Fevralın 14-də Beynəlxalq Mətbuat Mərkəzində ONN İnformasiya Agentliyi media nümayəndələri üçün brifinq keçirib. “Olaylar.az” bildirir ki, brifinqdə media nümayəndələri, redaktor və baş redaktorlar iştirak ediblər.
Tədbiri giriş sözü ilə açan jurnalist, Azərbaycan Yazıçılar Birliyinin üzvü Kamil Məhərrəmoğlu müstəqil Azərbaycanımızda insanların dolğun məlumatlar yayımlayan, qərəzdən uzaq xəbər və yazılar təqdim edən informasiya agentliyinə böyük ehtiyacı olduğunu bildirib. "Ölkəmizdə və dünyada baş verən siyasi-ictimai hadisələr hər kəsin diqqət mərkəzindədir. Bütün baş verən hadisələri gecikdirmədən, anında oxuculara təqdim etmək heç də asan iş deyil. ONN İnformasiya Agentliyinin qarşısına qoyduğu əsas məqsədlərdən biri milli-mənəvi dəyərlərimizin qorunması, bu dəyərlərin təbliğində əlindən gələni əsirgəməməkdir".
Kamil Məhərrəmoğlu ONN İnformasiya Agentliyinin rəhbəri Bilman Allahverdiyev haqqında tədbir iştirakçılarına məlumat verib. Bildirdi ki, Bilman Allahverdiyev "7 gün", "525 -ci qəzet", "Panorama", "Kriminal", "168 saat", "Azad Azərbaycan" qəzetlərində calışıb. 2005-ci ildən "Milli Birlik" qəzetinin baş redaktoru və "Günaz.az" saytının rəhbəri olub.
Daha sonra tədbirdə ONN İnformasiya Agentliyinin fəaliyyətini əks etdirən slayd nümayiş olunub.
Tədbirdə çıxış edən saytın baş redaktoru Bilman Allahverdiyev bildirib ki, “ONN.az”ın yaranmasında əsas məqsəd aparıcı mətbuatın inkişafına dəstək olmaq və insanları doğru informasiya ilə məlumatlandırmaqdır: "Fəaliyyət göstərdiyimiz qısa zaman ərzində biz Azərbaycan həqiqətlərini diasporlar vasitəsilə dünyaya çatdırmağa çalışırıq.
Azərbaycan müstəqillik əldə etdikdən sonra, digər sahələrdə olduğu kimi, media sahəsində də böyük uğurlar əldə etdik. Məqsədimiz bu uğurları qorumaqdır.
Agentlik Azərbaycanda və dünyada baş verən ən son ictimai-siyasi, sosial, mədəni və tarixi hadisələri obyektiv, qərəzsiz, tərəfsiz olaraq yayır. Siyasi analizlər, videogörüntülər, proqnozlar, müsahibələr təqdim edir".
B.Allahverdiyev qeyd edib ki, agentliyin fəaliyyətinin əsas ana xətti demokratiyanın inkişafına töhfə vermək, müstəqilliyimizin qorunması, dövlətçiliyimizin inkişafına xidmət etməkdən ibarətdir.
Daha sonra təqdbirdə iştirak edən media nümayəndələri yeni internet portalının fəaliyyətinə uğurlar arzulayıblar.
Qeyd edək ki, portal "Unutmayaq, unutdurmayaraq" yeni rubrikasını açmaqla dəyərlərimizi xatırlatmağa, unutdurmamağa, gənc, istedadlı, yaradıcı şair, yazıçı, elm adamlarını oxuculara tanıtdırmağa, el adətləri, folklorumuzun təbliğinə və s. geniş yer verməyi prioritet istiqamətlərindən biri kimi müəyyənləşdirib.
“Olaylar”
