Ceyhun Məmmədov: "Keçiriləcək idman yarışına həm də maarifləndirici bir tədbir kimi baxmaq olar"
BP şirkəti və "Bakı-2017" İslam Həmrəyliyi Oyunlarının Əməliyyat Komitəsi tərəfdaşlıq haqqında saziş imzalayıb. Bu tərəfdaşlıq BP-nin Azərbaycanda idmanın inkişafına dəstək üzrə öhdəliyinin bir hissəsidir və şirkətin "London-2012" Yay Olimpiya Oyunları və "Bakı-2015" Avropa Oyunlarında uğurlu təcrübəsi və əməkdaşlığına əsaslanır.
Sazişi Azərbaycan gənclər və idman naziri, İslam Həmrəyliyi Oyunları Əməliyyat Komitəsinin baş icraçı direktoru Azad Rəhimov və BP-nin Azərbaycan, Gürcüstan və Türkiyə üzrə regional prezidenti Qordon Birrell imzalayıb.
A.Rəhimov bildirib ki, BP ilə əməkdaşlıq sazişinin imzalanması çox sevindirici haldır: "Bu bizim ilk sponsor müqaviləmizdir. Müqavilə BP şirkəti ilə imzalanır. BP Azərbaycanda fəaliyyət göstərdiyi dövrdə bir çox layihələr həyata keçirib".
A.Rəhimov xatırladıb ki, 2017-ci il Azərbaycanda Prezident İlham Əliyev tərəfindən "İslam Həmrəylik İli" elan edilib: "Bu baxımdan İslam Hərməyliyi Oyunları bu ilin ən böyük tədbiridir. Biz buna çox ciddi hazırlaşırıq. Biz istəyirik ki, bu, dünyada böyük bir bayrama çevrilsin və bütün dünyaya islam dostluğunu çatdıra bilsin. İnanırıq ki, bu yarışma uğurla və yüksək səviyyədə baş tutacaq. BP şirkətinə də təşəkkürümüzü bildiririk ki, bu oyunlara dəstəyini göstərir".
Q.Birrell isə bildirib ki, İslam Həmrəyliyi Oyunları mühüm əhəmiyyət kəsb edir: "2017-ci il bizim üçün əlamətdar bir ildir. Biz Azərbaycan hökuməti və xalqı ilə tərəfdaşlığımızın 25 illiyini qeyd edirik. 25 illiyimizin qeyd olunması çərçivəsində biz "Bakı 2017" İslam Həmrəyliyi Oyunlarının rəsmi tərəfdaşı oluruq və eləcə də Milli Olimpiya və Paralimpiya komitələri ilə olan tərəfdaşlıq sazişimizin müddətini 2020-ci ilə qədər uzatmaqla, onlara dəstəyimizi gücləndirəcəyik".
Bununla, BP 6 min gəncin cəlb olunacağı "Bakı-2017" könüllülük proqramına da dəstək göstərmiş olacaq.
Qeyd edək ki, IV İslam Həmrəyliyi Oyunları mayın 12-dən 22-dək Bakıda keçiriləcək.
BP bir Qərb şirkəti kimi tanınır. Azərbaycanın ev sahibliyi edəcəyi və sırf islam ölkələrinin əhatə olunacağı bir yarışmanın sponsorluğunu üzərinə götürməklə sözügedən şirkət, məhz Azərbaycanın apardığı siyasətin nəticəsi olaraq, sivilizasiyaların yaxınlaşmasına böyük töhfə vermiş olacaq.
İdman mütəxəssisi Ceyhun Məmmədov qəzetimizə açıqlamasında bildirdi ki, BP-nin bu addımı bütün dünyada böyük maraqla qarşılanıb: "Biz BP-nin ölkəmizdə bir çox tədbirlərə sponsorluq etdiyini xatırlayırıq. Onların arasında idman yarışları da az olmayıb. Xüsusilə də "Bakı-2015" Avropa Oyunlarındakı dəstəyi xatırlatmaq yerinə düşər. Bilirsiniz ki, həmin oyunlar sırf bir qitəni əhatə etsə də, iştirakçı ölkələrin çoxu müsəlman dövlətləri olmayıb. Azərbaycan ev sahibi kimi bu balansı doldurmuş olacaq. Bunun nəticəsidir ki, bu il ölkəmizdə İslam Həmrəyliyi Oyunlarının keçirilməsi qərara alınıb. Belə rəngarəng tədbirlərə ev sahibliyi etməklə Azərbaycan yürütdüyü dövlət siyasətinə sadiqliyini nümayiş etdirir. Bir daha təsdiq olunur ki, biz həyatın bütün sahələri üzrə multikultural və tolerant dəyərləri qoruyub saxlayırıq, onların inkişafında ciddi maraqlıyıq. Bu xüsusda BP də həmin dəyərlərə böyük hörmət və ehtiramını ifadə edib. Təbii ki, şirkət bununla sivilizasiyaların yaxınlaşmasına böyük dəstək ifadə edib. Keçiriləcək idman yarışına həm də maarifləndirici bir tədbir kimi baxmaq olar. Çünki böyük auditoriyanın marağını özünə cəlb edəcək yarışla bağlı ən xırda detallara belə fikir veriləcək. Ona görə də BP-nin göstərdiyi təşəbbüs yalnız alqışalayiq olacaq".
Məhəmmədəli QƏRİBLİ
