Mətləb Salahov: "Medvedevin bəyanatlarından aydın olur ki, Putin Ukrayna məsələsində Trampa da güzəşt etməyəcək"
Bu həftə ABŞ-da keçiriləcək növbəti prezident seçkiləri həm də Co Baydendən sonra onun "qızıl əsəri" sayılan Ukrana müharibəsinin sonrakı gedişatını da gündəmə gətirib. Açıq şəkildə Qərbin Rusiya əleyhinə siyasi maraqları üçün ortaya atılan bu qanlı müharibə oyunu, artıq avropadakıların da səbrini tükəndirib. Rusiyaya qarşı bütün Qərb ölkələrinin Ukrayna cəbhəsində birləşməsi, müharibənin gedişatında heç bir əhəmiyyətli dəyişikliyə səbəb olmayıb. Əksinə son bir həftədə Rusiya ordusu Ukraynaya aid olan yaşayış məntəqələrində irəliləməkdədir. Belə görünür ki, rəsmi Moskva Ukrayna müharibəsində danışıqlar və güzəşt barədə fikirləşmir. Rusiya Təhlükəsizlik Şurası sədrinin müavini olan Dmitri Medvedyev də Donald Trampın Ukraynadakı müharibəyə son qoymaq şansının olmadığını bildirib. D.Medvedyev qeyd edib ki, D.Tramp müharibəni dayandıra bilməz. Nə bir gündə, nə bir ayda. Onun dediyinə görə D.Tramp prezident seçilsə də müvafiq sistemin qoyduğu qaydalardan kənar çıxa bilməyəcək. Keçmiş Rusiya prezidenti qeyd edib ki, D.Tramp Ukrayna münaqişəsini birbaşa həll etməyə risq edərsə, o zaman onu Con Kennedinin taleyi gözləyir. Belə görünür Rusiya da D.Trampdan əlini tamamilə üzmüş vəziyyətdədir, ya da Ukrayna məsələsində heç bir güzəşt barədə düşünmür.
"Haqlı sual ortaya çıxır,- balaca Ukrayna üçün az qala trilyard dollara yaxınlaşan bu qədər hərbi yardım paketi nəyə lazımdır və hara xərclənir?"
Jurnalist-ekspert Mətləb Salahov "Baki-xeber.com" saytına açıqlamasında bildirib ki, proseslərin belə əks istiqamətə gedişi, Rusiyanın D.Trampla bağlı mövqeyindəki açıq dəyişiklik Ukrayna müharibəsinin sülh və beynəlxalq hüquq çərçivəsində həllinə dair ümidləri də kölgə altına salır. "Dmitri Medvedyevin məlum bəyanatı göstərir ki, Vladimir Putin Ukrayna məsələsində prezident seçilsə belə Donald Trampa da güzəşt etməyəcək. Əksəriyyətin Rusiya ilə yaxşı münasibətlərdə olduğu deyilən D.Trampın prezident seçilməsindən sonra bu hərbi münaqişənin başa çatacağı barədəki ümidləri də artıq puç olmağa başlayıb. Halbuki bir müddət bundan əvvəl Rusiya rəsmiləri bunun tam əksini deyirdilər. Onlar D.Trampın hakimiyyətə gəlişi ilə Ukraynadakı gərginliyin tamamilə aradan qalxacağına ümidvar olduqlarını deyirdlər. Bəs indi nə oldu? Görünür ki, son bir ay ərzində Rusiya ordusunun güclü əks hücumları və Qərbin Rusiya əleyhinə yüzlərlə sanksiya qərarının heç bir işə yaramaması Moskvanı daha çox ruhlandırır. Həm də Kremldəkilər, onların dili ilə ifadə etsək "xüsusi hərbi əməliyyatın" məhz Moskvanın planlaşdırdığı məqsədlərə nail olunmasına qədər davam etdirilməsini istəyirlər. Bu isə o deməkdir ki, bu ay ABŞ-da keçiriləcək prezident seçkilərinin nəticələri Ukrayna böhranına təsirsiz ötüşəcək. Çünki əgər V.Putin Medvedyevin dili ilə D.Trampla da heç bir razılıq əldə olunmayacağını indidən açıq şəkildə bəyan edirsə, deməli bu mənasız və sürüngən müharibə yalnız V.Putinin istəkləri reallaşandan sonra başa çata bilər. Həm də əksər nüfuzlu Qərb nəşrləri də bu müharibəni silah mafiyasının qanlı biznesi kimi təqdim edirlər. Diqqət edək: Hər həftə neçə-neçə Qərb ölkəsi Ukraynaya azı 10 milyon dollarlıq silah, texniki təchizat və maliyyə yardımı barədə rəsmi açıqlamalar verirlər. Üstəlik mən hələ ABŞ, Almaniya, Fransa, Böyük Britaniya kimi NATÖ güclərinin milyardlıq hərbi yardım paketlərindən danışmıram. Haqlı sual ortaya çıxır,- balaca Ukrayna üçün az qala trilyard dollara yaxınlaşan bu qədər hərbi yardım paketi nəyə lazımdır və hara xərclənir? Bu ayrılan silah-sursat heç bir irəliləyiş olmayan lokal tipli hərbi əməliyyatda necə sərf edilib bitirilə bilər axı?. Üstəlik nəzərə alsaq ki, Ukrayna Prezidenti Vladimir Zelenski də açıq şəkildə Qərb mətbuatına açıqlamalarında elan edilən bu hərbi yardım və maliyyə dəstəyinin heç cüzi hissəsinin də onlara çatmadığını bəyan edirsə, o zaman Ukraynadakı qanlı müharibənin qaranlıq sirlərinə də işıq düşməyə başlayır. Artıq görünən odur ki, dünya gücləri Ukraynadakı qanlı bazarlığın tez başa çatmasında maraqlı deyillər. Ukrayna böhranı qaranlıq və qanlı düyün kimi hər gün bir qədər də çətinləşir."
Namiq Quliyev
