Azərbaycan Xarici işlər Nazirliyi, Müdafiə Nazirliyi, Baş Prokurorluq və Füzuli rayon İcra Hakimiyyəti tərəfindən Azərbaycanda akkreditasiya olunmuş xarici KİV nümayəndələrinin, hərbi attaşelərin Füzuli rayonunun Alxanlı kəndinə səfəri təşkil olunub.
XİN-dən baki-xeber.com-a verilən məlumata görə, səfərdə "TRT", "İhlas Haber Ajansı", "MİR" Televiziyası, "Associated Press", RİA "Novosti", "Amerikanın Səsi", "İnterfax", "BBC" və digər xarici KİV nümayəndələri iştirak edib. Habelə, səfərdə 12 dövlətin 15 hərbi attaşesi və nümayəndəsi iştirak edib. Bu sırada ABŞ, Rusiya Federasiyası, Pakistan İslam Respublikası, Çin Xalq Respublikası, Koreya, Türkiyə, Qazaxıstan, Çexiya, Ukrayna, Gürcüstan, Belarus hərbi nümayəndələri və Almaniya Federativ Respublikasının Azərbaycandakı səfirliyinin diplomatı iştirak edib.
"Trend"-in məlumatına görə, hərbi attaşelər və xarici KİV nümayəndələri Füzuli rayonunun Alxanlı kəndində erməni silahlılarının yaraladığı Sərvinaz Quliyevaya baş çəkdikdən sonra erməni təxribatı nəticəsində həlak olmuş Alxanlı kənd sakinləri - 1966-cı il təvəllüdlü Sahibə Quliyeva və onun nəvəsi - 2016-cı il təvəllüdlü Zəhra Quliyevanın qəbirlərini ziyarət edib, onların ailə üzvləri və kənd sakinləri ilə görüşüblər.
Füzuli rayon İcra Hakimiyyətinin başçısı Alı Alıyev bildirib ki, erməni hərbi birləşmələri hər gün bu kəndi atəşə tutur: "Atəşkəs dövründə 900 şəhid vermişik. ATƏT və beynəlxalq qurumlar buna biganə münasibət bəsləyir. 25 ildir ki, ermənilər hər gün cəbhəyanı əraziləri atəşə tutur. Beynəlxalq təşkilatlar və aparıcı ölkələr buna biganə yanaşır. Biz artıq heç bir beynəlxalq quruma inanmırıq. Hərbi attaşelər bunu dünya ictimaiyyətinə çatdırmalıdır".
Səfər iştirakçıları daha sonra Alxanlı kəndində hadisənin baş verdiyi əraziyə baxış keçiriblər.
"Günahsız, dinc mülki insanların qətlə yetirilməsi bunu edənlərə qarşı böyük nifrət oyadır və onlar ittiham olunmalıdır". Bunu Pakistanın Azərbaycandakı səfirliyinin hərbi attaşesi polkovnik Seyid İmran Əli erməni təxribatı nəticəsində 2 yaşlı Zəhra Quliyevanın və onun nənəsinin həlak olmasına münasibət bildirərkən deyib.
O qeyd edib ki, Pakistanın Dağlıq Qarabağ məsələsi ilə bağlı prinsipial mövqeyi var - münaqişə Azərbaycanın ərazi bütövlüyü çərçivəsində, BMT qətnamələrini yerinə yetirməklə həll olunmalıdır: "Pakistan bu prinsiplərə sadiqdir və Azərbaycan dövləti və xalqı ilə həmrəyliyini nümayiş etdirir".
"Zəhra Quliyeva və nənəsi Sahibə Allahverdiyevanın ölümü, kənd sakini Səlminaz Quliyevanın yaralanması bizi çox təəssüfləndirir". Bunu isə ABŞ-ın Azərbaycandakı səfirliyinin hərbi attaşesi Ceyms Tompson deyib. O deyib: "Bütün Amerika onların ailələri ilə bilrikdə hüzn içindədir".
Onun sözlərinə görə, Qarabağ münaqişəsinin sülh yolu ilə həlli regiona sülhün, mülki əhalinin təhülkəsizliyinin və sabitliyin təmin olunması üçün ideal yoldur.
C.Tompson hadisə yeri ilə tanış olmaq üçün hərbi atteşələri bura dəvət etməsinə görə Azərbaycan Hökümətinə təşəkkürünü bildirib.
"Ermənistan məsuliyyətdən qaça bilməz"
"Azərbaycanda akkreditə olunmuş hərbi attaşelərin və xarici KİV nümayəndələrinin Füzuli rayonunun Alxanlı kəndinə səfərinin təşkil olunmasında məqsəd həmin kənddə iyulun 4-də Ermənistan ordusu tərəfindən törədilmiş vəhşiliyin beynəlxalq ictimaiyyətin diqqətinə obyektiv şəkildə çatdırılması olub". Bu sözləri isə APA-ya açıqlamasında Xarici İşlər Nazirliyinin mətbuat xidmətinin rəhbəri Hikmət Hacıyev deyib.
H. Hacıyev bildirib ki, Ermənistanın təbliğat maşını bu cinayətə və bu vəhşiliyə görə öz məsuliyyətini gizlətməyə çalışır: "Bu məqsədlə onlar iddia edir ki, guya kəndin ərazisində hərbi xarakterli məntəqələr olub və buradan atəş açılıb, ona görə də Ermənistan Silahlı Qüvvələri tərəfindən kənd atəşə tutulub. Halbuki, kənddə hər hansı hərbi təyinatlı obyekt və ya qərargah olmayıb. KİV nümayəndələri, həmçinin hərbi attaşelər peşəkar hərbçi gözü ilə ərazi ilə tanış oldular və şahid oldular ki, ərazidə hər hansı hərbi təyinatlı obyekt yoxdur. Bu isə Ermənistanın bütün təbliğatını və məsuliyyəti öz üzərindən atmaq səylərini alt-üst edir. Kənd Ermənistan Silahlı Qüvvələri tərəfindən qəsdən və bilərəkdən atəşə tutulub və bu atəş nəticəsində azyaşlı qız və nənəsi həlak olub, daha bir mülki şəxs yaralanıb. Digər bir fakt da onların diqqətinə çatdırıldı ki, hadisə baş verən zaman balaca qız, onun nənəsi və yaxın qohumları evin yaxınlığında, həyətdə imiş. Belə bir məqamda kənd məqsədyönlü şəkildə atəşə tutulub və nəticədə faciə baş verib. Ona görə də Ermənistan məsuliyyətdən qaça bilməz".
