Mehman Muradlı: "Biz bütün istiqamətlərdə ayıq olmalıyıq ki, ermənilərlə bağlı məsələlərdə kiçik də olsa boşluq buraxmayaq"
Məlum olduğu kimi, bir qrup azərbaycanlı hüquq müdafiəçisi ötən ilin aprelində Ermənistanın hərbi təxribatının qurbanı olmuş 700-dən çox Azərbaycan vətəndaşının adından İnsan Hüquqları üzrə Avropa Məhkəməsinə ərizə ilə müraciət edib. Ermənistan tərəfi isə yenə də dünya ictimaiyyətini aldatmaq üçün cılız və təxribat xarakterli addım atıb.
Məlum olub ki, tanınmayan və separatçı "Dağlıq Qarabağ Respublikası" prezidentinin hüquq məsələləri üzrə müşaviri Emil Babayan Avropa Məhkəməsinin sədrinə müraciət ünvanlayıb. Müraciətdə bildirilir ki, məhkəmə prosesində "Dağlıq Qarabağ Respublikası"nın iştirakı üçün şərait yaradılsın. O göndərdiyi məktubda Montevideo Konvensiyasına istinad edərək bəyan edir ki, guya, marionet "Dağlıq Qarabağ Respublikası"nın bütün müstəqil dövlətlərə xas atributları və müstəqil məhkəməsi mövcuddur.
Strasburq Məhkəməsi isə qondarma "Dağlıq Qarabağ Respublikası"nın məhkəmədə iştirakı ilə bağlı müraciətinə rədd cavabı verib.
Ermənilərin bu cəhdinin də uğursuzluğa düçar olması nədən xəbər verir?
Hüquqşünas Mehman Muradlı qəzetimizə açıqlamasında bildirdi ki, bu iddiaya rədd cavabı verilməsi Dağlıq Qarabağdakı rejimin qondarma olmasına verilən hüquqi cavabdır: "Çünki bütün beynəlxalq konvensiyalarda Dağlıq Qarabağ Azərbaycanın tərkib hissəsi kimi qəbul edilir. BMT və digər nüfuzlu beynəlxalq qurumlar yekdilliklə bunun belə olduğunu təsdiq edir. Hətta bununla bağlı BMT Təhlükəsizlik Şurasının Ermənistanın işğal olunmuş torpaqları dərhal azad etməsini nəzərdə tutan dörd qətnaməsi mövcuddur. Bütün bu faktlar bir daha sübut edir ki, ermənilər Azərbaycan ərazisini silah gücü ilə ilhaq edib. Ancaq İnsan Hüquqları üzrə Avropa Məhkəməsi verdiyi doğru qərarla hüquqi əsasla təsdiqləyib ki, Dağlıq Qarabağ Azərbaycanın tərkib hissəsidir və ermənilərin ora heç bir iddiası ola bilməz. Yəqin ki, qaldırılan iddia ilə də bağlı müsbət qərarın veriləcəyinin şahidi olacağıq. Belə iddiaların qaldırılmasına çox müsbət yanaşıram. Çünki beynəlxalq hüquq bir daha qanuni əsaslanmış qərarlarla bizim xeyrimizə olan nəticələrə imza atır. Görürsünüz ki, ermənilər haqsız olduqlarını bildikləri halda, bütün vasitələrə əl atır. Çalışırlar ki, sözdə də olsa, Dağlıq Qarabağa aidiyyətlərini təsbit etsinlər. Biz bütün istiqamətlərdə ayıq olmalıyıq ki, ermənilərlə bağlı məsələlərdə kiçik də olsa boşluq buraxmayaq".
Məhəmmədəli QƏRİBLİ
