Bu gün M.F.Axundzadə adına Azərbaycan Milli Kitabxanasında "Azərbaycan mətbuatı və milli-mənəvi dəyərlərimiz" mövzusunda konfrans keçirilib. Trend xəbər verir ki, tədbirdə çıxış edən Mədəniyyət və turizm naziri Əbülfəs Qarayev bildirib ki, Azərbaycanda mövcud media məkanı tamamilə sərbəstdir.
Nazir qeyd edib ki, 140 il əvvəl işıq üzü görən "Əkinçi" qəzeti Azərbaycan mətbuatının inkişafına və gələcəyinə, o zaman çətin dövr yaşayan ölkənin taleyinə böyük təsir göstərib.
Onun fikrincə, müasir dövrdə müharibə şəraitində yaşayan Azərbaycan mətbuatı çox həssas olmalı, düşmənin dəyirmanına su tökməməli, ucuz sensasiya dalınca qaçmamalıdır.
Azərbaycan Prezidenti Administrasiyasının İctimai-siyasi məsələlər şöbəsinin müdir müavini Ərəstun Mehdiyev isə qeyd edib ki, mətbuatın cəmiyyətdə tutduğu yer çox əhəmiyyətlidir və onun üzərinə böyük missiya düşür: "Bu gün dövlət siyasəti də ona yönəlib ki, Azərbaycan mətbuatı inkişaf etsin, öz işini yeni dövrün tələblərinə görə qura bilsin. Bununla yanaşı, mətbuat da öz məsuliyyətini artırmalı, bu gün müzakirə etdiyimiz məsələlərlə bağlı bir çox aspektlərə diqqət yetirməlidir. Əminəm ki, Azərbaycan mətbuatı bu vəzifələrin öhdəsindən gələcək, 140 illik missiyanı bundan sonra da uğurla davam etdirəcək".
Mətbuat Şurasının (MŞ) sədri Əflatun Amaşov və Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİV DF) sədri Vüqar Səfərli də mətbuatın ölkə həyatındakı mühüm rolundan, onun milli-mənəvi dəyərlərimizin qorunmasında tarixən oynadığı əhəmiyyətindən danışıblar.
KİV rəhbərlərinin, dövlət rəsmilərinin, elm xadimlərinin, ictimai təşkilatların təmsilçiləri, ziyalılar iştirak etdiyi konfransda Azərbaycan milli mətbuatının 140 ildə keçdiyi yola nəzər salınıb, müasir dövrdəki inkişaf perspektivləri təhlil olunub, mövzu ətrafında müzakirələr aparılıb.
Tədbirdə həmçinin Azərbaycan Respublikasının Mədəniyyət və Turizm Nazirliyinin və Azərbaycan Mətbuat Şurasının "Milli rəqslərimiz milli dəyərimizdir" mövzusundakı müsabiqəsinin qalibləri də mükafatlandırılıb.
Qeyd edək ki, Azərbaycan milli mətbuatının 140 illik yubileyinin keçirilməsi haqqında Azərbaycan Respublikası Prezidentinin Sərəncamı ilə bağlı hazırlanmış tədbirlər planına uyğun olaraq keçirilən tədbirin təşkilatçıları Azərbaycan Respublikasının Prezidenti Administrasiyası, Azərbaycan Respublikasının Mədəniyyət və Turizm Nazirliyi, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu və Azərbaycan Mətbuat Şurasıdır.
