal Məmmədxanlı "Bakı-Xəbər"ə açıqlamasında qeyd etdi ki, artım daha çox icbari sığortada qeydə alınır: "Avtonəqliyyat vasitələri üzrə icbari və peşə xəstəliklərindən sığortada yüksək faiz müşahidə olunur. Bəzi sığorta növlərində isə həm artım, həm də azalma qeydə alınır. Ən çox artım icbari sığortada yaşanır. Çünki burada yeni tənzimlənmə mexanizmi tətbiq olunub. Sığortalanmayan avtomobillərin məcburi şəkildə sığortaya cəlb olunması bu sahəyə öz təsirini göstərir".
Ekspertin sözlərinə görə, sığorta münasibətləri iqtisadiyyatdakı inkişafdan qaynaqlanmalıdır. Vaxtilə inşaat sektorunda sığorta müqavilələrinin sayı çox idi. Son illər inşaatın azalması bu sahədə geriləməyə təsir edir: "Həmçinin, şirkətlərin büdcələrində yaşanan gərginliklər onların tibbi sığorta büdcələrini azaltmalarına səbəb olub. Artıq şirkətlər əvvəlki kimi sığortaya yüksək məbləğdə pul ayıra bilmir. Amma icbari sığortada vəziyyət fərqlidir. Çünki bu sahəyə ciddi nəzarət var. Nəzarət ciddi olduğu üçün insanlar məcburi şəkildə avtomobilini sığorta etdirir. Məcburi olmayan sahələrdən isə insanlar yayınır".
Həmsöhbətimiz təəssüf hissilə qeyd etdi ki, bəzi sığorta növlərində artım hələ də qeydə alınmayıb: "Məsələn, kənd təsərrüfatı risqlərinin sığortasında artım gözləsək də, hələ də bir yenilik yoxdur. Həmçinin, fərdi tibbi sığorta proqramlarında vəziyyət ürəkaçan deyil. Bu tip məsələlərdə də sığorta bazarı olduğu kimi qalır. İcbari sığortanın hesabına sığorta bazarında artım qeydə alınır. Ancaq bu da çıxış yolu deyil. Könüllü sığorta növlərinə lazımi fikir verilsə, sığorta bazarında ciddi irəliləyiş əldə olunar. Belə olan halda, insanların sığorta haqqında fikri də dəyişər.
İstənilən halda, sığorta bazarında artımın qeydə alınması sevindiricidir. İlin nəticələrini səbrsizliklə gözləyirik. Bu elə bir sahədir ki, hər ay dəyişiklik yaşana bilər. Əsas rəqəm deyil, keyfiyyətin yaxşı olmasıdır".
Günel CƏLİLOVA
