Bakının ting bazarlarında 2 əsr yaşı olan 100 000 manatlıq ağac...

Tarix: 21.05.2016 / 02:16
Bölmə: İqtisadiyyat

Yaz mövsümü ağac əkmək vaxtıdır. Ona görə də bu mövsümdə bazarlarda ting satışında canlanma müşahidə olunur. Ağacların qiymətləri də növlərindən asılı olaraq dəyişir. Bu fəsildə ting bazarında alıcıların sayında artım müşahidə olunur. Ağac tinglərinin alıcıları da müxtəlif olur. Kimisi meyvə, kimisi isə ekzotik ağaclara üstünlük verir.
Etiraf edək ki, meyvə ağaclarının satış qiyməti ekzotik ağaclara nisbətən ucuzdur.
Bazara çıxarılan tinglər həm yerli olur, həm də xaricdən gətirilir. Apardığımız araşdırma zamanı məlum oldu ki, əsasən İtaliya və Türkiyədən ağaclar gətirilir. Bu ölkələrdən gətirilən ağacların qiyməti yaşından və yarpaqların rəngindən, ölçüsündən və bəzəyinə görə fərqlənir.
Qeyd edək ki, Azərbaycan iqliminə yalnız Türkiyə və İtaliyada yetişdirilən dekorativ ağaclar uyğun olduğu üçün məhz bu ölkələrdən tinglər gətirilir. İrandan da tinglər gətirilir. Bu ölkənin tinglərinin satış qiyməti digər ölkələrlə müqayisədə ucuzdur. Səbəb isə İran ağaclarının Azərbaycanda cəmi 2-3 il yaşamasıdır. Çünki İran ağacları Azərbaycan iqliminə uyğunlaşmır.
Bazarda xarici ölkələrin ağacları ilə yanaşı, yerli istehsal olan tinglər də satılır. Bu tinglər əsasən Lənkəran, Bərdə, Tərtər və Bakı kəndlərində yetişdirilir. Yerli istehsal olan tinglərin qiyməti 30-100 manat arasında dəyişir.
Ting satışı ilə məşğul olan məkanlara baş çəkdik. İlk olaraq Abşeron bağlarına gedən yolda yerli tinglərin satıldığı məkana daxil olduq. Burada ölçüsü hündür olmayan və yerli istehsal olan tinglər satılır. Satıcı Amil adlı şəxs bizimlə söhbətində bildirdi ki, ağacların qiyməti müxtəlif olur. Hazırda tələbat meyvə ağaclarınadır. Meyvə ağacları ilə yanaşı, bəzək ağacları da alanlar az deyil: "Elə bəzək ağacları var ki, bizdə də onun tingləri yetişdirilir. Biz həmin tingləri satışa çıxarırıq. Məsələn, "toppinq" ağacının tinginin satış qiyməti 50 manatdır. Bu tingi biz Lənkərandan gətizdiririk. Amma adıçəkilən ağacın əsl vətəni isti ölkələrdir. Həmçinin, "piramidalı limon yolkası"nın əsl vətəni İtaliya sayılır. Amma bağçılıqla məşğul olanlar bu gün "piramidalı limon yolkası"nı yetişdirir. Azərbaycanda yetişdirilən adıçəkilən tingin satış qiyməti 80 manatdır".
Həmin məkanda kənardan gülə bənzəyən ağac da satılırdı. Həmin ağacın adını soruşanda Amil onun "Lampuçka gülü" ağacı olduğunu dedi. Bu ağacın yarpaqlarından qırmızı rəngli laləyə bənzər gül sallanırdı. Bunun satış qiyməti 75 manatdır. "Lampuçka gülü" Lənkəranda yetişdirilir.
Satıcı bildirdi ki, son illər alıcılar daha çox ekzotik ağaclara üstünlük verir.
Binəqədi yolunda ağac tinglərinin satışı ilə məşğul olan
Eldar bizimlə söhbətində bildirdi ki, bu il tinglərin qiyməti əvvəlki illərlə müqayisədə artıb: "İstənilən növ ağac satışı ilə məşğul oluruq. Hətta meyvəsi üstündə ağac tingi də satırıq. Meyvəsi üstündə limon ağacını alıb aparıb otaq şəraitində saxlamaq olar".
O, tinglərin qiyməti barəsində qeyd etdi ki, bazarda bahalı ağaclar da mövcuddur: "Hazırda bahalı ağaclar sırasında palma öndə gedir. Palma ağacının tinginin qiyməti 2-3 min dollar arasında dəyişir. 1 illik palma ağacı 2-3 min dollaradır. Ən yaxşı palma Uqanda və Tanzaniyada bitir. Bizdə satışda olmur, amma sifariş veriləndə gətiririk. Burada gördüyünüz ağaclar müxtəlif qiymətədir:
Qızılgül - 2 manat;
Şam ağacı - 1,5 - 2 manat;
Eldar şamı - 7-10 manat;
Piramida yolka - 3 manat;
Limonlu yolka - 25 manat;
Palma - 40-100 manat (qiymətin dəyişməsi tingin böyüklüyündən asılıdır);
Meyvə ağacları - 3 manatdan 10 manatadək,
Tut - 4-5 manat;
Armud - 3-4 manat;
Üzüm - 2-6 manat;
Nar, alma, heyva - 3-5 manat".
Satıcının dediyinə görə, ağac tingləri əsasən Azərbaycanın 3 bölgəsindən gətirilir: "Tinglər əsasən Tərtər, Bərdə və Lənkərandan gətirilir. Tərtər və Bərdədən meyvə ağacları və gül şitilləri, Lənkərandan isə yolka, şam, limon və subtropik meyvə ağacları gətirilir".
Zabrat yolunda ting satışı ilə məşğul olan Elsəvər Ağayev bizə maraqlı dekorativ ağacları təqdim etdi. Həmin ağacların satış qiyməti isə 3000-5000 arasında dəyişir.
E.Ağayev bizimlə söhbətində bildirdi ki, onun satışı ilə məşğul olduğu tinglər əsasən İtaliya və Türkiyədən gətirilir: "Ağac tinglərini adətən İtaliyadan alırıq. Çünki onlar başqa qitələrdən Avropaya gətirilərkən bir müddət İtaliyada adaptasiya olunur. İtaliyanın müəyyən bir ərazisi var ki, bizim Bakının iqliminə uyğundur.
Hollandiyadan isə satılmaq üçün güllür gətirilir. Azərbaycan iqliminə İtaliya və Türkiyədə yetişdirilən ağaclar uyğunlaşır. İsti ölkələrin tingləri bizdə yalnız bir neçə il yaşaya bilir, sonra onun yarpaqları solaraq məhv olur.
İtaliya istehsalı olan tinglərin qiyməti Türkiyəyə nisbətən daha bahadır. Çünki yol məsafəsi uzun olduğu üçün qiymət baha başa gəlir. Həmçinin, İtaliyada yetişdirilən elə sort ağaclar var ki, onlar həm yaşına, həm dizaynına görə fərqlənir. Məsələn, İtaliyada yetişdirilən "Olivie" ağacının qiyməti yaşına görə dəyişir. İki əsr yaşı olan bu ağacın satış qiyməti 100 000 dollardır. Haqqında danışdığım ağac bir neçə əsr yaşaya bilər. İtaliyada bu ağacın 3 əsrlik olanı var və onun satış qiyməti 150 000 dollardır".
Satıcı digər ekzotik ağaclarla da bizi tanış etdi.
"Pixta" adlı ağacın da İtaliyadan gətirildiyini dedi və bu tingin satış qiyməti 3000 manatdır.
Türkiyədə yetişdirilən "Ebenyus" ağacının tinginin qiyməti 50-650 manat arasında dəyişir. Ağacın hündürlüyü, yaşı qiymətə təsir göstərir.
Həmsöhbətimiz satış qiyməti 10 000 manat olan xurma ağacı barədə də bizə məlumat verdi. O dedi ki, bu ağac ilk görünüşdən palmaya bənzəyir, lakin əslində xurma ağacıdır: "Bu ağacın qiyməti 10 000 manatdır".
Bəzəkli ağaclar arasında "Yaşıl eleksis" də var. Bu ağac tinginin qiyməti 800-1000 manat arasındadır. Yarpağı sarı rəngdə olan eleksisin qiyməti 800, yaşıl rəngdə olanın isə 1000 manat dəyərindədir.
"Komeliya" adlı İtaliyada yetişdirilən ağacın satış qiyməti 3200 manatdır. "Limonlu yolka" da İtaliyadan gətirilib. Bu ting 2000 manata satılır.
"İliks" adlı ting 2500 manata satılır. Ağacın təxminən 10 yaşı var və ildə 3 santimetr böyüyür. Buradakı dəfnə ağacı isə İtaliyadan gətirilib və calaq olanın qiyməti 180 manatdır. Calaq olmayan isə 250 manata satılır. İtaliyadan gətirilən kokos ağacı isə 260 manata satılır. "Drasena" isə nisbətən ucuz - 60 manatadır.
Həmsöhbətimizin dediyinə görə, bahalı ekzotik ağaclar son bir il ərzində alınmır: "Yəqin ki, bunun səbəbi devalvasiya ilə bağlıdır. Son bir il ərzində bahalı ağacları alan yoxdur. Hər kəs gəlib qiymətini soruşur, ancaq almır. Devalvasiya tinglərin qiymətinə təsir etməyib. Çünki burada gördüyünüz bütün mallar devalvasiyadan əvvəl gətirildiyi üçün qiyməti qaldırmamışıq. Amma gələcəkdə yeni tinglər gətirsək, təbii ki, bu, qiymətə təsir edəcək. Bəllidir ki, biz ağacları xarici ölkələrdən gətiririk. Həm gömrük xərcləri, həm də alış dollarla olduğu üçün bizə baha başa gələcək. Bu səbəbdən də biz qiyməti qaldırmaq məcburiyyətində qalacağıq".
E.Ağayev bizimlə söhbətində bildirdi ki, burada İtaliya və Türkiyədə yetişdirilən tinglərlə yanaşı, yerli ağaclar da satılır: "Bəzək ağaclarından "Ebenyus" bizdə də yetişir. Bir az öncə sizə Türkiyədə yetişdirilən "Ebenyus" haqqında məlumat vermişdim. Amma onu da deyim ki, "Ebenyus" bizdə də yetişir. Lakin Türkiyədə yetişdirilən ağacdan fərqli olaraq bizdə yetişdirilən tingin qiyməti 6 manatdır".
O bizə meyvə tinglərinin də satıldığını dedi. Meyvə tinglərinin qiyməti 5-10 manat arasında dəyişir.
Burada ağac tingləri ilə yanaşı, gözoxşayan gözəl güllər də satılırdı. Güllər əsasən Hollandiyadan gətirilir. Yerli istehsal olan güllər də var. Əhali ağaclara nisbətən daha çox gül alışına üstünlük verir. Sonda qeyd edək ki, bağ salmaq, ağac əkmək, ətrafı yaşıllıq aləminə qərq etmək ata-babalarımızın adəti olub. Ağaclar bolluq, sağlamlıq, təmizlik nişanəsi hesab edilir. Atalar nahaq yerə deməyib: "Əkiblər yeyirik, əkərik yeyərlər". Gəlin bu nəsihətə əməl edək, ağac əkək. Əkməsək belə, olanları qoruyaq.
Günel CƏLİLOVA

DİGƏR XƏBƏRLƏR

Tarix: 23.10.2026 / 16:05

Azərbaycanda islam maliyyəçiliyi nə deməkdir?..

Tarix: 23.10.2026 / 10:37

Sosial ödənişlərin artırılması üçün altıncı sosial islahat paketi hazırlanır...

Tarix: 23.10.2026 / 09:57

Gələn il şəhər və rayonlara dotasiya ayrılmayacaq - xərclərini öz gəlirləri hesabına ödəyəcəklər...

Tarix: 23.10.2026 / 09:26

Gələn ilin büdcəsi layihəsi Milli Məclisdə - gəlirlər və xərclər açıqlandı...

Tarix: 22.10.2026 / 19:54

Orta Dəhliz Avropa ilə Asiya arasında ən təhlükəsiz marşrut seçildi...

Tarix: 22.10.2026 / 19:30

Azərbaycanda şirin su ilə bağlı vəziyyət pisləşir - ümid Xəzərə qalıb…

Tarix: 22.10.2026 / 10:36

Sabahdan vint, bolt və qaykaların ixrac tarifi 20 DƏFƏ ARTIRILIR...

Tarix: 21.10.2026 / 17:06

Azərbaycan daha bir rekord vurdu - "tranzitlərin rekordu"...

Tarix: 21.10.2026 / 16:50

Neft Fondumuzun çox valyuta qazanmasına mane olan tək səbəb var...

Tarix: 21.10.2026 / 13:35

Azərbaycanda yeni bank yaradıla bilər - Aİ-dən TƏKLİF...

Tarix: 21.10.2026 / 10:23

Avropalı investorların Qarabağ, Şərqi Zəngəzur və Naxçıvana marağı artır - Aİ hesabatı

Tarix: 20.10.2026 / 22:07

Taxıl bazarında kəskin təzad: kəndlilər buğda əkinindən imtina edir...

VİDEO

Tarix: 17.10.2026 / 17:10

Aydın Quliyev Mətbuat Şurasında seçkilərə qatılmamasının səbəblərini qurultayda açdı... - VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 22.10.2026 / 19:54

Orta Dəhliz Avropa ilə Asiya arasında ən təhlükəsiz marşrut seçildi...

Tarix: 22.10.2026 / 19:30

Azərbaycanda şirin su ilə bağlı vəziyyət pisləşir - ümid Xəzərə qalıb…

Tarix: 22.10.2026 / 16:56

15 temmuz “FETÖ darbesində” bircə nəfər siyasətçi-deputatın adı çıxmadı...

Milli kimliyə bağlı gənclər uğurlu gələcəyin əsas təminatçılarıdır...