Azərbaycanda keçirilən seçkilər digər ölkələr üçün nümunə ola bilər. “Trend”in məlumatına görə, bunu Mərkəzi Seçki Komissiyasının (MSK) sədri Məzahir Pənahov dairə seçki komissiyalarının sədrləri üçün keçirilən seminar-müşavirədə deyib.
M.Pənahov bildirib ki, Azərbaycanda seçkilərin keçirilməsi üçün ictimai-siyasi sabitlik əsas amildir: "Biz çox şadıq ki, Azərbaycanda seçkilər həmişə ictimai-siyasi sabitlik şəraitində keçirilir".
MSK sədri qeyd edib ki, Azərbaycanda seçki komissiyaları böyük naliyyətlər əldə edib və Azərbaycanda keçirilən seçkilər digər ölkələr üçün nümunə ola bilər. M.Pənahov qeyd edib ki, seçkilər ölkənin demokratik prinsiplərə nə qədər malik olduğunun göstəricisidir: “Biz çalışmalıyıq ki, seçkilər Azərbaycandan kənarda da yüksək qiymətləndirilsin. Təbii ki, seçkilərə qərəzli münasibətlər olur. Buna qarşı mübarizə aparmaq lazımdır, burada ən yaxşı mübarizə yolu seçkilərin şəffaf, demokratik keçirilməsidir. Yaradılmış əlverişli şərait əsasında Azərbaycan dünyanın sayılıb-seçilən ölkələrindən biridir. Azərbaycan hətta bir çox ölkələrdən irəlidədir və çalışmalıyıq ki, bizi istəməyən qüvvələr də bunu qəbul etsin”.
MSK sədri vurğulayıb ki, seçkilərdə müşahidəçilərin çeşidi və coğrafiyası çox geniş olacaq. Seçkilərə qiymət verilməsi baxımından da müşahidəçilərin iştirakı böyük əhəmiyyət kəsb edir: “Burada hər birimiz öz vətəndaşlıq borcumuzu vəzifə borcumuzdan heç də aşağı düşünməməliyik. Ümid edirəm ki, biz bu məsələlərin öhdəsindən layiqincə gələcəyik. Azərbaycan xalqı 11 aprelin xoşbəxt tarixə çevrilməsi üçün düzgün qərar verəcək”.
Zeynal Nağdəliyev icra orqanlarının seçki prosesində vəzifələrindən danışdı
Prezident İlham Əliyev seçkilərin şəffaf keçirilməsi üçün icra hakimiyyəti orqanları qarşısında ciddi vəzifələr qoyub. “Trend”in məlumatına görə, bunu Azərbaycan Prezidentinin ərazi-təşkilat məsələləri üzrə köməkçisi-şöbə müdiri Zeynal Nağdəliyev dairə seçki komissiyalarının sədrləri üçün keçirilən seminar-müşavirədə deyib.
Z.Nağdəliyev bildirib: "Biz həmişə çalışırıq ki, seçkiləri yüksək səviyyədə keçirək. Azərbaycan Prezidentinin siyasi iradəsi Azərbaycanda seçkilərin demokratik və şəffaf keçirilməsinə təkan verib".
Prezidentin köməkçisi deyib ki, seçkilərdə şəffaflığın təmin edilməsi məqsədilə Prezident İlham Əliyev mərkəzi və yerli icra hakimiyyəti orqanları qarşısında çox ciddi vəzifələr qoyub.
Z.Nağdəliyev deyib ki, Azərbaycanda hər dəfə seçkilərdə iştirak edənlərin ümumi çəkisinin artmasına nail olunub: “Əsas vəzifə ondan ibarətdir ki, qanunvericilik pozulmasın, heç bir qanun pozuntusuna, saxtakarlığa yol verilmədən proses şəffaf keçirilsin. Azərbaycan dairə seçki komissiyalarına yaradılan şərait baxımından dünyada nümunəvi ölkə rolunu oynayacaq, çünki dairə seçki komissiyaları üçün çox yüksək şərait yaradılıb, ən yeni binalar, ən yeni məkanlar təsis olunub ki, seçicilər rahat şəkildə səsvermədə iştirak etsinlər. Artıq biz maddi-texniki bazadan, şəraitdən danışmırıq, çünki bu məsələlər öz həllini çoxdan tapıb”.
PA rəsmisinin sözlərinə görə, yerli icra hakimiyyəti orqanlarına tapşırıq verilib ki, namizədlərin təşviqat aparması üçün yerlərə baxış keçirilsin və siyahı KİV-də dərc edilsin.
Z.Nağdəliyev bildirib ki, Azərbaycanda seçkilərdə 1000 veb-kameralar quraşdırılır: "Qarşıdan gələn prezident seçkilərində də bu sayda veb-kamera quraşdırılacaq ki, dünyanın hər yerindən hər kəs seçkiləri izləyə bilsin. Kameralara özümüz də baxırıq, nöqsanları qeydə alırıq, səslərin hesablanması zamanı kameralar həmin nöqtəyə tuşlanır".
O vurğulayıb ki, seçkilərin yüksək səviyədə keçirilməsində dairə seçki komissiyalarının sədrlərinin böyük rolu var: "Əsas vəzifəmiz ondan ibarətdir ki, demokratik və şəffaf seçkilər keçirməklə ölkəmizin nüfuzunu qoruyub saxlayaq və daha da artıraq, əvvəlki təcrübəyə əsaslanaraq seçkiləri daha mütəşəkkil və şəffaf keçirək”.
Bir sıra Avropa ölkələrində seçim məhdudiyyətləri var, bizdə isə...
Azərbaycanda seçki prosesi getdikcə daha da müasirləşir. “Trend”in məlumatına görə, bunu Konstitusiya Məhkəməsinin sədri Fərhad Abdullayev dairə seçki komissiyalarının sədrləri üçün keçirilən seminar-müşavirədə deyib.
F.Abdullayev bildirib ki, bu gün dünyada çox mürəkkəb proseslər baş verir və bu proseslər, əlbəttə ki, seçkiyə də sirayət edir: “Bu gün Azərbaycanda hər birimiz Azərbaycan vətəndaşı kimi bilirik ki, uzun illər bu proses stabillik şəraitində uğurla keçirilir. Hesab edirəm ki, qarşıdan gələn seçkilər də stabillik şəraitində şəffaflıqla və uğurla reallaşacaq”.
Məhkəmə sədri vurğulayıb ki, Azərbaycanda seçicilərin öz hüquqlarından istifadə etməsi üçün tam şərait yaradılıb: “Müqayisə aparsaq görərik ki, bu gün dünyada seçicilərin hüququndan istifadə etməsi ilə bağlı problemlər mövcuddur. Misal üçün, İnsan Hüquqları üzrə Avropa Məhkəməsinin bir sıra qərarlarında aktiv seçki hüququnun məhdudlaşdırılması, xüsusilə məhkumların hüquqlarının məhdudlaşdırılması ilə bağlı qərarlar qəbul edilib, bir sıra Avropa ölkələrində də bu məhdudiyyət var. Ancaq Azərbaycanda belə məhdudiyyət yoxdur və əlbəttə ki, bu, çox mütərəqqi bir addımdır. Azərbaycanda əhalinin bütün elektoratı, o cümlədən, azadlıqdan məhrum edilən şəxslər də seçkilərdə iştirak edəcək”.
Rüstəm Usubov 2008, 2013-cü illər prezident seçkilərinin əsas oxşar cəhətlərini dedi
"Azərbaycanda beynəlxalq standartlara cavab verən hüquqi sistem yaradılıb və şəffaf və ədalətli seçkilərin keçirilməsi üçün bütün zəruri əsaslar mövcuddur". “Trend”in məlumatına görə, bunu Baş prokurorun birinci müavini Rüstəm Usubov dairə seçki komissiyalarının sədrləri üçün keçirilən seminar-müşavirədə deyib.
R.Usubovun sözlərinə görə, Azərbaycanda ictimai-siyasi sabitlik və demokratik seçki qanunvericiliyi tam əminliklə deməyə əsas verir ki, qarşıdakı prezident seçkiləri də əvvəlki seçkilər kimi xalqın aktiv iştirakı və qanun çərçivəsində keçiriləcək.
Baş prokurorun müavini bildirib ki, xalqımızın iradəsinin təmin olunmasında prokurorluq orqanlarının da vəzifələri var. O qeyd edib ki, prokurorluq orqanları seçkilərlə bağlı müraciət və şikayətləri araşdırır, müraciətlərə verilən izahlarda yaxından iştirak edir.
R.Usubov vurğulayıb ki, Azərbaycanda əvvəlki seçkilərdə ciddi qanun pozuntusuna yol verilməsi ilə bağlı prokurorluq oqranlarına müraciət daxil olmayıb: "Seçki proseslərinə maneçilik törədənlər barəsində müvafiq qaydada tədbirlər görüləcək".
Baş prokurorun müavininin sözlərinə görə, indiyə qədər keçirilən seçkilərdə müraciət və şikayətlər daha çox bələdiyyə seçkiləri ilə bağlı olub ki, bu da seçkilərin kütləvi xarakter daşıması ilə bağlıdır: "2008-ci ildə prezident seçkiləri ilə bağlı müraciət daxil olmayıb. 2013-cü ildə keçirilən prezident seçkiləri ilə bağlı prokurorluq orqanlarına cəmi 6 müraciət daxil olub ki, onların da araşdırılması zamanı qanun pozuntusuna yol verilməsi aşkar edilməyib. Azərbaycanda 2016-cı ildə keçirilən referendumla bağlı da prokurorluq orqanlarına şikayət və müraciətlər daxil olmayıb. 2015-ci ildə keçirilən parlament seçkiləri ilə bağlı bir sıra şikayətlər daxil olub və araşdırılaraq müvafiq tədbirlər görülüb".
R.Usubov qarşıdan gələn prezident seçkilərinin azad, demokratik və heç bir qanun pozuntusuna yol verilmədən keçiriləcəyinə inandığını bildirib: “Gəlin vicdanla, şəffaf şəkildə bu tədbiri həyata keçirək və heç bir qanun pozuntusuna yol verməyək”.
