Dövlət başçısının gördüyü operativ tədbirlər sayəsində Azərbaycan xarici iqtisadi amillərin mənfi nəticələrini zərərsizləşdirə bildi. Trend-in məlumatına görə, bunu maliyyə naziri Samir Şərifov Məclisin İqtisadi siyasət, sənaye və sahibkarlıq komitəsinin iclasında "Azərbaycan Respublikasının 2015-ci il dövlət büdcəsinin icrası haqqında" qanun layihəsinin müzakirəsində deyib.
Onun sözlərinə görə, qlobal iqtisadi proseslər, regionda geosiyasi gərginliyin artması və xarici iqtisadi mühitin pisləşməsi Azərbaycanın iqtisadi inkişafı üçün izsiz ötüşməyib: "Bu, ölkə iqtisadiyyatının artım templərinin azalmasına, valyuta gəlirlərinin kəskin azalmasına və tədiyə balansının faktiki olaraq sıfıra düşməsinə gətirib çıxarıb".
S.Şərifov əlavə edib ki, buna baxmayaraq, dövlət büdcəsinin icrasına dair bütün öhdəlikləri yerinə yetirmək mümkün olub.
S.Şərifov deyib ki, 2016-cı ilin dövlət büdcəsinə yenidən baxılmayacaq. Nazir bildirib ki, 2016-cı ilin fevralında dövlət büdcəsinə düzəlişlər edilib, dövlət və icmal büdcənin gəlirlərinin hesablanması üçün neftin baza qiyməti 25 dollardan götürülüb: "Transfertlərin həcmi isə manatla göstərilib. Buna görə də neftin qiymətinin artması və ya azalması Dövlət Neft Fondundan transfertlərə təsir etmir. Sözsüz ki, hazırda neftin qiyməti dövlət büdcəsində nəzərdə tutulandan yüksək olduğundan Dövlət Neft Fondunun gəlirləri artır. Bu, müsbət haldır. Dövlət Neft Fondunun gəlirlərinin artması bilavasitə dövlət gəlirlərinin artmasına təsir etmir. Transfertlərin həcminin artırılmasına ehtiyac görmürük. Hesab edirik ki, Dövlət Neft Fondunda valyuta ehtiyatlarının artması davam etməlidir. Çünki bu, bizim üçün vacib strateji ehtiyat mənbəyidir. Ötən ilin təcrübəsi, valyuta bazarında təlatümlər, məzənnəyə təzyiqlər, Mərkəzi Bankın valyuta ehtiyatlarının kəskin surətdə enməsi dövlət maliyyə qurumlarının daxıllarında kifayət qədər valyuta ehtiyatları toplanmasını zəruri edir. Biz bunu nəzərə alaraq, biz çox qənaətcil büdcə siyasəti həyata keçirməliyik. Son 3 il ərzində biz dövlət yığcamlaşdırılması siyasətini həyata keçirik".
Hesablama Palatası "Büdcə sistemi haqqında" qanuna yenidən baxılmasını məqsədəuyğun hesab edir. Bunu isə Hesablama Palatasının sədri Vüqar Gülməmmədov deyib.
Onun sözlərinə görə, qanunun təkmilləşdirilməsi maliyyə nəzarətini gücləndirmək və şəffaflığı artırmaq üçün lazımdır.
