Zakir Əhmədov: "Ola bilsin ki, gələn il bəzi xidmətlər özəlləşdirilsin"
Azərbaycanda mənzil-kommunal xidmətlər üzrə dispetçer mərkəzləri yaradılacaq. Bu, Azərbaycan Respublikasının 2017-ci il dövlət büdcəsi zərfində öz əksini tapıb. 2017-2020-ci illər üzrə sosial-iqtisadi inkişafın ortamüddətli prioritetlərinə mənzil-kommunal təsərrüfatı sahələrində göstərilən xidmətlərin təkmilləşdirilməsi və keyfiyyətinin daha da yüksəldilməsi üçün tədbirlərin görülməsi də daxildir.
Bundan başqa, ortamüddətli prioritet kimi mənzil-kommunal təsərrüfatı sahəsində istehlakçıların hüquqlarının müdafiəsi sisteminin təkmilləşdirilməsi nəzərdə tutulur.
Qeyd edək ki, kommunal xidmtlərə içməli su, tullantı suları, enerji, qaz, mənzil haqqı, lift, zibil pulu daxildir.
Mənzil-kommunal xidmətlər üzrə dispetçer mərkəzlərinin yaradılmasını ekspertlər necə dəyərləndirir? Məsələyə münasibət bildirən ekspert Zakir Əhmədovun sözlərinə görə, görülən tədbirlər bu sahədə təkmilləşdirməyə xidmət edir: "Ola bilsin ki, gələn il Azərbaycanın kommunal sektorunda aparılan islahatlar çərçivəsində bəzi xidmətlər özəlləşdirilsin. Bu sahədə əsas problemlər özünümaliyyələşdirmə, özünüidarəetmə və struktur dəyişiklikləri ilə bağlıdır. Çünki indi dövlətin imkanları, vəsaitləri var və onlara çox böyük vəsaitlər verilir. Amma bu həmişə davam edə bilməz. Hesab edirəm ki, onlar artıq özünümaliyyələşdirmə, özünüidarəetmə və özünüinkişaf prosesinə keçməlidir. Bu sahədə islahatlar mütləq lazımdır və görünən odur ki, islahatlar qaçılmazdır. Mənzil-kommunal xidmətlər üzrə dispetçer mərkəzlərinin yaradılması da bunun tərkib hissəsidir. İslahatlar və struktur dəyişiklikləri nəticəsində isə bəzi sahələr özəlləşdirilə bilər. Məsələn, lift təsərrüfatı. Prinsipcə, hamısı özəlləşdirilə bilər, yəni orada heç bir məhdudiyyət yoxdur ki, hansısa sahəni özəlləşdirmək olmaz. Ancaq planlı şəkildə, hissə-hissə özəlləşdirməyə getmək lazımdır. Yaxşı olar ki, əvvəlcə pilot layihələr həyata keçirilsin. Pilot layihələr özünü doğruldarsa, ardınca mərhələ-mərhələ tam özəlləşməyə keçmək lazımdır. Çünki sözügedən kommunal xidmətlər birdən-birə özəlləşdirməyə verilsə, sonra bu sahələrdə vəziyyət daha da pisləşər".
Vidadi ORDAHALLI
