S. Novruzov bildirib ki, YAP hazırkı parlamentdə 72 deputatla təmsil olunub, hazırda bu dairələrdən 5-i boşdur: "Hazırkı deputatlarla bağlı tədqiqat başa çatdırılıb. Yerlərdə onların fəaliyyəti, insanlar tərəfindən qəbul olunması, rayonda təbliğat-təşviqat kampaniyasında iştirakı, seçicilərlə görüşlər keçirməsi sahəsində fəaliyyətləri, seçicilərin maraqlarını təmsil etmək baxımından parlamentdə qanunvericilik təşəbbüsləri ilə çıxışları, beynəlxalq təşkilatlarda Azərbaycanı təbliğ etməsi, dövlətçiliyə sədaqəti kimi amillər tədqiq olunub və yekunlaşıb. Digər dairələrdə də işlər aparmışıq, çünki bu dəfə YAP bütün dairələrdən namizədlər irəli sürməyi planlaşdırır. Bəzən olub ki, tanınmış ziyalılar, Azərbaycanda çox hörmətli olan insanlar və iqtidaryönlü partiyaların rəhbərləri olan yerlərdə biz namizəd irəli sürmürdük. Bu dəfə də bu məsələ YAP İdarə Heyətinin qərarından asılıdır".
S. Novruzov qeyd edib ki, keçmişdə namizədliyi irəli sürülüb, seçilməyən YAP-çılar, həmçinin bir dəfə deputat olub, sonradan parlamentə seçilməsə də, partiya həyatında fəal iştirak edən insanlar var: "Bununla bağlı da tədqiqat aparılıb, sənədlər toplanıb. Avqust ayında bu məsələyə bir daha baxılacaq və partiyanın rəhbərliyinə, rəhbər orqanlarına təqdim olunacaq".
İlkin mərhələdə YAP-ın hazırkı deputatlarından neçə faizinin siyahıda yer almamasına gəlincə, S. Novruzov qeyd edib ki, bu barədə qərarı partiya rəhbərliyi verəcək: "Ancaq onlardan ilkin namizədlər siyahısında yer almayanlar da, nəzərdə tutulan 4-5 prinsipdən bir neçəsinə cavab verməyənlər də var”.
S. Novruzov deyib ki, YAP bütün namizədləri üçün vahid plakat çap etdirməyi də qərarlaşdırıb: "Həmçinin seçki ilə bağlı partiyamızın üzərinə düşən digər texniki işlər görülüb".
Siyavuş Novruzov qeyd edib ki, Müsavat və AXCP-nin kitabı bağlanıb. S. Novruzov deyib ki, ümumilikdə Azərbaycanda 50-yə yaxın siyasi partiya dövlət qeydiyyatından keçib və bir hissəsi qarşıdan gələn parlament seçkilərində iştirakla bağlı bəyanat verib.
"Seçilmək hamının istəyi, arzusudur. İkincisi, siyasi partiyaların maliyyələşməsi ilə bağlı qanun qəbul etmişik və orda göstərilib ki, baryeri keçən partiya dövlət büdcəsindən maliyyələşir. Buna görə də bu seçkilərdə parlamentdə yer qazanmasa belə, müəyyən səs alıb dövlət büdcəsindən vəsait almaq istəyi də partiyalara əlavə stimuldur. Ötən seçkidə o baryeri aşan partiya olmadığı üçün həmin vəsait dövlət büdcəsində qalır. Ona görə də hər bir partiya bu seçkilərdə aktiv iştirak etmək istəyir" deyə Novruzov qeyd edib.
YAP funksioneri Müsavat və AXCP-dəki vəziyyəti "çox acınacaqlı" adlandırıb.
O deyib ki, Müsavat Partiyasında ədalətsiz qurultay keçirilməsi nəticəsində partiya parçalanıb: "Təşkilatın yaradıcıları, bərpaediciləri bir tərəfə çəkilib, partiyanı öz monopoliyasında saxlayan 5-6 adam başqa bir tərəfdədir. Ona görə də partiyada seçki yox, hələ daxildə həmrəylik yaradılması ilə bağlı bir məqama gəlib çata bilməyiblər. O baxımdan da bu seçkilərdə Müsavat Partiyası nə namizəd irəli sürə biləcək, nə də həmin namizədin təbliğatı, təşviqatı, onun qələbə qazanması üçün hər hansı addım ata biləcəklər. Hər bir seçici sual verəcək ki, əvvəlcə sizin daxilinizdə bir həmrəylik var?! Müsavat Partiyası artıq tarixin arxivinə getmək ərəfəsindədir. Ola bilər ki, bu partiyada ayrı-ayrı şəxslər fərdi qaydada namizədliklərini irəli sürsünlər".
S. Novruzov AXCP ilə bağlı da fikirlərini bildirib: "AXCP çoxdan Azərbaycan xalqının, seçicisinin deyil, xarici maraqlara xidmət edən və oradan maliyyələşən, dəstək alan, onların göstərişlərini yerinə yetirən quruma çevrilib. Erməni lobbisindən alınan yardımla erməni qüvvələrinə, onların ideya və məqsədlərinə xidmət edirlər. AXCP-də az-çox Azərbaycan dövlətçiliyini, xalqını düşünən insanlar artıq orada qalmırlar. Artıq iki sədr müavini - Razi Nurullayev, daha sonra Əbülfəz Qurbanlı partiya ilə yollarını ayırıb. Eyni zamanda Sumqayıt və digər rayonlarda təşkilat sədrləri, şöbə müdirləri oradan uzaqlaşıblar. Orada Əli Kərimli, sürücüsü, cangüdəndən başqa adam qalmayıb, onlar da öz tədarüklərini hərtərəfli görüblər. İngiltərə banklarında hesablarına kifayət qədər vəsait toplanıb, xaricdə ayrı-ayrı yerlərdə mülkləri var, uşaqları xaricdə təhsil alır, ailələri xaricdə yaşayırlar. Özləri ancaq burada oturub onları maliyyələşdirən qrupların maraqlarını həyata keçirirlər. Bu baxımdan da onların da parlament seçkilərində heç bir şansları yoxdur Beləliklə, iki partiyanın- Müsavat və AXCP-nin kitabı bağlanıb".
S. Novruzov qeyd edib ki, bu iki partiyanın funksionerləri seçkilərdə "qarayaxma ilə məşğul olacaqlar".
