Azərbaycan və Rusiyanın dini liderləri Cənubi Qafqazda münaqişənin dinc yolla həllinə yardım etmək niyyətindədir. Trend-in məlumatına görə, bu fikirlər Rusiya, Azərbaycan və Ermənistanın dini liderlərinin Dağlıq Qarabağ problemi ilə bağlı görüşü ərəfəsində Moskva və bütün Rusiyanın Patriarxı Kirill və Qafqaz Müsəlmanlar İdarəsinin rəhbəri şeyxülislam Allahşükür Paşazadə arasında keçirilən görüş zamanı səsləndirilib.
Rusiya Pravoslav Kilsəsinin rəhbəri Moskvaya səfərə görə Qafqaz Müsəlmanları İdarəsinin rəhbərinə təşəkkürünü bildirib və şeyxin dinlər və xalqlar arasında dialoqun inkişafına verdiyi töhfəni yüksək qiymətləndirib.
Tərəflər bundan sonra da sülhün bərqərar olması istiqamətində əməkdaşlığı davam etdirməyə hazır olduqlarını və bu görüşün Qafqazda münaqişənin həllinə kömək edəcəyinə ümid etdiklərini bildiriblər.
Daha sonar üç ölkə dini liderlərinin görüşü keçirilib. Görüşdə Ermənistan-Azərbaycan, Dağlıq Qarabağ münaqişəsi əsas müzakirə mövzusu olub.
"Ümid edirəm ki, bu görüşün bütün Qafqaz xalqları üçün bəhrəsi olacaq. Əlbəttə, Dağlıq Qarabağ münaqişəsinin həlli çox uzanıb. Buna kimi də görüşlərimiz olub, təəssüflər olsun ki, nəticəsiz qalıb. Təkcə Qarabağda deyil, Azərbaycan-Ermənistan sərhədində dinc insanlar həlak olurlar. Biz bu məsələyə bu cur yanaşsaq, çətin ki, həll yoluna gələk". APA xəbər verir ki, bunu Qafqaz Müsəlmanları İdarəsinin (QMİ) sədri Şeyxülislam Hacı Allahşükür Paşazadə Rusiya paytaxtında Moskva və bütün Rusiyanın patriarxı Kirill və bütün ermənilərin katolikosu II Qareginin iştirakı ilə keçirilən üçtərəfli görüşdə deyib.
"Biz din xadimləriyik, hərbçi deyilik. Problemin elə həll yolunu tapmalıyıq ki, xalqlara ziyan gəlməsin. Dini liderlərin münaqişənin həllinə töhfə vermək imkanları var. Dağlıq Qarabağ Azərbaycan ərazisidir. Müharibə də Azərbaycan ərazisində gedib. Azərbaycan torpaqları işğal olunub. Gəlin, bu gün Kirilin rəhbərliyi ilə dövlət rəhbərlərimizə çağırış edək ki, münaqişənin sülh yolu ilə həll üçün səylərini artırsınlar.
Milyonlarla insan öz ata-baba yurduna gedə, qəbirlərini ziyarət edə bilmir. Həmin yerlər işğal altındadır. Faktlar var ki, qəbirlər təhqir edilir. Bu heç də dindarlara yaraşmır. Dağlıq Qarabağ ətrafındakı rayonların yavaş-yavaş qaytarılmasına başlamaq lazımdır", - deyə QMİ sədri qeyd edib.
A. Paşazadə bildirib ki, Rusiya vətəndaşı Dilqəm Əsgərov yaxınlarının qəbrini ziyarət etmək istəyərkən Kəlbəcərdə girov götürülüb: "Girovlar, əsirlər azad olunmalıdır. Biz ilk addımı atmalıyıq ki, insanlar öz ata-baba yurdlarına qayıtsınlar. Sadəcə, görüşmək xatirinə görüşməməliyik.
Biz bir yerdə yaşayacağıq, heç kəs heç yerə getməyəcək. Ona görə də bizim görüşün nəticəsi olmalıdır.
Mən bir daha erməni katolikosuna müraciət edirəm. Bu görüşdən sonra yenə əvvələ qayıtmayaq. Bir daha qeyd edirəm ki, mən bu görüşə böyük ümidlə baxıram”.
İki saata yaxın çəkən görüşün yekununa dair Bəyanat imzalanıb. Görüşdən sonra Patriarx Kirill, Şeyxülislam Hacı Allahşükür Paşazadə və bütün ermənilərin katolikos Qaregin jurnalistlər önünə çıxıblar.
Görüşün yekunları ilə bağlı Patriarx Kirill danışıb. O, əsrləri azad etməyə çağırıb. Görüşün yekunları ilə bağlı açıqlama verən Patriarx Kirill deyib ki, atmosferindən razı qalıb: "Fikir ayrılığını yalnız mehriban qonşuluq prinsiplərinə və mənəvi dəyərlərə əsaslanaraq aradan qaldırmaq olar. Azərbaycan və Ermənistan xalqları daim yanaşı yaşamalıdırlar. Buna görə də sülh və əməkdaşlıqdan savayı perspektiv yoxdur. Biz münaqişə ilə bağlı bütün hümanitar problemlərin tezliklə sülh yolu ilə həll edilməsi üçün dua edirik və xalqlarımızın siyasi və ictimai xadimlərini buna çağırırıq. Buradan başqa, hərbi əməliyyatlarda iştirak etməyən və əsir düşmüş dinc sakinlərin azad edilməsinə çağırırıq. Müharibə zonasındakı məbədlərin, məscidlərin və digər müqəddəs yerlərin qorunması olduqca vacibdir".
