Azərbaycanın Rusiyadakı səfirliyinin binasında yaradılmış seçki məntəqəsində səsvermə davam edir.
Trend-in AZƏRTAC-a istinadən məlumatına görə, səfirliyin binasında yerləşən 17 saylı Yasamal üçüncü seçki dairəsinin 47 saylı məntəqəsi Moskva vaxtı ilə saat 08:00-da açılıb, ilk seçicilər səsvermədə iştirak ediblər. Seçki məntəqəsinin sədri Ağalar Atamoğlanov jurnalistlərə bildirib ki, məntəqədə 1499 seçici qeydiyyata alınıb.
Azərbaycanın Sankt-Peterburqdakı və Yekaterinburqdakı baş konsulluqlarında da seçki məntəqələri fəaliyyət göstərir.
Türkiyədə yaşayan azərbaycanlılar səfirlikdə və konsulluqda səs verir
Azərbaycanda keçirilən prezident seçkiləri ilə əlaqədar Ankara şəhərindəki səfirliyimizdə fəaliyyət göstərən 17 saylı Yasamal üçüncü seçki dairəsi üzrə 30 saylı seçki məntəqəsində səsvermə davam edir. Seçki məntəqəsi Türkiyə vaxtı ilə saat 8.00-da açılıb. Məntəqənin girişində seçicilərin siyahısı asılıb və şəffaf seçki qutusu qoyulub.
Türkiyə paytaxtında yaşayan, təhsil alan və işləyən, habelə xidməti ezamiyyətdə olan Azərbaycan vətəndaşları məntəqəyə gələrək öz seçimlərini edirlər.
Səsvermə yerli vaxtla saat 19.00-da başa çatacaq.
Prezident seçkiləri ilə əlaqədar ölkəmizin İstanbul şəhərindəki baş konsulluğunda da fəaliyyət göstərən 17 saylı Yasamal üçüncü seçki dairəsi üzrə 53 saylı məntəqədə səsvermə keçirilir.
Məntəqə Mərkəzi Seçki Komissiyasının tələblərinə uyğun qurulub. Məntəqənin girişində seçicilərin siyahısı asılıb. Burada seçicilərin öz siyasi iradələrini azad və demokratik şəraitdə ifadə etmələri üçün bütün şərait yaradılıb.
Ər-Riyaddakı səfirlikdə də səsvermə davam edir
Prezident seçkiləri ilə əlaqədar Azərbaycanın Səudiyyə Ərəbistanındakı səfirliyində yaradılmış məntəqədə səsvermə davam edir. Burada 16 saylı Yasamal ikinci seçki dairəsi üzrə yaradılmış 35 nömrəli seçki məntəqəsi fəaliyyət göstərir. Bu məntəqədə səsvermənin azad və şəffaf keçirilməsi üçün bütün şərait yaradılıb.
Bu məntəqə üzrə konsulluq qeydiyyatında olan 85 Azərbaycan vətəndaşı səs verəcək.
Azərbaycanın Ukraynadakı səfirliyində seçici aktivliyi müşahidə olunur
Azərbaycanın Ukraynadakı səfirliyində seçici aktivliyi müşahidə olunur. Səfirlikdən verilən məlumata görə, Ukrayna vaxtilə səhər saat 09:00-dan başlayaraq Azərbaycan vətəndaşları öz seçimlərini etmək üçün səfirlikdəki seçki məntəqəsinə axışıb.
Ukraynanın Kiyev, Xarkov, Dnepr, Odessa, Sumı və bir sıra şəhərlərində yaşayan Azərbaycan vətəndaşları, gənclər və tələbələr Azərbaycanın Ukraynadakı səfirliyinə gələrək sərbəst və azad qaydada öz seçimlərini edirlər.
Yerli vaxtla saat 12:00-a olan məlumata görə, səfirliyin konsulluğunda qeydiyyatda olan Azərbaycan vətəndaşlarının 40 faizdən artığı səsvermədə iştirak edib.
Səsvermədə seçicilərlə görüşən Azərbaycanın Ukraynadakı səfiri Azər Xudiyev seçkilərdə fəallıq göstərən soydaşlarımıza, xüsusən də gənclərə minnətdarlığını bildirib. Seçkilərlə bağlı Azərbaycan səfirliyində hər cür şərait yaradıldığını diqqətə çatdıran diplomat bu seçkilərdə xalqımızın istək və arzusunun reallaşacağına əminliyini ifadə edib.
Səsvermə prosesi Ukrayna KİV-lərinin də diqqət mərkəzindədir.
Almatıda yaşayan Azərbaycan vətəndaşları da səs verirlər
Aprelin 11-də yerli vaxtla səhər 8:00-da Qazaxıstanın Almatı şəhərində 17 saylı Yasamal rayonu III seçki dairəsi 56 saylı seçki məntəqəsində Azərbaycan Respublikası prezidentinin seçkilərinə start verilib. Səsvermə prosesi Azərbaycan Respublikası Konstitusiyasına, Seçki Məcəlləsinə uyğun aparılır. Məntəqə lazımi əyani vəsaitlərlə təmin edilib.
Ölkəmizin Qazaxıstandakı nümayəndəliyində qeydiyyatında olan 459-a yaxın Azərbaycan vətəndaşı seçkilər barədə məlumatlandırılıb.
Berndə yaradılmış seçki məntəqəsində 100-ə yaxın Azərbaycan vətəndaşı qeydə alınıb
Azərbaycan Respublikası Prezidentinin seçkiləri ilə əlaqədar səsvermə İsveçrədə də keçirilir. Aprelin 11-də yerli vaxtla səhər saat 8-də paytaxt Bern şəhərində Azərbaycanın bu ölkədəki səfirliyində yaradılmış seçki məntəqəsində prezident seçkilərinə start verilib.
Səsvermə prosesi Azərbaycan Respublikasının Konstitusiyası, Seçki Məcəlləsi və bu sahədəki digər qanunvericilik aktlarına uyğun aparılır. Məntəqə lazımi əyani vəsaitlərlə təmin edilib, burada səs verəcək seçicilərin siyahısı tərtib olunub. Konsulluq şöbəsinin qeydiyyatında olan 100-ə yaxın Azərbaycan vətəndaşı seçkilər barədə məlumatlandırılıb.
BƏƏ-də azərbaycanlı seçicilərin yüksək fəallığı qeydə alınıb
Azərbaycan Respublikası Prezidentinin seçkiləri ilə əlaqədar Birləşmiş Ərəb Əmirliklərindəki səfirliyimizdə yaradılmış seçki məntəqəsində yerli vaxtla səhər saat 12:00-dək adları seçici siyahısında olan vətəndaşların təxminən 50 faizi səsvermə hüququndan istifadə edib. Dubaydakı Baş Konsulluqda yerli vaxtla saat 12:00-dək 50 nəfər səs verib.
Əbu-Dabi şəhərində 78, Dubay şəhərində 197 seçici qeydiyyata alınıb.
Fransadakı vətəndaşlarımız Azərbaycanın Parisdəki Mədəniyyət Mərkəzində səs verir
Azərbaycanın Fransadakı səfirliyinin Mədəniyyət Mərkəzində yerli vaxtla saat 8:00-da prezident seçkiləri ilə bağlı səsvermə başlayıb. Səfirliyin konsulluq xidmətində qeydə alınmış və bu ölkədə ezamiyyətdə olan Azərbaycan vətəndaşları səs verirlər.
Vətəndaşlarımızın azad və şəffaf səs vermələrinin təmin edilməsi məqsədilə qanunvericiliklə nəzərdə tutulmuş qaydada zəruri tədbirlər görülüb.
Səsvermə Paris vaxtı ilə saat 19-da başa çatacaq.
Belarusda səsvermə fəal şəkildə davam edir
Belarusda Azərbaycan səfirliyinin ərazisində keçirilən Azərbaycan prezidenti seçkilərində səsvermə fəal şəkildə davam edir. Trend-in məlumatına görə, bu barədə səfirliyin müşaviri Zülfüqar Tanarverdi deyib.
O bildirib ki, seçici siyahısında cəmi 503 nəfər var: "Bu göstərici təkcə Minsk deyil, bütün region üzrədir".
Seçki məntəqəsinin bağlanmasından sonra səslər hesablanacaq və protokollar Bakıya göndəriləcək.
Azərbaycanın İtaliyadakı səfirliyində səsvermədə seçici fəallığı müşahidə edilir
Prezident seçkiləri ilə əlaqədar Azərbaycanın İtaliyadakı səfirliyində təşkil edilmiş 17 saylı Yasamal üçüncü seçki dairəsinin 35 saylı seçki məntəqəsində səsvermə qanunvericiliyə uyğun, demokratik şəraitdə davam edir.
Trend-in AZƏRTAC-a istinadən məlumatına görə, səsvermədə seçici fəallığı müşahidə edilir. Məntəqədə seçicilərin sərbəst şəkildə səs vermələri üçün hər cür şərait yaradılıb. İtaliya paytaxtında yaşayan, təhsil alan Azərbaycan vətəndaşları məntəqəyə gələrək öz seçimlərini edirlər.
Vyanada yaradılmış seçki məntəqəsində səsvermə prosesi davam edir
Azərbaycan Prezidenti seçkiləri ilə əlaqədar ölkəmizin Vyanadakı səfirliyində yaradılmış 17 saylı Yasamal üçüncü seçki dairəsinin 36-cı seçki məntəqəsində səsvermə yerli vaxtla saat 8:00-da başlayıb. Səsvermə prosesi Azərbaycan Konstitusiyasına, Seçki Məcəlləsinə və bu sahədəki digər qanunvericilik aktlarına uyğun aparılır. Buradakı məntəqədə qeydiyyatda olan 80 vətəndaşımızın azad, demokratik və şəffaf şəkildə səs vermələri üçün bütün şərait yaradılıb. Məntəqə zəruri avadanlıqla təmin edilib.
Trend-in məlumatına görə, məntəqə seçki komissiyasından AZƏRTAC-a bildirilib ki, məntəqədə Avstriyada və səfirliyin akkreditə olunduğu Sloveniya və Slovakiyada yaşayan, eləcə də hazırda Avstriyada ezamiyyətdə olan Azərbaycan vətəndaşlarının səsvermədə iştirakı üçün bütün şərait yaradılıb.
Çində səsvermə 70 faiz seçici fəallığı ilə başa çatdı
Azərbaycan Prezidentinin seçkiləri ilə əlaqədar Çindəki səfirliyimizdə yaradılan seçki məntəqəsi üzrə yerli vaxtla saat 19:00-da səsverməyə yekun vurulub. Trend-in AZƏRTAC-a istinadən məlumatına görə, Azərbaycan Konstitusiyasına, Seçki Məcəlləsinə və bu sahədəki digər qanunvericilik aktlarına uyğun aparılan səsvermə 70 faiz seçici fəallığı ilə başa çatıb.
Xarici ölkələrdəki diplomatik missiyalarımızın əməkdaşları və onların səsvermə hüququna malik ailə üzvləri, ölkəmizin hüdudlarından kənarda daimi və müvəqqəti yaşayan vətəndaşların ümumxalq səsverməsində iştirakının və seçki hüququnun təmin olunması üçün xaricdə 41 seçki məntəqəsi yaradılıb. Azərbaycanın Pekindəki səfirliyində 17 saylı Yasamal üçüncü seçki dairəsinin 37 saylı məntəqəsi üzrə Çin Xalq Respublikasında müvəqqəti və daimi yaşayan vətəndaşlarımız, səfirliyin əməkdaşları və onların səsvermə hüququ olan ailə üzvləri, habelə qonşu Koreya Respublikası, Yaponiya və Vyetnamdan gələn seçicilər, səsvermə günü müxtəlif səbəblərə görə qısamüddətli səfər zamanı Pekində olan vətəndaşlarımız səs veriblər.
Məntəqə seçki komissiyasına hər hansı qanun pozuntusu barədə şikayət və irad daxil olmayıb.
