Aydın Mirzəzadə: “Bunun üçün komandanın əzmkarlığı, onu dəstəkləyən azarkeşləri və gələcəyə çox cəsarətli iddiaları var”
Məlum olduğu kimi, avqustun 23-də "Qarabağ" futbol klubu qələbə qazanaraq adını UEFA Çempionlar Liqasının qrup mərhələsinə yazdırıb. Üç gündür Azərbaycan bu sevinci yaşayır.
Məlumat üçün qeyd edək ki, "Qarabağ" Çempionlar Liqasının pley-off mərhələsinin cavab oyunları çərçivəsində səfərdə Danimarkanın "Kopenhagen" klubu ilə qarşılaşıb. Məğlub olmasına baxmayaraq, adını UEFA Çempionlar Liqasının qrup mərhələsinə yazdırıb. Bu, Azərbaycanın futbol tarixində böyük uğurdur. O üzdən bunun önəmi böyükdür.
Bu arada Çempionlar Liqasının qrup mərhələsinin püşkatması keçirilib. Püşkatmada 32 komanda yer alıb. 22 komanda qruplara birbaşa vəsiqə əldə edib. 10 komanda isə turnirə pley-off mərhələsini adladıqdan sonra qoşulub. Komandalar 4 səbətə bölünəcək və 8 qrup müəyyənləşəcək. Bir komanda öz səbətində yer alan və öz ölkəsini təmsil edən klubla qarşılaşa bilməz. Qrup oyunlarının ilk turu 12-13 sentyabr tarixlərində keçiriləcək. “Qarabağ” püşkatmada 4-cü səbətdə yer alıb. Komandamız C qrupunda "Çelsi", "Atletiko" və "Roma" klubları ilə mübarizə aparacaq.
Göründüyü kimi, “Qarabağ” futbol klubu dünyada tanınmış futbol komandaları ilə yarışacaq. Dünyanın ən tanınmış, bahalı futbol komandaları ilə yarışmaq perspektivdə “Qarabağ” klubu üçün nə vəd edir? Ümumilikdə gələcəkdə də “Qarabağ” klubu həmin futbol komandaları ilə yarışa biləcəkmi?
Məsələyə münasibət bildirən millət vəkili Aydın Mirzəzadə bunu istisna etmədi: “Məsələ ondadır ki, dünyada bütün tanınmış komandalar eyni inkişaf xəttini keçirlər. Futbol komandası yaranır, formalaşır, komandanı yaxşı menecerlər idarə edirlər və sonra isə artıq beynəlxalq yarışlara qatılıb tədricən öz peşəkarlıqlarını artırırlar. O baxımdan hesab edirəm ki, “Qarabağ” komandası da məhz bu yolu keçir və uğurla Avropanın ən nüfuzlu 32 komandası sırasına öz adını yaza bildi. Düşdüyü qrupda tanınmış futbol komandalarının olması bu gün nə “Qarabağ” komandasını, nə də onun azarkeşlərini qətiyyən qorxutmur. Çünki “Qarabağ” futbolçularının əksəriyyəti gəncdir, təcrübələrini daim artırırlar. Onlar üçün artıq nüfuzlu, nüfuzsuz komanda anlayışı yoxdur. Hesab edirəm ki, “Qarabağ” 3 komanda ilə oynamaqla, əlavə təcrübə toplaya biləcək. Nəzərə almaq lazımdır ki, komandaya yeni transferlərin aparılması ilə bağlı iş aparılır. Bu o deməkdir ki, növbəti oyunlarda daha təcrübəli və özünü bu cinahda göstərmiş oyunçularla möhkəmləndirə biləcək. Mən komandamızın uğuruna inanıram. “Qarabağ” klubu azarkeşlərini yaxşı mənada təəccübləndirə biləcək. Bunun üçün komandanın əzmkarlığı, onu dəstəkləyən azarkeşləri var və gələcəyə çox cəsarətli iddiaları var. Azərbaycan futbolu bunun öhdəsindən gələcək”.
Vidadi ORDAHALLI
