Pərviz Heydərov: "İqtisadi qurumların, o cümlədən dövlətin istiqrazlar buraxmaq yolu ilə müvafiq borc öhdəliklərinə girməsi müəyyən iqtisadi şəraitlər daxilində təqdirəlayiq haldır"
Azərbaycanda ipoteka kreditləşməsi bərpa olunacaq. "Azərbaycan İpoteka Fondu" ASC-nin (AİF) yeni istiqraz emissiyası ilə cəlb edəcəyi 50 milyon manat vəsait gələn həftədən Fondun müvəkkil bankları arasında bölüşdürüləcək.
Bununla da Azərbaycanda dövlət xətti ilə ipoteka kreditləşməsi bərpa olunacaq.
Xatırladaq ki, Maliyyə Bazarlarına Nəzarət Palatasının qeydə aldığı yeni emissiyanın prospektinə əsasən, dövriyyəyə hər birinin nominal dəyəri 1000 manat olan 50 min ədəd sənədsiz, faizli, təmin edilmiş ipoteka istiqrazlarının buraxılması nəzərdə tutulub.
"Azərbaycan İpoteka Fondu" ASC-nin dövriyyəyə buraxacağı yeni istiqrazların ipoteka kreditləşməsinə nə kimi təsirləri olacaq?
İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov "Bakı-Xəbər"ə açıqlamasında qeyd etdi ki, istiqrazlar qiymətli kağızdır: "İstiqrazların buraxılmasında məqsəd dövriyyədən nağd pul vəsaitlərini cəlb etməkdir. Müxtəlif iqtisadi qurumların, o cümlədən dövlətin istiqrazlar buraxmaq yolu ilə müvafiq borc öhdəliklərinə girməsi müəyyən iqtisadi şəraitlər daxilində zəruri və həm də təqdirəlayiq haldır. Məsələn, məlum olduğu kimi, cari ildə Maliyyə Nazirliyi, o cümlədən Dövlət Neft Şirkəti də bu vasitəyə əl atdı. Və hər birinin də öz missiyası var idi. Bilavasitə Neft Şirkətinin istiqraz əməliyyatlarına böyük maraq qeydə alındı".
İpoteka Fonduna gəldikdə isə, həmsöhbətimiz bildirdi ki, keçən il hökumət tikinti sektorunda canlanma yaratmaq məqsədilə bu sahədə müvafiq tədbirlər həyata keçirmək istəyirdi: "Artıq bir sıra tədbirlər həyata keçirilib. Hazırda bunlar davam etdirilməkdədir. Lakin iqtisadi xarakterli istənilən fəaliyyətdə məsələ sonda, istər-istəməz, maliyyəyə dayanır. Bunsuz tikinti sektorunda müvafiq canlanma yaratmaq heç cür mümkün deyil. Məlumdur ki, dövlət onsuz da sözügedən Fonda pul ayırır. Lakin bu, tikinti sektorunda aktivlik yaratmaq üçün yetərli deyil və ola da bilməz. Əlavə maliyyə mənbələrinə ehtiyac var. Bu nöqteyi-nəzərdən istiqrazlar ən effektli vasitədir".
P.Heydərov hesab edir ki, ölkədə istiqraz əməliyyatlarına böyük ehtiyac duyan subyektlərdən biri də məhz elə İpoteka Fondudur: "Bu sahədə mövcud mexanizm effektiv fəaliyyət göstərsə, AİF-in istiqrazları kifayət qədər cəlbedicilik qazana bilər. Bu da sonda ölkədə daşınmaz əmlak bazarını canlandırmaqla tikinti sektorunda inkişaf yaradar".
Günel CƏLİLOVA
