Dünən Mətbuat Şurasında İsveçrənin tanınmış media və PR eksperti, pedaqoq Aleksandra Stark kütləvi informasiya vasitələrinin bir qrup təmsilçisi üçün seminar keçib. Seminar Şuranın İsveçrənin Azərbaycandakı Səfirliyinin birgə əməkdaşlığı çərçivəsində düzənlənib, əsasən onlayn media, media marketinqi və sosial şəbəkələr mövzusunda olub.
Toplantı iştirakçılarını salamlayan MŞ sədri, Milli Məclisin deputatı Əflatun Amaşov təlimçi A.Stark barədə məlumat verib, ekspertin çoxillik təcrübəsinin Azərbaycan jurnalistləri üçün faydalı tərəflərinə diqqət çəkib. Ə.Amaşov həmçinin bildirib ki, rəhbərlik etdiyi qurumla İsveçrənin Azərbaycandakı Səfirliyinin birgə əməkdaşlığı davamlı olacaq. O, İsveçrədən Azərbaycana, Azərbaycandan da İsveçrəyə jurnalist səfərlərinin təşkilinin vacibliyini əsaslandırıb. "Bugünkü seminar ilk addımdır. Hesab edirəm ki, İsveçrə kimi media təcrübəsinə malik ölkədən öyrənilməli çox məsələlər var. Ölkənin Azərbaycandakı Səfirliyi də buna uyğun olaraq təşəbbüslər irəli sürür. Bu sevindirici haldır", - deyən deputat onu da bildirib ki, xanım Stark aprelin 11-də Bakı Dövlət Universitetinin jurnalistika fakültəsinin tələbələrinə də seminar keçəcək.
İsveçrənin Azərbaycandakı səfiri Filip Stalder də çıxışında rəhbərlik etdiyi diplomatik missiyanın Azərbaycan Mətbuat Şurası ilə əməkdaşlığından söz açıb, məsələnin faydalı tərəflərini vurğulayıb. O, eyni zamanda bildirib ki, son 20 ildə internetin sürətli inkişafı nəticəsində ən çox dəyişikliyə məruz qalan sahə məhz mediadır. Buna görə də sahəyə spesifik yanaşma mütləqdir. Belə yanaşma həm də medianın IV hakimiyyət missiyası ilə əlaqədardır.
Səfir İsveçrədə media qurumlarına xas göstəricilərdən danışarkən vurğulayıb ki, 4 rəsmi dili olan ölkənin media palitrası da kifayət qədər zəngindir. Belə ki, İsveçrədə müxtəlif dillərdə fəaliyyət göstərən kütləvi informasiya vasitələri var. 6 milli telekanal, 13 milli radio, çoxlu sayda özəl telekanal fəaliyyət göstərir. Çap mediasına gəlincə, burada hər sahə üzrə ayrıca nəşrlərin mövcudluğu diqqət çəkir.
Açılış nitqlərindən sonra seminar öz işinə başlayıb. 20 KİV-in təmsilçisinin qatıldığı seminarda ekspert A.Stark iştirakçılara yeni media, informasiya texnologiyalarının inkişafının doğurduğu mənzərənin jurnalist fəaliyyətinə təsiri, etik standartlar və sair mövzularda məlumatlar verib, sualları cavablandırıb. Seminar qarşılıqlı fikir mübadiləsi şəraitində keçib.
