Vüsal Mirzəyev: "Ağır atletika üzrə fərqlənən ölkələr var"
Mayın 12-də Bakıda növbəti İslam Həmrəyliyi Oyunlarının açılışı olacaq. Müsəlman aləminin ən nüfuzlu idman tədbirində 56 ölkə komandası 20 idman növündə iştirak edəcək və 269 medal uğrunda mübarizə aparacaq.
İslam Həmrəyliyi Oyunları ilk dəfə 2005-ci ildə Səudiyyə Ərəbistanında keçirilib və bundan sonra Oyunların 4 ildən bir keçirilməsinə başlanıb. 2009-cu ilin oktyabrında İranda reallaşması nəzərdə tutulan növbəti Oyunlar 2010-cu ilin aprelinə təxirə salınıb və sonradan ləğv olunub. Sayca üçüncü İslamiada isə 2013-cü ildə İndoneziyada baş tutub. İlk İslam Həmrəyliyi Oyunlarından sonra məlum oldu ki, həqiqətən, bu tədbir İslam ölkələrini çox maraqlandırır.
Oyunlara hazırlıq, demək olar ki, başa çatıb. Avropa Oyunlarında istifadə edilən bütün obyektlərdən İslam Oyunlarında da istifadə olunacaq.
Bu arada mayın 8-də IV İslam Həmrəyliyi Oyunlarının futbol yarışına start verilib. Səkkiz komandanın qatıldığı yarışda ev sahibi Azərbaycanla yanaşı, Türkiyə, Səudiyyə Ərəbistanı, Kamerun, Mərakeş, Oman, Fələstin və Əlcəzair milliləri də qələbə uğrunda mübarizə aparır.
Ümumilikdə, İslam ölkələri idman sahəsi üzrə hansı potensiala sahibdir? Məsələyə münasibət bildirən idman sahəsi üzrə ekspert Vüsal Mirzəyevin sözlərinə görə, ilbəil müsəlman ölkələrində idman sahəsi inkişaf edir: "Demək olmaz ki, bütün müsəlman ölkələrində idman növləri üzrə potensial eynidir. Elə ölkələr var ki, orada idman potensialının ümumi səviyyəsi aşağıdır. Ancaq əksər İslam dövlətlərində bu sahədə inkişaf var. İdmanın müxtəlif növlərinin inkişafına diqqət artırılır. Son illər bir sıra müsəlman ölkələrində futbol sahəsində ciddi irəliləyişin olması göz qabağındadır. Xüsusən də Türkiyənin bu sahədə uğurları böyükdür. Elə müsəlman ölkəsi var ki, orada idmanın güləş növü üzrə potensial daha böyükdür. Həmçinin, ağır atletika üzrə fərqlənən ölkələr var. Məsələn, qonşu İranın bu sahədə uğurları daha böyükdür. Hər halda, müşahidə olunan mənzərə ondan ibarətdir ki, İslam ölkələrində idmanın müxtəlif növləri üzrə inkişaf gedir. Hesab edirəm ki, Bakıda keçiriləcək IV İslam Həmrəyliyi Oyunları müsəlman ölkələrinin idman potensialının inkişaf etdirilməsində mühüm rol oynayacaq".
Vidadi ORDAHALLI
