Azərbaycanda seçkilərin təhlükəsizlik şəraitində keçirilməsi üçün Daxili İşlər Nazirliyi tərəfindən Tədbirlər Planı hazırlanaraq yerlərə göndərilib. “Trend”in məlumatına görə, bunu daxili işlər nazirinin müavini Oruc Zalov dairə seçki komissiyalarının sədrləri üçün keçirilən seminar-müşavirədə deyib.
O qeyd edib ki, seçkilərin sabitlik və təhlükəsiz şəraitində keçirilməsi üçün daxili işlər orqanlarının üzərinə düşən vəzifələrin layiqincə yerinə yetirilməsi mühüm əhəmiyyət kəsb edir.
Nazir müavini bildirib ki, Azərbaycanda sabitlik xalqın iqtidara olan inamının nəticəsidir: “Bu gün Azərbaycan dünyada ən sabit ölkələrdən biridir. Seçkilərin ölkə qanunvericiliynə uyğun olaraq və təhlükəsizlik, ictimai sabitlik şəraitində keçirilməsi üçün Tədbirlər Planı hazırlayaraq yerlərə göndərib”.
O.Zalov vurğulayıb ki, təşviqat kampaniyası zamanı namizədlərin təhlükəsizliyi tam təmin olunacaq: “Səsvermə günü seçki məntəqələri polis nəzarətinə götürüləcək və təhlükəsizlik tam təmin olunacaq. Xarici nümayəndələrin təhlükəsizliyinin təmin edilməsi üçün post-patrul xidmətlərinin dislokasiyasında dəyişiklik nəzərdə tutulur”.
Daxili işlər nazirinin müavini deyib ki, dini, irqi ayrıseçkiliyə, ədavətə çağırış edən hərəkətlərin qarşısının alınması ilə bağlı müvafiq plan mövcuddur və bu cür hərəkətlərə qətiyyən imkan verilməyəcək.
"Sosial, dini, milli, irqi ayrı-seçkiliklə bağlı çağırışların qarşısının alınması üçün müvafiq planımız var". APA-nın məlumatına görə, bunu da Mərkəzi Seçki Komissiyasının (MSK) dairə seçki komissiyalarının sədrləri üçün təşkil etdiyi seminar-müşavirədə “Azərbaycan Respublikası prezidentinin seçkilərində Daxili İşlər Nazirliyi orqanlarının rolu və fəaliyyət istiqamətləri” mövzusunda çıxış edən daxili işlər nazirinin müavini Oruc Zalov bildirib.
O. Zalov deyib ki, bu gün rayonlarda sahə müvəkilləri seçici siyahılarının dəqiqləşdirilməsi prosesinə başlayıb.
Daxili işlər nazirinin müavini qeyd edib ki, daxili işlər nazirinin əmrinə əsasən, fevralın 19-dan 27-dək əsasən Bakı, Gəncə Baş Polis idarələrində, Şirvan və digər böyük şəhərlərdə ətraf rayonların polis əməkdaşları da cəlb olunmaqla zona müşavirələri keçiriləcək: "Şəffaf, demokratik seçki kampaniyasının aparılmasına heç kim mane ola bilməz. Belə fikrə düşənlər olsa da, qarşısı qətiyyətlə alınacaq". Oruc Zalov deyib ki, "Bu gün Azərbaycan ən sabit, təhlükəsiz ölkələrdən biridir". Nazir müavini bildirib ki, seçki günü seçicilərin iradəsini azad ifadə etmələri üçün DİN Tədbirlər Planı hazırlayaraq yerlərə göndərib: "Həmin Tədbirlər Planına əsasən asayişin təmini üçün hazırlıqlara başlanıb. Seçki ilə bağlı səsvermə hüququna malik vətəndaşlar müəyyənləşdiriləcək, şəxsiyyət vəsiqələri ilə təmin olunacaqlar. Bu gün insanların böyük əksəriyyəti böyük şəhərlərə miqrasiya edir, burada yaşayırlar. Maarifləndirmə işi elə aparılmalıdır ki, yaşadığı yer, yaxud qeydiyyatda olduğu yer üzrə qeydiyyata alınsın. Bu işlər qısa müddətdə başa çatacaq. Yığıncaq və toplantılar keçirilən yerlərdə ictimai təhlükəsizlik təmin olunacaq. Səsvermə və səsvermədən sonra razılaşdırılmamış aksiyaların qarşısı qətiyyətlə alınacaq. Seçki bülletenləri məntəqələrə gətirilən zaman polis tərəfindən məntəqələr ciddi nəzarətə götürüləcək. Bülletenlərin DSK-lara və MSK-ya gətirilməsi zamanı da mühafizə təmin olunacaq".
Xəbər xidməti
