Şəlalə Cəsur: "Uğurlu nəticənin bütün dünyaya faydası olacaq"
Mədəniyyət və turizm naziri Əbülfəs Qarayev Bakıda keçiriləcək 4-cü Ümumdünya Mədəniyyətlərarası Dialoq Forumu və onun çərçivəsində təşkil ediləcək beynəlxalq təşkilatların yüksək səviyyəli görüşü ilə bağlı müzakirələr aparmaq üçün Nyu-Yorka səfər edib.
Mədəniyyət və Turizm Nazirliyinin informasiya və ictimaiyyətlə əlaqələr şöbəsindən verilən məlumata görə, səfər çərçivəsində ilk olaraq BMT baş katibinin kabinet rəhbəri Maria Luiza Ribeiro Viotti ilə görüş keçirilib. Görüşdə Ə.Qarayev Azərbaycan Prezidenti İlham Əliyevin irəli sürdüyü Bakı prosesi və Ümumdünya Mədəniyyətlərarası Dialoq Forumu haqqında ətraflı məlumat verərək, BMT-ni dünyanın ən yüksək və nüfuzlu təşkilatı olaraq bu prosesdə fəal olmağa dəvət edib. Görüşdə BMT baş katibinin və yaxud onun yüksək səviyyəli nümayəndəsinin iştirak imkanları barədə fikir mübadiləsi aparılıb.
Daha sonra nazir Ə.Qarayev BMT baş katibinin siyasi məsələlər üzrə müavini Jefri Feltmanla görüşüb. Nazir Bakı prosesi və Ümumdünya Mədəniyyətlərarası Dialoq Forumunun BMT-nin fəaliyyəti üçün əhəmiyyəti barədə Feltmana məlumat verərək tədbirin mövzusunun "Mədəniyyətlərarası dialoqun inkişafı: insan təhlükəsizliyi, sülh və davamlı inkişaf üçün yeni imkanlar" olduğunu bildirib.
Görüşlərdə Azərbaycan Respublikasının BMT yanında daimi nümayəndəsi səfir Yaşar Əliyev və digər şəxslər iştirak edib.
BMT baş katibinin Bakıda keçiriləcək tədbirdə iştirakı nə kimi tarixi əhəmiyyətə malik ola bilər və forumun işinə hansı töhfəni verər?
Mədəniyyətşünas Şəlalə Cəsur qəzetimizə açıqlamasında bildirdi ki, 4-cü Ümumdünya Mədəniyyətlərarası Dialoq Forumunun Bakıda keçirilməsinin özü böyük bir tarixi hadisədir: "Bilirsiniz ki, son illər ərzində Azərbaycan olduqca nüfuzlu tədbirlərə ev sahibliyi edir. Belə tədbirlərin böyük əhəmiyyəti isə sivilizasiya və mədəniyyətlərin bir-birinə yaxınlaşması ilə bağlı olur. Artıq ölkəmiz beynəlxalq müstəvidə multikulturalizm, tolerantlığın vacib mərkəzi kimi tanınır. BMT-nin baş katibinin Bakıdakı tədbirdə iştirakı çox gözəl təşəbbüsdür. Çünki deyilən istiqamətlərdəki fəaliyyət birbaşa BMT-nin səlahiyyətinə aid olan məsələdir. Düşünürəm ki, BMT-nin yeni seçilən baş katibi bu dəvəti qəbul etməlidir. Çünki onun iştirakı tədbirə olan diqqəti bir qədər də artırmış olar. Bundan əlavə, onun bizi və dünyanı əhatə edən problemlərlə yaxından tanış olmaq imkanı yaranar. Artıq bir neçə istiqamətdən BMT baş katibinin Bakıda keçiriləcək forumda iştirakı ilə bağlı dəvətlər edilib. Hesab edirəm ki, bu tədbirin daha rəngarəng və dolğun keçməsi yalnız Azərbaycan üçün lazım deyil. Uğurlu nəticənin bütün dünyaya faydası olacaq".
Məhəmmədəli QƏRİBLİ
