Flora Qasımova: "Ümid edirik ki, ermənilər Mehriban xanımın çağırışını eşidib bizim torpaqlarımızdan geri çəkiləcək"
Aynur Camal: "Mehriban xanım çox haqlı olaraq erməni analarına müraciət ünvanladı"
Aprelin 3-də Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyeva 2016-cı ilin aprel döyüşləri zamanı Azərbaycan Ordusunun yaralanmış bir qrup əsgər və zabiti ilə görüşüb.
Görüşdə M.Əliyevanın iştirakı ilə "2016-cı ilin aprel döyüşlərində yaralanmış əsgər və zabitlərin yüksək texnologiyalı protezlərlə təmin edilməsi" layihəsi təqdim olunub.
Tədbirdə çıxış edən M.Əliyeva bunları deyib: "Mənim tapşırığımla sizin hər birinizə fərdi yanaşma tətbiq olunacaq və normal hərəkət dinamikasına yardım edən müasir protezlə təmin olunacaqsınız. Tapşırığıma əsasən, xüsusi işçi qrup yaradılıb. Bu qrupda çalışan insanlar həm protezlərin təminatı, həm də gələcək mərhələdə onların texniki xidmətini həyata keçirəcəklər. İyirmi gün ərzində bütün lazımi işlər həyata keçiriləcək və mənə yekun hesabat təqdim olunacaq".
Görüş zamanı M.Əliyeva erməni analarına müraciət edib. O qeyd edib ki, münaqişənin və itkinin səbəbi erməni əsgərinin Azərbaycan torpağında olmasıdır: "Buradan erməni analarına üz tuturam, söyləmək istəyirəm ki, qoymayın öz balalarınız işğal siyasətinin qurbanı olsun. Buna dəstək verməyin".
Xanım millət vəkili Flora Qasımova "Bakı-Xəbər"ə açıqlamasında qeyd etdi ki, Birinci vitse-prezident aprel döyüşlərində iştirak edənlərlə görüşən zaman Azərbaycan xalqının fikrini dilə gətirib: "Qadınlar Qurultayında çıxış edərkən mən də erməni analarına müraciət etdim. O zaman onlara bildirdim ki, müharibədə atılan hər bir güllə ana ürəyinə dəyir. Azərbaycan sülhsevər ölkədir. Bizim heç bir ölkə ilə problemimiz olmayıb. Amma ermənilər tarixən Azərbaycan torpağına göz dikiblər. Tək torpağımıza deyil, eyni zamanda mədəniyyətimizə də göz dikiblər".
F.Qasımova onu da dilə gətirdi ki, daim məcburi köçkünlərlə görüşür: "Onlar torpaqlarına qayıtmaq arzusu ilə yaşayır. Sadəcə, bunun sülh yolu ilə həll olunmasını istəyirlər. Bilirik ki, müharibə başlasa, analarımız gözü yaşlı qalacaq. Azərbaycan tərəfi dəfələrlə Ermənistana torpaqların sülh yolu ilə qaytarılmasının vacib olduğunu bildirib. İşğalçı siyasətlərinə son qoymaları barədə biz tərəfdən çağırışlar olunub. Hətta Bakıda yaşayan erməni qadınlar belə bu çağırışa qoşulub. Ümid edirik ki, onlar Mehriban xanımın çağırışını eşidib bizim torpaqlarımızdan geri çəkiləcək".
"Teleqraf" Holdingin rəhbəri Aynur Camal "Bakı-Xəbər"ə açıqlamasında qeyd etdi ki, M.Əliyeva aprelin 3-də həm azərbaycanlı, həm vətəndaş, həm də bir ana kimi erməni analarına çağırış edib: "Bütün dünya və hətta ermənilərin özləri də bilir ki, onlar başqa bir dövlətin ərazisini işğal edib. Ermənilərin bu hərəkəti beynəlxalq hüquqa ziddir. Gec-tez ermənilər işğal etdikləri torpaqları azad edəcək. Mehriban xanım bunları nəzərə alaraq deyib ki, erməni əsgərinin Azərbaycan torpağında nə işi var? Erməni əsgəri başqa bir dövlətin ərazisinə daxil olubsa, bu, beynəlxalq hüquq normalarına qarşıdır. Başqa dövlətin ərazisinə icazəsiz daxil olan ordunun aqibəti hər kəsə məlumdur. Zənnimcə, Mehriban xanım çox haqlı olaraq erməni analarına müraciət ünvanladı".
Sonda A.Camal qeyd etdi ki, Azərbaycan mediası Birinci vitse-prezidentin addımlarını yüksək qiymətləndirir.
Günel CƏLİLOVA
