Ağa Seyidli: "Bu həm də dövlətlə din arasında nifaq salmaq istəyən qüvvələr üçün tutarlı cavab oldu"
Azərbaycan Respublikasının Prezidenti İlham Əliyev Yasamal rayonu, Abdulla Şaiq küçəsi 79 ünvanında yerləşən Hacı Cavad məscidinin sökülməsi ətrafında yaranan vəziyyəti araşdırmaq üçün xüsusi komissiyanın yaradılması barədə tapşırıq verib. Bu haqda Azərbaycan Prezidentinin ictimai-siyasi məsələlər üzrə köməkçisi Əli Həsənov məlumat verib.
Onun sözlərinə görə, Azərbaycan Respublikasının Prezidenti İlham Əliyev Hacı Cavad məscidinin sökülməsi ilə bağlı yaranmış vəziyyətdən narahat olub. Ölkə başçısı narazılıq edən inanclı insanların reaksiyasını nəzərə alaraq məscidin sökülməsinin dayandırılması, məsələnin hərtərəfli araşdırılması, binanın texniki vəziyyətinin tam obyektiv qiymətləndirilməsi və müvafiq təkliflərin təqdim olunması məqsədilə xüsusi komissiyanın yaradılması barədə tapşırıq verib.
Ölkə başçısının bu addımını necə qiymətləndirmək olar?
Dinşünas Ağa Seyidli qəzetimizə bildirdi ki, bu olduqca təqdirəlayiq addımdır: "Bəzi detallardan sui-istifadə etmək istəyən qüvvələr var. Onlar baş verən hansısa kiçik hadisəyə bir az da rəng qataraq, onu tamamilə başqa rakursdan təqdim edir. Təbii ki, hadisələrin məhz həmin axarda getməsində maraqlı olan xarici qüvvələr də az deyil. "Sovetski" deyilən ərazidə baş verən hadisə zamanı belə hallar müşahidə olundu. Əsasən də xaricdə oturan radikallar bu məsələyə guya Azərbaycan hakimiyyəti islam dinini sıxışdırır kimi rəy verməyə çalışdılar. Tamamilə absurd bir iddialar idi. Azərbaycanda dövlət proqramının icrası zamanı bəzi tikililərin sökülməsi məsələsi ortaya çıxır. Məscidlə bağlı yaranan vəziyyət də məhz həmin qəbildəndir. Ölkəmizdə məqsədli şəkildə, islamı sıxışdırmaq üçün hansısa məscidin sökülməsinə rast gəlinməyib. Əksinə, biz şahidi oluruq ki, hakimiyyət böyük məscidlərin tikintisi layihəsini həyata keçirib. Statistikaya baxsanız görərsiniz ki, bu istiqamətdə artım var. Yəni Azərbaycanın dini tolerantlıq, multikulturalizm sahəsində yürütdüyü siyasəti bütün dünya üçün örnək göstərirlər. Prezidentin bir məscid binasının sökülməsinə görə verdiyi operativ reaksiya, bununla bağlı hətta komissiya yaratması hakimiyyətin islam dininə göstərdiyi diqqətin, rəğbətin nümunəsidir. Düşünürəm ki, bu həm də dövlətlə din arasında nifaq salmaq istəyən qüvvələr üçün tutarlı cavab oldu".
Məhəmmədəli QƏRİBLİ
