Azərbaycanın ilk hərbi jurnalistlərindən biri olan, istedadlı yazıçı, tanınmış publisist, Qarabağ müharibəsi veteranı Vahid Məhərrəmovun avqustun 21-də 56 yaşı tamam oldu. O, yaradıcı ruhlu bir insan kimi bu günədək keçdiyi ömür yolunda sözün qüdrətinə, sözün hikmətinə güvənib. Onun məqalələri, bədii əsərləri zəngin mənəvi dünyasının güzgüsüdür və dürüst vətəndaşlıq mövqeyinin ifadəsidir.
V.Məhərrəmov 1961-ci ildə Zəngilan rayonunun Babaylı kəndində anadan olub. Onun həyat xatirələrində Zəngilanlı günlərin xoş anları və Zəngilansız günlərin acısı qovuşur, çətindir bu ovqatı yaşamaq, ancaq təbiəti etibarilə nikbin adamdır Vahid müəllim.
Zəngilanın ziyalılarının, oxuduğu orta məktəb müəllimlərinin vətənpərvərliyi, ana dilimizə ehtiramı, milli-mənəvi dəyərlərimizə sədaqəti onun dünyagörüşündə silinməz izlər buraxıb. Orta məktəb illərindən ədəbiyyata, mətbuata maraq göstərib və beləcə, tale yolları onu jurnalistikaya gətirib. Bakı Dövlət Universitetinin jurnalistika fakültəsinin məzunu olan V.Məhərrəmov mətbuat sahəsində ilk addımlarını "Qaradağ" qəzetində atıb.
O uzun illər mətbuatımızda əzmlə çalışaraq təqdirəlayiq yol keçib. Fəaliyyətinin böyük bir hissəsi hərbi jurnalistika ilə bağlıdır. Hərbi jurnalistikamızda ilk cığır açan jurnalistlərimizdən biridir. 1992-ci ilin dekabr ayında ehtiyatdan hərbi xidmətə çağırılıb. Hərbi jurnalist kimi fəaliyyətə Daxili Qoşunların "Əsgər" qəzetində başlayıb. Sonra Müdafiə Nazirliyinin "Azərbaycan Ordusu" qəzetində işini davam etdirib. "Əsgər", "Azərbaycan Ordusu", "Sərhəd", "Bakı", "525-ci qəzet", "Kaspi", "Ədalət" qəzetlərində dərc olunan məqalə, reportaj və oçerkləri Qarabağ müharibəsində döyüşçülərimizin şücaətini, ermənilərin torpaqlarımıza hərbi təcavüzünün doğurduğu faciələri, ordumuzun formalaşması və inkişafı məqamlarını dolğun əks etdirməklə, maraqlı faktlarla zəngindir. Hərbi jurnalist kimi istər döyüşlər getdiyi illərdə, istərsə də atəşkəs dövründə dəfələrlə ön cəbhədə ezamiyyətdə olub, müharibənin hər üzünü görüb, odlu-alovlu səngərləri qarış-qarış gəzib. Ordumuzun elə bir hərbi hissəsi yoxdur ki, V.Məhərrəmovu tanımasınlar, onun yazılarını oxumasınlar. Bu imza şəhid ailələrinə, veteranlara da yaxşı tanışdır.
V.Məhərrəmovla mənim ilk tanışlığım 1993-cü ilin fevralında ön cəbhədə olub. O, hərbi jurnalist kimi Daxili Qoşunların Ağdərədə yerləşmiş hərbi hissəsinə ezamiyyətə gəlmişdi. Mən ön cəbhədən Daxili Qoşunların "Əsgər" qəzetinə yazılar göndərirdim. Ona görə də Bakıdan hərbi jurnalistlər döyüş zonasına gəldikdə məni soraqlayır, imkan olduqda görüşürdük. V.Məhərrəmovun yazıları biz - döyüşçülərə mənəvi ruh verirdi. O ölümlü-itimli günlərdə bizim ümid aşılayan, çətin anlarda iradəmizi toparlaya bilməyimizə güc verən sözə ehtiyacımız böyük idi. Onunla ilk tanışlığımda müharibə haqqında söhbət etmişdik, cəbhə gündəliyi yazıb-yazmamağımla maraqlanmışdı. Bu qeydlərimi qoruyub saxlamağı tövsiyə etmişdi. Sonradan müxtəlif vaxtlarda yollarımız kəsişib, həmişə bir-birimizi axtarıb əlaqə saxlamışıq. Bu münasibətlərə mən böyük dəyər verirəm.
Hərbi jurnalistikada, ümumən mətbuat sahəsində ondan öyrənməli cəhətlər çoxdur. V.Məhərrəmovun məhsuldar jurnalist fəaliyyəti, peşəkarlığı, həyat təcrübəsi gənc jurnalistlərə örnəkdir.
2016-cı ildə mayor hərbi rütbəsində ehtiyata buraxılan və bununla hərbi xidmətini ləyaqətlə başa vuran V.Məhərrəmov bu gün Naxçıvanski adına Hərbi Liseydə çalışır. Bugünkü işi də gənc nəslin hərbi-vətənpərvərlik tərbiyəsi ilə sıx bağlıdır.
Vətənə qələmi ilə xidmət etmək onun həyat missiyasının əsas məramıdır. V.Məhərrəmovun bədii yaradıcılığı özünəməxsus dəst-xətti, çoxşaxəli mövzu axtarışları, bənzərsiz emosional çalarları, oxunaqlı dili ilə fərqlənir. O, "Müharibənin bir ili", "Səngərlərdə yazılmış sətirlər", "Qələbə naminə", "Ölməzlik zirvəsi", "Pulemyotçu Nurəddin", "Erməni əsirliyindən dönənlər", "Qanlı gecə-qanlı tarix", "Hər addım uğrunda", "Kəsilməyən atəş səsləri" kitablarının müəllifidir. Onun hekayə, povest və publisistik yazıları "Azərbaycan", "Ulduz", "Yazı", "Xəzan", "Ustad" jurnallarında və bir sıra qəzetlərdə dərc olunub.
Vahid müəllim hazırda Qarabağ müharibəsindən bəhs edən roman üzərində işləyir. "Hər addım uğrunda" kitabında dərc olunmuş "Qoşa məzar" hekayəsi orta məktəblərin onuncu sinif dərsliyinə salınıb.
Azərbaycan Yazıçılar və Jurnalistlər birliklərinin üzvü olan V.Məhərrəmov "Azərbaycan" jurnalında dərc olunmuş "Barıt qoxulu sətirlər" yazısına görə Azərbaycan Yazıçılar Birliyinin təsis etdiyi Nəcəf Nəcəfzadə adına mükafata layiq görülüb. Həmçinin, "Qafqaz media" İctimai Birliyinin təsis etdiyi "Peşəkar jurnalist" mükafatının laureatıdır.
Yazıçı-publisist, tədqiqatçı Şəmistan Nəzirli V.Məhərrəmovun yaradıcılığı barədə fikirlərini belə ifadə edib: "Qələmə aldığın povest, hekayə və oçerklər, publisistik məqalələr insan fikrində, hissiyatında silinməz izlər açır, istər-istəməz, oxucunu dərindən fikrə dalmağa vadar edir".
Filologiya elmləri doktoru Vaqif Yusiflinin də V.Məhərrəmovun yaradıcılığı barədə fikirləri maraqlıdır: "V.Məhərrəmov bu günün üzdə olan, publisistik yazıları və bədii nəsri ilə geniş oxucu kütlələrinin diqqətini cəlb edən bir müəllifdir".
Müasir ədəbiyyatımızın inkişafına dəyərli töhfə olan V.Məhərrəmovun əsərləri ürəyi vətən sevgisi ilə döyünən heç bir oxucunu laqeyd qoymur, onları mübariz olmağa, birliyə və milli təəssübkeşliyə çağırır.
İnanıram ki, onun yaradıcılıq potensialı hələ neçə-neçə yeni kitabın ərsəyə gəlməsinə təkan verəcək.
Vahid müəllimin oğlu Araz Məhərrəmli bu gün əsgərdir, vətən keşiyindədir. O, oğlunun əsgər olmasından qürur duyur. Onun iki nəvəsi var. Biri öz adını daşıyır, digərinin adı isə Arzudur. Zənnimcə, baba olmaq sevinci qəlbini nə qədər çox fərəhləndirsə də, hiss və duyğularını, bölüşmək istədiyi fikirləri ustalıqla bədii sözə çevirib xeyli oxucu rəğbəti qazansa da, düşmən tapdağında qalmış doğma kəndi Babaylıya dönmədən Vahid müəllim özünü xoşbəxt hiss edə bilməz.
Onun nisgil dolu belə misraları da var:
İllərdir düşmüşəm səndən aralı,
Sağalmır ürəklər, qalıb yaralı.
Birləşmir arzular, qalıb paralı,
De haran ağrıyır, ey doğma kəndim?
Sizin yaradıcılığınız bir inam işığıdır, Vahid müəllim. Bu işıq sizi arzularınıza qovuşduracaq yolun mayakıdır.
Yalçın QAYA
