Elçin Cəfərov: "Digər İslam Oyunlarından fərqli olaraq, bu il 57 müsəlman ölkəsi bu yarışda iştirak edəcək, bu isə ölkəmizin uğuru deməkdir"
Elçin Səfərov: "Bizim qonaqlara hazırladığımız mədəni-kütləvi tədbirlər "Bakı-2017"ni öncəki İslam Həmrəyliyi Oyunlarından fərqləndirir" Elxan Qarayev: "Fərqi bir neçə sahədə hiss etmək olur"
Bu gün Bakı möhtəşəm bir tədbirə ev sahibliyi edəcək. Hər kəsin səbrsizliklə gözlədiyi IV İslam Həmrəyliyi Oyunları paytaxt Bakıda keçiriləcək. Nəinki müsəlman ölkələrinin, bütün dünyanın diqqəti uzun müddətdir Azərbaycana yönəlib. Bu möhtəşəm idman yarışında iştirak İslam dünyası üçün əvəzsiz əhəmiyyətə malikdir.
Qeyd edək ki, İslam Həmrəyliyi Oyunlarının tarixi digər böyük idman yarışlarının tarixi qədər qədim deyil. Bu Oyunlar hələ çox gəncdir, ilk dəfə 2005-ci ildə Səudiyyə Ərəbistanında keçirilib.
Adından da göründüyü kimi, bu, həmrəylik oyunlarıdır və tədbir çərçivəsində keçirilən yarışlarda İslam Konfransı Təşkilatının üzvü olan 57 ölkə iştirak edir.
Bu idman yarışı həmrəylik məqsədi daşısa da, onun keçirilməsi üçün fikir birliyinə, ümumi razılığa gəlmək heç də həmişə mümkün olmayıb. Belə ki, İkinci İslam Həmrəyliyi Oyunları ümumiyyətlə keçirilməyib. Bu tədbirin 2009-cu ilin oktyabr ayında keçirilməsi planlaşdırılmışdı. Sonra Oyunların keçirilməsi üçün yeni tarix müəyyənləşdirildi. Lakin bu tarix də İkinci Oyunların "üzünə gülmədi". Səbəb isə Fars körfəzinin adı ilə bağlı İran və ərəb ölkələri arasındakı fikir ayrılığı idi.
Üçüncü dəfə İslam Həmrəyliyi Oyunları 2013-cü ildə İndoneziyada keçirildi. Dördüncü Oyunların məkanı isə Azərbaycandır.
Prezident İlham Əliyevin sərəncamı ilə 2017-ci ilin Azərbaycanda "İslam Həmrəyliyi İli" elan edilməsi və İslam Həmrəyliyi Oyunlarının Bakıda keçirilməsi islam həmrəyliyinin möhkəmləndirilməsi sahəsində ölkəmizin növbəti əməli addımıdır.
Maraqlıdır, bu günə kimi keçirilən İslam Həmrəyliyi Oyunları Bakıda keçiriləcək Oyunlardan nə ilə fərqlənir? IV İslam Həmrəyliyi Oyunlarının əsas fərqləndirici cəhəti nədir?
Azərbaycan Güləş Federasiyasının vitse-prezidenti Elçin Cəfərov "Bakı-Xəbər"ə açıqlamasında qeyd etdi ki, Oyunlarda iştirak edəcək komandalar öz ölkələrini təmsil edir. Bu, islam dəyərlərinin gücünü göstərir: "Digər İslam Oyunlarından fərqli olaraq, bu il 57 müsəlman ölkəsi bu yarışda iştirak edəcək. Bu isə ölkəmizin uğuru deməkdir. Azərbaycan bu Oyunlara ev sahibliyi etməklə, İslam aləmində öz nüfuzunu daha da artıracaq".
E.Cəfərovun sözlərinə görə, IV İslam Həmrəyliyi Oyunlarının təşkilatı işləri yüksək səviyyədə həll olunub: "İslam Oyunlarının rəsmi açılışı olacaq. Artıq bir neçə idman növü üzrə yarışa start verilib. Futbol və həndbol oyunları başlayıb".
Həmsöhbətimiz onu da əlavə etdi ki, güləş komandamız yarışa yüksək səviyyədə hazırlanıb: "Bir neçə gündən sonra mübarizəyə ilk olaraq Yunan-roma güləşi üzrə güləşçilərimiz başlayacaq. Daha sonra sərbəst güləşçilərimiz mübarizəyə qoşulacaq. Əminəm ki, güləşçilərimiz Azərbaycanımızı layiqincə təmsil edəcək".
"Bakı-2017" IV İslam Həmrəyliyi Oyunları Əməliyyat Komitəsinin korporativ direktoru Elçin Səfərov bildirdi ki, İslam Oyunlarının beynəlxalq və yerli səfirləri var. Onlar incəsənət və idman aləmində öz sözlərini demiş ulduzlardır: "Bakı-2017" əvvəlki İslam Həmrəyliyi Oyunlarından fərqlənir. Bu fərq ilk növbədə iştirakçı ölkələrin sayına görədir. Belə ki, Bakıda keçiriləcək İslam Həmrəyliyi Oyunlarında 57 ölkə iştirak edəcək. Əvvəlki İslam Həmrəyliyi Oyunlarında bu qədər ölkə iştirak etməyib. İdmançıların sayı, atletlər və jurnalistlərə yaradılan şərait, jurnalistlərlə idmançıların bir sahədə görüşməsi və onlardan rahat müsahibələr alması, bizim qonaqlara hazırladığımız mədəni-kütləvi tədbirlər də "Bakı-2017"ni öncəki İslam Oyunlarından fərqləndirir. Xatırladım ki, "Bakı-2015" I Avropa Oyunlarının Atletlər kəndi ən yaxşı Atletlər kəndi seçilmişdi. "Bakı-2017"nin Atletlər kəndi ondan da yaxşı olacaq".
Qaydasız döyüş üzrə məşqçi Elxan Qarayev bizimlə söhbətində bildirdi ki, IV İslam Həmrəyliyi Oyunları yarışlarının ölkəmizdə keçirilməsi sevindiricidir. Bu yarış digər yarışlardan fərqlənir: "Fərqi bir neçə sahədə hiss etmək olur. İlk öncə İslam ölkələrinin həmrəy olmasını bildirmək lazımdır. Digər İslam Oyunlarından fərqli olaraq, bu il keçirilən yarışa daha çox müsəlman dövlətləri qatılır. 57 ölkənin idmançısı İslam Oyunlarında iştirak edəcək.
Həmçinin, təşkilati işlərin yüksək səviyyədə olması IV İslam Həmrəyliyi Oyunlarını digərlərindən fərqləndirir. Ölkəmizə gələn idmançılara xüsusi qayğı və diqqətin göstərilməsi də Azərbaycanın necə qonaqpərvər bir ölkə olmasını bir daha sübut edir".
Günel CƏLİLOVA
