İraqın Milli Təhlükəsizlik Xidməti İŞİD terror təşkilatının nəzarətində olan ərazilərdə azərbaycanlı uşaqların olub-olmamasını yoxlayır. Bunu Trend-ə İraqın Azərbaycandakı müvəqqəti işlər vəkili Fadil Avad əl-Şüveyli deyib.
Onun sözlərinə görə, uşaqların qaytarılmasının təxmini tarixləri bu qurum tərəfindən müəyyənləşdirilir.
O qeyd edib ki, İraqın Milli Təhlükəsizlik Xidməti yoxlamanı başa çatdırdıqdan sonra növbəti prosedurlar Azərbaycanın Bağdaddakı səfirliyi və Xarici İşlər Nazirliyi ilə əlaqəli şəkildə həyata keçiriləcək.
Diplomat uşaqların dəqiq sayı barədə məlumata sahib olmasa da xatırladıb ki, uşaqlardan biri bir müddət əvvəl Azərbaycana təhvil verilmişdi: “Bu sahədə əlaqələndirilmiş fəaliyyət hər iki ölkə hökumət tərəfindən davam etdiriləcək”.
“İraqda kimsəsizlər evində qalan 20-ə yaxın azərbaycanlı uşaq yaxın günlərdə Azərbaycana göndəriləcək”. Bunu isə APA-ya açıqlamasında Azərbaycanın İraqdakı müvəqqəti işlər vəkili Ramiz Qafarov deyib. R. Qafarov bildirib ki, hazırda sənədləşmə işləri aparılır.
Onun sözlərinə görə, uşaqların Azərbaycanda qohumlarının olub-olmadıqlarına dair hələ məlumat yoxdur: “Həmin uşaqlarla görüşmüşük. Yaxın günlərdə onları ölkəmizə göndərəcəyik”.
İraqda İŞİD-lə əlaqədə ittiham olunan 200 azərbaycanlı qadının həbs edilməsi xəbərlərinə gəldikdə isə R. Qafarov qeyd edib ki, İraqdakı nümayəndəliyimiz Xarici İşlər Nazirliyi və İraqın yerli qurumları ilə bu məsələyə dair birgə işləyir və məsələnin müsbət həlli üçün çalışır.
Diplomat qeyd edib ki, qadınlar üçün vəkil tutulacaq: “Onların həbsdə qalmaması və azad olunaraq Azərbaycana göndərilməsi üçün çalışacağıq. Hazırda bu işlə məşğuluq, araşdırma gedir. Təbii ki, başqa ölkənin qanunlarını pozan hər bir əcnəbi vətəndaş qanun çərçivəsində cəzasını çəkməlidir, ancaq qadın olduqları üçün İraqın yerli qurumları ilə işləyirik və köməklik göstərməyə çalışırıq”.
Qeyd edək ki, iki azərbaycanlı uşaq - 2 yaşlı Xədicə və 4 yaşlı Abdulla İŞİD-dən azad olunmuş Suriya ərazisində tapılmışdı. Onlar bu ərazilərin azad olunmasından sonra təhlükəsizlik qüvvələri tərəfindən İraqa gətirilmişdi. 4 yaşlı Abdulla isə bu yaxınlarda Azərbaycana gətirilib.
Qeyd edək ki, iraqlı deputat Vian Dahil şəxsi “Twitter” səhifəsində hərbçilərin İŞİD-lə əlaqədə şübhəli bilinən 200 azərbaycanlı və 512 rusiyalı qadını saxladıqlarını bəyan edib. Deputatın bildirdiyinə görə, saxlanılan qadınlar həbsxanaya yerləşdirilib. V. Dahil qadınların harada və nə vaxt saxlanıldığını açıqlamayıb.
Xatırladaq ki, Dövlət Təhlükəsizliyi Xidmətinin rəisi general-leytenant Mədət Quliyev bildirib ki, 900-ə yaxın azərbaycanlı İŞİD-ə qoşulmuşdu: "Onlardan 85-i hüquq-mühafizə orqanları tərəfindən saxlanılıb və pentensiar xidmətdədirlər. 195 nəfər Azərbaycan vətəndaşlığı hüququndan məhrum edilib, bir çoxu isə döyüş zamanı həlak olub. İraqda Azərbaycan vətəndaşlarının kütləvi olduğu yerdə 300-ə yaxın azərbaycanlı məhv edilib. Əməkdaşlarımız hazırda İraqdadırlar və araşdırırq ki, bu məlumat düz və ya səhvdir".
