Türkdilli Dövlətlərin Əməkdaşlıq Şurası beynəlxalq təşkilatı Hidayət Orucovun "Heydər Əliyevin milli siyasəti" kitabını türk dilində çap edib.
Görkəmli dövlət xadimi Heydər Əliyevin siyasi bioqrafiyasının az işlənmiş, lakin olduqca önəmli bir istiqamətinin - milli siyasət sahəsindəki fəaliyyətinin araşdırılması və şərhinə həsr edilən monoqrafiya ilk dəfə 2001-ci ildə Azərbaycan və rus, sonralar türk, ingilis, ərəb (iki dəfə), gürcü və qırğız dillərində nəşr olunub.
Bütün nəşrlərdə olduğu kimi, müəllif hər dildə çap olunan kitaba Heydər Əliyevin həmin ölkə ilə münasibətləri haqqında geniş ön söz yazıb. Bu nəşrə də “Biz birlikdə güclüyük adlı” ön söz yazaraq, Heydər Əliyevin türk dünyası üçün gördüyü əvəzsiz fəaliyyətlərdən bəhs edib.
Ulu öndərin TDƏŞ, TÜRKSOY və TÜRKPA kimi türk xalqlarını birləşdirən beynəlxalq təşkilatların yaranması üçün apardığı işlərdən, ölkəmizin türkdilli dövlətlərlə sıx əməkdaşlıq əlaqələrinin qurulması və inkişafı yolunda fəaliyyətlərindən danışan müəllif ön sözdə, həmçinin, onun bütün türk xalqlarına xüsusi diqqət və məhəbbətlə yanaşdığını dilə gətirir.
Ermənistan-Azərbaycan, Dağlıq Qarabağ münaqişəsinin sülh yolu ilə həlli istiqamətində Heydər Əliyevin təşəbbüslərindən danışan müəllif qeyd edir ki, BMT Təhlükəsizlik Şurası Ermənistan hərbi qüvvələrinin işğal olunmuş Azərbaycan torpaqlarından qeyd-şərtsiz çıxarılması, məcburi köçkünlərin ev-eşiklərinə qaytarılması ilə əlaqədar dörd qətnamə qəbul edib. Lakin işğalçı Ermənistan dövləti hələ də bu sənədlərin və digər nüfuzlu beynəlxalq təşkilatların qətnamələrinin tələblərini yerinə yetirmir, bununla da dünya ictimaiyyətinə meydan oxuyur.
Əsərdə ifrat dərəcədə mərkəzləşdirilmiş sovet rejiminin məhdud imkanlarından maksimum məharətlə istifadə edilərək Azərbaycanda milli şüurun dirçəlişi, ziyalıların, xüsusilə də milli ruhun əsas daşıyıcıları olan humanitar sahənin, fikir adamlarının repressiya və təzyiqlərdən qorunması, mədəniyyətin, elmin, təhsilin inkişaf etdirilməsi, zəngin milli özgürlüyün qorunub-saxlanması, dövlət idarəçiliyinin bütün sahələrində milli kadrların xüsusi çəkisinin artırılması, güclü sənaye və kənd təsərrüfatı potensialı yaradılması bugünkü müstəqil Azərbaycanda həyata keçirilən çoxcəhətli və genişmiqyaslı milli siyasət üçün bir tarixi hazırlıq işi kimi qiymətləndirilir. Monoqrafiyada, həmçinin, bu siyasətin milli müstəqillik konsepsiyası və praktikası, demokratik Azərbaycan cəmiyyətinin dünyaya inteqrasiyası prosesi araşdırılır.
Əsərin fəlsəfi-siyasi publisistika üslubunda səlis və aydın dildə yazılması bütünlükdə xüsusi peşə hazırlığı keçməyənlər üçün çox çətin bir sahənin - milli siyasət sahəsinin problemlərinin geniş oxucu auditoriyası tərəfindən rahat anlaşılmasına imkan yaradır.
Kitab siyasətçilər, siyasi tədqiqatlarla məşğul olan elmi işçilər, ali məktəb müəllimləri, tələbələr, ümumiyyətlə geniş oxucu auditoriyası üçün nəzərdə tutulur.
Kitab Türkiyənin İstanbul şəhərində, “Günform” nəşriyyat evində çap edilib.
Xəbər xidməti
