Prezident...deyəndə... bir vətənpərvərin obrazını gördüm...

Tarix: 25.07.2015 / 03:51
Bölmə: Gündəm

Cənab Prezidentlə belə tərkibdə görüşdə ikinci dəfə idi iştirak edirdim. İlk dəfə 2013-cü ilin noyabrında daha geniş tərkibdə görüşmüşdük. Bu dəfə tərkib yalnız MŞ İdarə heyətindən ibarət olmaqla bir qədər məhdud idi. Cənab Prezidentin çıxışından ilkin mesajlarımızı aldıq. Yəqin ki, hələ bir müddət jurnalist cameəsində, oxucular arasında çıxışın detalları müzakirə olunacaq, daha dərin mesajlar çıxarılacaq.

Bir sözlə, "Prezident bu məqamda nə demək istədi" sualı ətrafında müzakirə və düşüncələr davam edəcək və hər kəs gəldiyi qənaəti, yəqin ki, mətbuat fəaliyyətində nəzərə alacaq. Mətbuat adamları üçün çox önəmlidir ki, Prezident dövlətimiz qarşısındakı mühüm hədəflərin əldə edilməsində mətbuata xüsusi rol ayırır, ona böyük əhəmiyyət verir. Mən bir daha əmin oldum ki, Prezident İlham Əliyev dövlətimizin ərazi bütövlüyü və suverenliyi mövqeyində, bütün çətinliklərə baxmayaraq, qələbə anınadək qəti qərarla gedəcək. Ölkəni insan haqları və demokratik yola tam uyğunlaşdırmaq üçün işlər görməkdə davam edəcək, ən əsası isə, bu gün artıq xalqın dəyərinə çevrilmiş daxili sabitliyə qəsd edənlərin yolunu həmişə kəsəcək. Bunlar jurnalist olmaqdan qat-qat çox, bir vətəndaş kimi bizim üçün dəyərlidir. "İstəyirəm siz də biləsiniz ki, ermənilər bizim əbədi düşmənlərimizdir". Prezident bu sözləri deyəndə mən onun şəxsində vətən torpaqları naminə öz həyatını belə heç bir dəyər tanımayan erməni zalımlığının qarşısında risqə qoymaqdan çəkinməyən bir vətənpərvərin obrazını gördüm. Adi insanların və dövlət başçısının vətənpərvərliyi məzmunca oxşar olsa da, doğura biləcəyi nəticələrə görə qətiyyən müqayisə oluna bilməz. Adi insanların vətənpərvər olması vətəndaşlıq borcudur, prezidentin vətənpərvərliyi həm də onun fədakarlığıdır. Üstəlik biləndə ki, ədalətsiz dünya siyasətçiləri fədakarlıq zirvəsinə qalxa bilmiş vətənpərvər prezidentləri sevmir, Prezidentin vətənpərvərliyi ikiqat fədakarlıq anlamı daşımağa başlayır. Əslində fədakar və vətənpərvər prezidentləri öz xalqından başqa digər dövlətlərin siyasətçiləri sevmir, çünki bu şəxsiyyətlər bir çoxlarının qəsbkar niyyətləri qarşısında maneə kimi dayanır.

Prezident dövlətçilik maraqları ətrafında strateji milli birliyə nail olmağımızı da xüsusi vurğuladı. Həm də xeyli təvazökar tərzdə etdi bunu. Sanki bu böyüklükdə nəticənin əldə olunmasında onun özünün elə bir nəzərəçarpan rolu olmayıb və ya biz MŞ üzvlərinin bu sahədə rollarımız onunkundan artıqdır. Bu gün mediamızın dövlətçilik ətrafında əsasən həmrəy və mütəşəkkil mövqe tutduğunu söyləyərkən Prezidentin gözündə böyük məmnunluq gördüm. Həmin təvazökarlıq, təbii ki, öz yerində idi... Sanki mediamızın dövlətçilik çevrəsində bərqərar olması onun nailiyyəti deyilmiş. Əslində isə o sevinə bilər ki, mediamız heç vaxt indiki qədər dövlətçilik prinsipləri üstündə bərqərar olmadığı üçün bu böyük nəticəyə görə ona minnətdar olmalıdır. 140 ildə milli mətbuatımız irili-xırdalı çoxlu sayda nəticələrə sahiblənib. Detallaşdırmayacağam. Tək onu deyim ki, bu 140 ildə milli mediamızın ən böyük uğuru məhz dövlətçiliklə vəhdət halına, birlik anına gələ bilməyindədir.

Əvvəlki dövrlərin hamısına bir-bir baxın və müqayisə edin, nəticə çıxarın ki, hansı dövrdə dövlətlə media bir-birinə qarşılıqlı dəstəkçi və himayədar olub. Mərhum Həsən bəy Zərdabinin öz dövrünü götürək. Kim idi mətbuata himayəçilik edən? Tək-tək xeyriyyəçiləri çıxmaq şərtilə... O zamankı dövlətin mətbuat himayəçiliyindən heç danışmağa dəyməz.

Hadisələr də göstərdi ki, cəmi 56 saydan sonra bağlanan "Əkinçi" qəzeti o zamankı dövlətin nəzərində milli mətbuatı formalaşdırmaq layihəsi yox, onu birdəfəlik məhv etmək layihəsi idi ki, qoy bir də heç vaxt azərbaycanlılar milli dildə mətbuat yaratmaq eşqinə düşməsinlər və Zərdabinin "uğursuz" qəzetçiliyindən ibrət götürsünlər. Sonra gəldi Cumhuriyyət dövrü. O zamankı dövlətimiz azad mətbuat üçün nəsə etməyə qurcalansa da, gücünün yetərsizliyi sadəcə niyyət nümayişindən başqa heç bir nəticə hasil etmədi. Sovet dövrü daha pis oldu. Milli dildə mediamızın qəzet-jurnal nümunələri, azərbaycanlı jurnalistlər nəsli olsa da, milli ruhlu mediamız "dar dəmir qəfəsə salınmış timsah balası kimi böyüyüb kökəldikcə qəfəsin ölçülərinə uyğun olaraq ətini tökdü", yetişə bilmədi.

Dövlətçiliklə milli mediamızın vahidləşməsi prosesi üçün münbit şərait məhz müstəqillik illərində yetişdi. İlham Əliyevin dövründə isə öz apogeyinə çatdı. Bir halda ki, İlham Əliyev dövlətin, bütün xalqın Prezidenti olaraq medianın çağırışlarına reaksiya verir, hətta sosial ədalətsizlik və bəlalarla mübarizədə onu özünün böyük dəstəkçisi adlandırır, mediamıza dövlət dəstəyinin dönməzliyinə təminat verir, jurnalistləri tarixdə heç vaxt görmədikləri hörmətə mindirir, bir sənət kimi jurnalistikanı stimullaşdırır, media qurumlarımızı məsləyi naxoş olan əcnəbi mərkəzlərin təsiri altına düşməkdən qoruyur, onda niyə mediamız dövlətçilik və onun simvolu olan Prezidentin qarşısında öhdəlik götürməyə mənəvi borclu olmasın?! Niyə Prezidenti əmin etməsinlər ki, bir lider-şəxsiyyət və dövlətin simvolu olaraq onu heç vaxt sındırmayacaqlar?!! Niyə Prezidentə söz verməsinlər ki, Siz İlham Əliyev suveren dövlətçilik mövqeyində dayandıqca mediamız Sizdən uzaqlaşmayacaq!! Mediamızın gücü dövlətçilik və Prezidentlə birlikdə olmaqdadırsa, niyə dünyanın heç bir ölkəsində əldə edilməyən bu uğurlu və unikal modelə göz yummalıyıq?!! İllər boyu özünü heç bir dövlətin, hakimiyyətin tabeliyində olmayan, azad, müstəqil media orqanları kimi təqdim edən transmilli korporasiyalar əslində son dövrlərdə məhz hansısa dövlətlərin əlində ideoloji diversiya alətləri kimi ifşa olundular. Demək, onlar pərdə arxasında öz dövlətləri ilə bir yerdədirlər, məhz bu örtülü birliyin əks-sədası başqa bir sıra ölkələrdə xaos, qan-qırğın, kütləvi həyəcanlar və hətta vətəndaş müharibələri doğurur. Detalları ilə təhlil etməli fenomendir. Üzdə müstəqil, pərdə arxasında örtülü iş birliyi, başqa ölkələrdəki əks-sədası isə xaos və qan... Dünyada dövlət-media münasibətlərinin belə qorxunc formullarının olduğu bir vaxtda biz nədən Azərbaycanın hazırkı şəffaf dövlət-media münasibətləri modeli ilə qürur duymayaq, dövlətimizin və onun simvolu olan Prezidentin yanında olmayaq? Həm də bu birliyin pərdəarxası elementləri yoxdur və hər hansı bir ölkənin iç vəziyyətini qatıb-qarışdırmaq kimi niyyətimiz, onlarda tökülə biləcək qan-qırğından zövq almaq kimi manyakal keyfiyyətimiz yoxdur. Heç kimin daxili işlərinə qarışmadan öz dövlətimizi xaricdən gələn qəsdlərdən qorumaq istəyirik. Vəssalam! Bunun naminə, buna doğru dövlətçiliklə birlikdə olmaqdan güclü seçim nə ola bilər ki?!

Təəssüf ki, seçimi bu cür etməyənlər də var... Dövlətçiliklə birlikdə olmağın gücünü anlamayanlara nə yazıq...

Azərbaycanda hələ 2007-ci ildə siyasi partiyalı mövqedən imtina edərək müstəqil media mövqeyinə keçməkdə ilk nümunə göstərən qəzetin baş redaktoru olaraq əminliklə deyirəm ki, partiyalı media orqanı dövlətçilik mövqeyində ardıcıl bərqərar ola bilməz. Çünki o media orqanı öz prinsiplərindən yox, xidmət etdiyi siyasi qüvvənin prinsiplərindən asılıdır. 2007-ci ildə "Bakı-Xəbər" qəzeti Azərbaycan reallığında ilk nümunə kimi partiyalı mövqedən müstəqil media prinsiplərinə keçid edəndə demişdik ki, biz ilk olduq, ancaq son olmayacağıq, proses davam edəcək və partiyalı mövqedən zaman-zaman imtina edən media rəhbərlərinin sayı artacaq. Hər şeyin dediyimiz və gözlədiyimiz kimi olduğunu bu gün cərəyan edən proseslər aydın köstərir. Xalis mətbuat prinsiplərinə söykənərək belə seçim edənlər bəzi opponentləri tərəfindən yumşaq formada "hakimiyyətlə barışmaq" kimi qərəzli və kin-küdürətlə işarələnsə də, kimlərin nə deməsindən asılı olmayaraq, bu ən doğru seçimdir. Başqa cür necə olmalıdır?

Mən hələ o zaman mətbuatda demişdim ki, insana iki çiyin ona görə verilməyib ki, hərəsində bir-birindən kəskin fərqli və hər ikisi ağır yük daşısın. Çiyinlərin hər ikisi eyni bir yükün altına veriləndə isə, o yükün ağır, ya yüngül olmasından asılı olmayaraq nəticə böyük olur. Bu gün Azərbaycan mediasında hərtərəfli formalaşmış, təkcə bir mətbu orqanın deyil, istənilən dövlət vəzifəsinin yükünü və məsuliyyətini ustalıqla daşıya bilən sanballı media rəhbərləri yetişib. Onlar sayca çox deyillər, xüsusi peşəkar hazırlıq tələb edən bir neçə dövlət postu istisna olmaqla, qalan bir çox digər səviyyələrdə onlara göstərilə bilən etimadı yüksək səviyyədə doğrultmaq gücündədirlər.

İcra başçısı, nazir müavini, nazir, idarə rəisi, deputat, diplomat, səfir və sair - nəzərdə tutduğum bir neçə baş redaktorun şəxsində belə potensial səlahiyyət sahiblərini görürəm. Əlbəttə, bizim gördüyümüz şərtlər həlledici deyil. Əsas odur ki, dövlətçilik sistemində medianı əhəmiyyətli bir statusa çatdıra bilmiş Prezident cənabları kadr siyasətinin bu istiqamətini də açmağın gərəkli olub-olmadığını nəzərdən keçirsin. Ancaq məntiq artıq bu gündən diqtə edir ki, media bir struktur olaraq dövlətçilik prinsiplərinə sıx qovuşa bilibsə, deməli, media rəhbərlərinin özlərinin də dövlətçiliklə praktik olaraq birləşməsi mümkündür. Sirr deyil ki, mediamızın hər cür siyasi maraqları kənara ataraq dövlətçilik prinsipi üzərində dayanmağı bacarması ümummilli uğur kimi daha çox Prezident İlham Əliyevin, onun aparatında müvafiq şöbənin, KİV DF-nin, MŞ-nın, ölkənin bir neçə aparıcı media rəhbərinin səyləri ilə əldə olunub.

Yəni mətbuatımızın dövlətçilik prinsiplərinə yiyələnməsi həm də bugünkü media rəhbərlərinin sabahkı dövlət xadimlərinə çevrilməsi şansının açılması deməkdir. Azərbaycan mediası inkişaf relsləri üzərində dövlətçilik prinsipinə doğru irəlilədikcə maraqlı nüanslar meydana çıxır. İlham Əliyevin 2007-ci ildə başlatdığı bu prosesin hələ bundan sonra hansı mərhələləri keçəcəyini gələcək göstərəcək. Ancaq bu gün şəksizdir ki, biz ilk uğurlu mərhələni keçirik - mediamız prinsipial olaraq dövlətçilik prinsiplərinə tam sahiblənib. İndi media rəhbərlərinin ən müxtəlif statuslarda dövlət xadimlərinə çevrilməsinə şans verən ikinci mərhələ açıla bilər. Doğrudur, indiyə qədər mediadan dövlət təşkilatlarının mətbuat xidmətlərinə sıravi jurnalistlər səviyyəsində keçid nümunələri çox olub. Baş redaktorların timsalında daha yüksək dövlət qulluğuna keçid faktları isə hələlik yalnız açılmış perspektiv halındadır. Yəqin ki, cənab Prezident medianın dövlətçiliklə birləşməsinə son nəticə kimi baxmayacaq və prosesin açdığı yeni mərhələlərin hər birinin çağırışlarına uyğun addımlar atmaqda davam edəcək. Media qurumları dövlətləşə bilirsə, nədən media rəhbərlərinin özləri də dövlətləşməsin?! "Sizin timsalınızda öz dəstəkçilərimi görürəm" deyən Prezidentin bu sözlərindən daha uzağa gedən nəticələr çıxarmaq mümkündür. Hər bir proses məntiqi sonluğa çatması və bütövləşməsi ilə daha da gözəlləşir. Əsas odur ki, baş redaktorların bir çiynində siyasətin, o biri çiynində mətbuatın yükünü daşıması kimi əcaib mərhələni arxada qoya bildik... Görək irəlidə nə var...

Aydın QULİYEV

DİGƏR XƏBƏRLƏR

Tarix: 30.10.2026 / 06:41

Yəhudilər erməni monastırına tüpürdülər

Tarix: 29.10.2026 / 17:00

Bir Millət, İki Dövlət, Bir Ürək: Türkiyə Cümhuriyyətinin 103-cü ildönümü münasibətilə İctimai Nəzarət Təşkilatının Təbrik Bəyannaməsi

Tarix: 28.10.2026 / 12:51

ROZA TÖREKULOVNA AYTMATOVANIN ƏZİZ XATİRƏSİNƏ

Tarix: 28.10.2026 / 08:35

Türkiyədəki “sərmayə olayı” Pasifik Holding-i də vurdu - aktivləri donduruldu

Tarix: 28.10.2026 / 06:26

Türkiyədə səs-küylü “Starlink əməliyyatı” - 85 nəfər saxlandı

Tarix: 27.10.2026 / 13:54

"Bakı bu cür beynəlxalq forumlar vasitəsilə mədəniyyətlərarası dialoqa mühüm töhfə verə bilər" - Ozodbek Nazarbekov

Tarix: 27.10.2026 / 13:30

Penitensiar Xidmətə yeni rəis təyin edildi

Tarix: 27.10.2026 / 10:28

Dubay məhkəməsi Rusiya neftinin satışından 700 milyon dollardan çox vəsaiti dondurub - işin içində azərbaycanlılar da var…

Tarix: 26.10.2026 / 06:58

Vuçiç seçkidə məğlubiyyətini rəsmən bəyan etdi

Tarix: 24.10.2026 / 08:38

Serbiyada etirazlar pik həddə - gənclər Vuçiçi devirməyə qərarlıdır

Tarix: 22.10.2026 / 15:01

44 günün fövqündə: milli iradənin və tarixi yaddaşın təntənəsi

Tarix: 20.10.2026 / 22:19

İran XİN sözçüsü Azərbaycana tövsiyə verməyə qalxdı - həm də insan haqları mövzusunda…

VİDEO

Tarix: 17.10.2026 / 17:10

Aydın Quliyev Mətbuat Şurasında seçkilərə qatılmamasının səbəblərini qurultayda açdı... - VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 05.11.2026 / 21:49

Banklarda 4.6 milyard manat pul yatıb qalıb, kredit bazarında böhrandır... Bu necə olub?...

Tarix: 05.11.2026 / 20:15

Avropa Ermənistanı Rusiyanın əlindən alır - Kreml qəzəb püskürür...

Tarix: 05.11.2026 / 17:34

İran Trampsayağı ad iddiasına başladı - "Xəzər" yox, "Kaspian"?..

İşğaldan azad rayonlarımızda insan faktoru həlledicidir - Məskunlaşmanın əsas istiqamətləri...